Mætum öll og göngum til góðs með Rauða krossinum á laugardag

2. okt. 2008

Rauði krossinn skorar á fólk að gerast sjálfboðaliði í klukkustund laugardaginn 4. október og Ganga til góðs fyrir landssöfnun Rauða krossins. Söfnunarféð rennur óskert í verkefni til að sameina fjölskyldur í Kongó sem hafa sundrast vegna stríðsátaka.

Alls hafa nú á fjórða hundrað skráð sig til þátttöku í Göngum til góð en Rauða krossinn vantar 2500 sjálfboðaliða til að ná til allra heimila á landinu. Einkum vantar sjálfboðaliða í Reykjavík.  Á höfuðborgarsvæðinu eru 24 söfnunarstöðvar í öllum hverfum borgarinnar og í Kópavogi,  Garðabæ, Hafnarfirði, Mosfellsbæ og á Álftanesi og Seltjarnarnesi. Fólk sem vill Ganga til góðs með Rauða krossinum fyrir gott málefni er hvatt til að skrá sig á www.raudikrossinn.is eða í síma 570 4000.

Rauði krossinn náðu að virkja 2500 sjálfboðaliða síðast þegar var Gengið til góðs árið 2006 og nú vill Rauði krossinn endurtaka þann frábæra árangur.

Ólafur Ragnar Grímsson, forseti Íslands, er verndari söfnunarinnar. Forsetinn mun heimsækja Árnesingadeild Rauða krossins á morgun til að vekja athygli á söfnuninni, og mun hann hitta nemendur Fjölbrautaskóla Suðurlands á Selfossi kl. 10:45 til að hvetja þá til að Ganga til góðs á sínu svæði.