600 þúsund krónur söfnuðust á handverksmarkaði MK-nema í dag

15. nóv. 2008

Á handverksmarkaði sem nemendur í áfanga um sjálfboðið starf í Menntaskólanum í Kópavogi héldu í dag söfnuðust um 600 þúsund krónur. Afraksturinn rennur óskiptur til að styrkja ungmenni í Maputo-héraði í Mósambík en Kópavogsdeildin er í vinadeildasamstarfi með Rauða krossinum í Maputo-héraði.

Fjöldi manns kom á markaðinn og gerði góð kaup á ýmiss konar handverki, bæði íslensku og frá Mósambík. Prjónahópur deildarinnar prjónaði peysur, sokka, vettlinga, trefla, teppi og fleira og bjó til annað handverk sem seldist vel í dag. Einnig var til sölu handverk alla leiðina frá Mósambík og vakti það mikinn áhuga og rann út. Þá höfðu ungmenni í Rauða kross starfi hjá Kópavogsdeild einnig lagt sitt af mörkum og búið til brjóstsykur og jólakort sem voru seld á markaðinum.

Handverksmarkaðurinn var lokaverkefni nemendanna í áfanganum um sjálfboðið Rauða kross starf. Markmið áfangans er að nemendur kynnist sjálfboðnu starfi hjá Rauða krossi Íslands. Nemendur vinna sem sjálfboðaliðar yfir önnina í samráði við kennara og Kópavogsdeild Rauða krossins. Meðal verkefna í boði eru aðstoð við aldraða og einmana, störf í Dvöl, athvarfi fyrir geðfatlaða, og félagsstarf með ungum innflytjendum. Nemendur fá fræðslu um hugsjónir og störf Rauða kross hreyfingarinnar og sækja námskeið fyrir sjálfboðaliða.

 

Deildin þakkar kærlega öllum þeim sjálfboðaliðum sem útbjuggu handverk á markaðinn, afgreiddu á markaðinum eða komu að honum með öðrum hætti. Framlag ykkar er ómetanlegt.