Tilnefning á Skyndihjálparmanni ársins 2008

28. des. 2008

Veist þú um einhvern sem með snarræði sínu og réttum viðbrögðum hefur bjargað mannslífi á árinu 2008?  Ef svo er - sendu okkur upplýsingar.

Á hverju ári velur Rauði krossinn „Skyndihjálparmann ársins“. Þá er einstaklingi sem hefur á árinu veitt almenna skyndihjálp á eftirtektarverðan hátt afhent viðurkenning við hátíðlega athöfn. Tilgangurinn með tilnefningunni er ekki síst að vekja athygli almennings á mikilvægi skyndihjálpar og hvetja sem flesta til að vera undir það búnir að veita hjálp á vettvangi slysa og áfalla.  

Ábendingar um eftirtektarverðan atburð þar sem hinn almenni borgari hefur brugðist við slysi eða veikindum til bjargar mannslífi er hægt að gera á vefnum með því að smella hér eða senda með pósti á Rauða kross Íslands Efstaleiti 9, 103 Reykjavík, merktar „Skyndihjálparmaður ársins“.

Tilnefningar þurfa að berast Rauða krossi Íslands eigi síðar en þann 15. janúar 2009.
 
Eftirfarandi reglur gilda um tilnefningar:
Að „Skyndihjálparmaður ársins“ hafi bjargað mannslífi.
Að „Skyndihjálparmaður ársins“ sé ekki menntaður heilbrigðisstarfsmaður, hjúkrunarfræðingur, læknir, sjúkraflutningamaður eða sjúkraliði eða hafi þegar björgunin átti sér stað verið starfandi á vegum björgunarsveitar eða lögreglu.
Að „Skyndihjálparmaður ársins“ hafi sýnt kunnáttu og færni í almennri skyndihjálp á eftirtektarverðan hátt. Hjálpin sem veitt var verður að hafa leitt til betri líðan eða stöðugleika á ástandi hins slasaða frá þeim tíma sem slysið/áfallið varð og þar til fagfólk kom á vettvang.

Dómnefnd um val á „Skyndihjálparmanni ársins” skipa fulltrúar frá: Rauða krossi Íslands, Slysavarnafélaginu Landsbjörgu, Neyðarlínunni, Landspítala háskólasjúkrahúsi, lögreglunni og Landssambandi slökkviliðs- og sjúkraflutningamanna.