12195778_716177561846478_6363816547382505999_n

5. nóv. 2015 : Fyrsti íslenski sendifulltrúinn á Grikklandi

Páll Biering, dósent í geðhjúkrun við Háskóla Íslands, er nú í sex vikna sendiför í Grikklandi á vegum Rauða krossins. Er þetta í fyrsta sinn sem Rauði krossinn á Íslandi sendir sendifulltrúa til Grikklands.

Helga-nepal-Laxmi

13. júl. 2015 : Fimm sendifulltrúar hafa tekið þátt í hjálparstarfinu í Nepal

Ástandið í Nepal er enn mjög erfitt og margir sem enn þarfnast aðstoðar. Rauði krossinn á Íslandi brást við með því að hefja neyðarsöfnun fyrir fórnarlömb jarðskjálftanna og sendi strax á vettvang sendifulltrúa.

P-NPL0346

6. júl. 2015 : Tveir sendifulltrúar í viðbót til Nepal

Rauði kross­inn á Íslandi hef­ur sent tvo nýja sendi­full­trúa til starfa í Nepal. Lilja Óskars­dótt­ir hjúkr­un­ar­fræðing­ur og Ágústa Hjör­dís Krist­ins­dótt­ir bráðahjúkr­un­ar­fræðing­ur eru komnar til Chaut­ara í norður­hluta Nepal

12195778_716177561846478_6363816547382505999_n

26. jún. 2015 : Íslenskur sendifulltrúi til Jemen

Páll Biering, dósent í geðhjúkrunarfræði við Háskóla Íslands, er lagður af stað í sendiför til Jemen og Djibútí á vegum Alþjóðaráðs Rauða krossins (ICRC). Páll ferðast til hafnarborgarinnar Aden í gegnum Djibútí þar sem hann mun hafa vinnuaðstöðu.

P-NPL0421

21. maí 2015 : Augnabliksmyndir af vettvangi hjálparstarfs í Nepal

Þann 25. apríl s.l. reið jarðskjálfti yfir Nepal að styrkleika 7.8 á Richter. Átta dögum síðar var norska ERUteymið búið að koma upp neyðarsjúkrahúsi á fótboltavelli í Chautara í norðurhluta Nepal.

5. okt. 2011 : Þrír hjúkrunarfræðingar til Íraks

Hólmfríður Garðarsdóttir, Áslaug Arnoldsdóttir og Magna Björk Ólafsdóttir vinna við verkefni í Írak á vegum Rauða krossins Íslands.

7. sep. 2011 : Ostaveisla í Pakistan

Hrafnhildur Sverrisdóttir er sendifulltrúi Rauða krossins í Pakistan. Hún skrifaði dagbók fyrir Morgunblaðið sem birtist í blaðinu þann 21.08.2011.

30. ágú. 2011 : Tveir sendifulltrúar Rauða krossins til starfa í Írak

Tveir sendifulltrúar Rauða kross Íslands, Áslaug Arnoldsdóttir og Magna Björk Ólafsdóttir hjúkrunarfræðingar, munu halda til Íraks þann 1. september til starfa með Alþjóða Rauða krossinum.

Áslaug mun dvelja í 9 mánuði í Írak og verður starf hennar fólgið í heimsóknum í fangelsi, sjúkrahús og á geðsjúkrahús í Bagdad þar sem unnið er að því að bæta aðbúnað vistmanna.  Áslaug mun einnig sjá um heilbrigðismál starfsmanna Alþjóða Rauða krossins í borginni.

Áslaug er einn reyndasti sendifulltrúi Rauða kross Íslands og hefur áralanga reynslu af störfum á átakasvæðum. Hún fór fyrst sem sendifulltrúi Rauða krossins árið 1996 þar sem hún starfaði á sjúkrahúsi Alþjóða Rauða krossins í Suður-Súdan og hefur síðan unnið meðal annars í Georgíu, Írak, Líbanon, Eþíópíu, Úganda, Pakistan og á Haítí. Nú síðast var Áslaug fengin til starfa í Líbíu þar sem hún vann sem hjúkrunarfræðingur hjá Alþjóða Rauða krossinum nú í sumar vegna átakanna sem enn standa yfir í landinu.

21. jún. 2011 : Sendifulltrúar þjálfaðir í uppbyggingu skjóls í kjölfar náttúruhamfara

Tveir meðlimir veraldarvaktar Rauða kross Íslands, Óskar Torfi Þorvaldsson byggingarverkfræðingur og Gísli Guðfinnsson byggingariðnfræðingur fóru fyrir skömmu í gegnum þjálfun hjá Alþjóðasambandi Rauða krossins í uppbyggingu skjóls í kjölfar náttúruhamfara.

Fyrri hluti námskeiðsins var í formi fimm vikna net-námskeiðs sem þróað var af spænska Rauða krossinum. Til að fá aðgang á seinni hlutann þurftu þátttakendur að ná viðunandi árangri í fyrri hlutanum.

Seinni hluti námskeiðsins fór fram á fimm daga tímabili í byrjun júní í Ottawa í Kanada. Þjálfunin var skipulögð af sérfræðingum frá kanadíska og ástralska Rauða krossinum. Fengu þátttakendur meðal annars tækifæri til að framkvæma þær lausnir sem fjallað var um í fyrri hluta námskeiðs.

 

26. maí 2011 : Sendifulltrúi Rauða krossins aðstoðar fórnarlömb átaka í Líbýu

Áslaug Arnoldsdóttir sendifulltrúi Rauða kross Íslands heldur til Líbýu nú á sunnudag.  Áslaug mun starfa sem hjúkrunarfræðingur með Alþjóða Rauða krossinum (ICRC) í borginni Benghazi, en þangað hefur sært fólk verið flutt af átakasvæðunum í Líbýu til að veita þeim læknisaðstoð. 

Mörg hundruð manns hafa látist síðan átök milli stjórnarhers og uppreisnarmanna í Líbýu brutust út í febrúar og þúsundir hafa særst. Gífurleg eyðilegging hefur átt sér stað á heimilum og opinberum byggingum eins og sjúkrahúsum. Vatns- og rafmagnsveitur hafa einnig verið sprengdar í loft upp svo lífskilyrði fólks eru mjög erfið á þessu svæði. Nokkur hundruð þúsund manns hafa flúið Líbýu undanfarið, einkum til nágrannaríkjanna Túnis og Egyptalands.

16. maí 2011 : Hjúkrunarfræðingur Rauða kross Íslands við störf á Haítí

O. Ragnheiður Þórisdóttir hjúkrunarfræðingur Rauða kross Íslands hóf nýverið störf í búðum Alþjóða Rauða krossins á Haíti. Meginstarf hennar er að huga að heilsufari hundruða hjálparstarfsmanna í Port-au-Prince.

Þó að sextán mánuðir séu liðnir síðan jarðskjálftinn á Haítí varð rúmlega 220.000 manns að bana þá er enn þörf fyrir umfangsmikið hjálparstarf. Það fer fram við afar erfiðar aðstæður, og því er mikilvægt að huga að heilbrigði hjálparstarfsmanna.

„Enn eru fleiri en 600 þúsund manns í tjaldbúðum á Haítí,“ segir Þórir Guðmundsson sviðsstjóri alþjóðasviðs Rauða kross Íslands. „Það þýðir að meðfram uppbyggingunni, sem er hafin, þá þarf að sinna þörfum fólks sem býr við álíka aðstæður og á fyrstu vikunum eftir skjálftann.“

 

24. mar. 2011 : Líf og starf á flóðasvæði í Pakistan

Jóhannes Sigfússon lögregluvarðstjóri vinnur í Pakistan sem öryggisfulltrúi Alþjóða Rauða krossins. Hann skrifar um störf sín á vettvangi:

11. mar. 2011 : Var skotmark talíbana

Áslaug Arnoldsdóttir flúði átakasvæði í Pakistan þegar talibanar hugðust gera árás á hana og aðra sendifulltrúa Rauða krossins. Greinin birtist í Fréttatímanum 11. mars 2011.

3. jan. 2011 : Hjálp þar sem neyðin var stærst

„Það er mjög lærdómsríkt að taka þátt í svona verkefnum og sömuleiðis gefandi. Ég get hagað minni vinnu þannig að stundum er borð fyrir báru og get þá farið fyrirvaralítið af stað þegar kallið kemur...Greinin birtist í Morgunblaðinu 31.12.2010

17. des. 2010 : „Starfið í Pakistan var áhugavert og árangursríkt"

Lilja Óskarsdóttir hjúkrunarfræðingur kom heim frá Pakistan 15. desember en hún fór til Larkana í Sindh héraði í byrjun nóvember. Verkefni Lilju í Larkana var að taka þátt í hjálparstarfi fjölþjóðlegs teymis undir stjórn norska Rauða krossins sem hófst í lok ágúst í kjölfar flóðanna í Indus. 

„Við fórum sex daga vikunnar með færanlega sjúkrastöð í héruðin í kring, til Shikarpur, Shadad Kot og Larkana. Þar störfuðu tveir til þrír læknar, tveir hjúkrunarfræðingar og tíu pakistanskir starfsmenn frá Rauða hálfmánanum við móttöku, greiningu og meðhöndlun sjúkra á svæðinu. Hlutverk mitt í teyminu var að stjórna uppsetningu stöðvarinnar og skipuleggja starfið á hverjum stað, sinna almennum hjúkrunarstörfum, t.d. sáraskiptingum og lyfjagjöfum, velja úr veikustu sjúklingana, sem fengu læknisviðtal, og meðhöndla einfaldari vandamál við innganginn,“ segir Lilja eftir heimkomuna.

23. nóv. 2010 : Lilja á flóðasvæðum í Pakistan: „Fólkið er svangt, órólegt og skítugt“

Lilja Óskarsdóttir hjúkrunarfræðingur tók á móti 154 sjúklingum á færanlegri sjúkrastöð Rauða krossins á flóðasvæðum í Pakistan á mánudag. Flóðin færðu fimmtung af Pakistan í kaf og ollu skaða hjá 20 milljónum manna.

„Ég fór núna í tjaldbúðir fyrir fólk sem hefur orðið að flýja heimili sín,“ segir Lilja. „Það var verið að koma upp enn fleiri tjöldum fyrir fólk sem hingað til hefur fengið að gista í skólum. En nú þarf að rýma skólana sem eiga að taka til starfa á ný.“

Lilja starfar á sjúkrastöð sem sendir fjögur teymi lækna og hjúkrunarfræðinga út á flóðasvæðin. Þrjú teymi fara daglega út á flóðasvæði og snúa til baka um kvöldið en það fjórða fer lengri leið og þar gista hjálparstarfsmenn þrjá daga í senn. Aðstaðan er ekki beysin: Moskítónetstjald á húsþaki.

12. nóv. 2010 : Kóleran er tifandi tímasprengja

Þrír íslenskir sendifulltrúar Rauða krossins á Haítí taka nú þátt í að berjast gegn kólerufaraldri sem stöðugt verður skæðari. Sjúkdómurinn hefur náð inn til Port-au-Prince og er eins og tifandi tímasprengja í flóttamannabúðum þar sem hundruð þúsunda manna hafast við.

Þrátt fyrir mikla áherslu á vatns- og hreinlætisaðstöðu í höfuðborginni – þar sem Rauði krossinn útvegar um 40 prósent af öllu drykkjarvatni – eru aðstæður samt víða hrikalegar. Fellibylurinn Tomas gerði illt verra.

„Það eru komin næstum 10 þúsund tilfelli og 643 dauðsföll skráð vegna kóleru,“ segir Birna Halldórsdóttir rekstrarstjóri tjaldsjúkrahúss Rauða krossins í Carrefour. „En mörg tilfelli hafa ekki verið skráð og sumir segja að það sé hægt að tvöfalda þessar tölur.“

10. nóv. 2010 : Tók á móti 75 sjúklingum fyrsta daginn í vinnunni

Lilja Óskarsdóttir sendifulltrúi Rauða kross Íslands hefur hafið störf sem hjúkrunarfræðingur í alþjóðlegu teymi Rauða krossins í Larkana í Sindh héraði í Pakistan sem fór illa í flóðunum miklu í ágúst.

Lilja sendi Rauða krossinum tölvupóst í dag til að láta vita að allt gengi vel og sagði að þennan fyrsta dag í starfi sínu hefðu 75 manns mætt í færanlega sjúkrastöð Rauða krossins.

„Það var mjög skemmtilegt að taka þátt í að setja upp flotta aðstöðu, taka á móti 75 sjúklingum og taka svo allt saman aftur og pakka niður fyrir næsta stað," sagði Lilja í pósti sínum.

31. ágú. 2010 : Hjálpargögn til hamfarasvæða á sem skemmstum tíma

Baldur Steinn Helgason er sendifulltrúi Rauða kross Íslands á skrifstofu Alþjóða Rauða krossins í Dúbæ í Sameinuðu arabísku furstadæmunum. Hann sendi þennan pistil til að veita innsýn í hin mismunandi störf sendifulltrúa Rauða krossins á vettvangi:

30. júl. 2010 : Tveir hjálparstarfsmenn Rauða krossins til viðbótar halda til Haítí

Erla Svava Sigurðardóttir hjúkrunarfræðingur og Jón Magnús Kristinsson bráðalæknir halda til Haítí næstkomandi mánudag, 2. ágúst þar sem þau munu starfa næstu vikur á sjúkrahúsi finnska og þýska Rauða krossins í Carrefour, úthverfi Port-au-Prince. Þau eru 26. og 27. í röðinni af sendifulltrúum Rauða kross Íslands sem haldið hafa til starfa á Haítí síðan jarðskjálftinn mikli reið þar yfir fyrir rúmu hálfu ári.

Fyrir eru sex hjálparstarfsmenn á vegum Rauða kross Íslands á jarðskjálftasvæðinu. Þrír halda til Íslands í lok næstu viku, en Oddfríður Ragnheiður Þórisdóttir og Kristjana Þorláksdóttir hjúkrunarfræðingar halda áfram störfum á finnsk/þýska sjúkrahúsinu út ágúst.

15. jún. 2010 : Skelfilegt ástand á Haítí

Bjarni Árnason bráðalæknir er nýkominn frá Haítí þar sem hann dvaldi í um mánuð. Hann segir Haítíbúa oft fara of seint til læknis og að þar séu margir veikir. Nú sé heilbrigði fólks verra en áður. Greinin birtist í Fréttablaðinu 15.06.2010.

14. maí 2010 : Tveir hjúkrunarfræðingar halda til starfa fyrir Rauða krossinn á Haítí og í Pakistan

Tveir íslenskir hjúkrunarfræðingar halda næstu daga til starfa fyrir Rauða krossinn á sjúkrahúsum á Haítí og í Pakistan. 

Erla Svava Sigurðardóttir, sem er nýkomin heim frá störfum á Haítí, fer til Peshawar í Pakistan þann 18. maí þar sem hún mun starfa á sjúkrahúsi Alþjóða Rauða krossins í 4 mánuði. 

Margrét Rögn Hafsteinsdóttir, sem er deildarstjóri á taugalækningadeild Landspítalans, verður yfirhjúkrunarfræðingur á sjúkrahúsi þýska og finnska Rauða krossins í Carrefour í úthverfi Port-au-Prince. Þetta er í fyrsta sinn sem Margrét Rögn starfar fyrir Rauða krossinn, en hún hefur áður starfað fyrir Sameinuðu þjóðirnar í New York. Hún heldur út á morgun 15. maí.

5. maí 2010 : Langtímauppbygging verður í að minnsta kosti tíu ár ef ekki lengur

Haítí var eitt fátækasta ríki í vesturheimi fyrir jarðskjálftann þann 12. janúar 2010. Byggingar og veitukerfi voru ekki upp á það besta, sérstaklega í þéttbýli.

3. maí 2010 : Nemendur í Réttarholtsskóla fræddust um hjálparstarfið á Haítí

Nemendur í tíunda bekk Réttarholtsskóla fengu á dögunum heimsókn frá Rauða krossinum en Lilja Steingrímsdóttir sendifulltrúi sagði þeim frá störfum sínum á Haíti eftir jarðskjálftana þar. Lilja sýndi þeim myndir frá hjálparstarfinu og svaraði spurningum nemenda.

Þó nokkuð hefur verið um það undanfarið að skólar hafi leitað til Rauða krossins með fræðslu um hjálparstarfið á Haítí eða önnur verkefni Rauða krossins.

26. apr. 2010 : „Við náum aldrei að sinna öllum þeim sem þurfa á aðstoð að halda.” Bréf frá sendifulltrúa Rauða krossins á Haítí

Sigurjón Valmundsson sjúkraflutninga- og slökkviliðsmaður fór til Haítí 13. mars. Sigurjón starfar við neyðarsjúkrahús norska Rauða krossins í Petit Goave, um það bil 70 kílómetra frá Port-au-Prince.

13. apr. 2010 : Sérfræðingur í dreifingu hjálpargagna á leið til Haítí

Birna Halldórsdóttir hélt til Haítí í dag, þriðjudaginn 13. apríl, til starfa fyrir Rauða kross Íslands. Birna mun starfa með finnskri og franskri sveit við dreifingu hjálpargagna Alþjóða Rauða krossins.

Birna er mannfræðingur og hefur langa reynslu af störfum fyrir Rauða kross Íslands, bæði á landskrifstofu og við alþjóðleg neyðarverkefni. Síðast starfaði Birna í Malaví þar sem hún vann við að skipuleggja og útfæra verkefni til að tryggja fæðuframboð fyrir skjólstæðinga malavíska Rauða krossins. Árið 2005 vann hún í Aceh á Súmötru í Indónesíu þar sem hún stýrði dreifingu hjálpargagna eftir flóðbylgjuna miklu. Áður hefur hún unnið í Suður-Súdan, Sómalíu og Keníu.

8. apr. 2010 : Námskeið fyrir verðandi sendifulltrúa

Á þriðja tug manna útskrifaðist af námskeiði fyrir verðandi sendifulltrúa, sem Rauði kross Íslands hélt í Munaðarnesi á dögunum. Námskeiðið er fyrir þá sem vilja vera á svokallaðri veraldarvakt, sem er úkallslisti Rauða krossins fyrir alþjóðlegt hjálparstarf.

Námskeiðið var með breyttu sniði en áður. Skiptist það nú í tvo hluta þar sem þátttakendur þurfa að fara í gegnum námskeið á vefnum sem lýkur með prófi og standist þeir það próf heldur þjálfunin áfram á vikunámskeiði í Munaðarnesi. Í fyrsta skiptið síðan 2002 voru þátttakendur allir frá Íslandi fyrir utan einn sem kom alla leið frá Bangladess.

23. feb. 2010 : Erfitt en gott að gera gagn

Friðbjörn Sigurðsson læknir var í rúman mánuð á vegum Rauða krossins í Port au Prince í Haítí. Skilvirkt starf.  Álagskvillar algengir. Fólk upplifir skjálftann aftur og aftur og getur ekki sofið. Greinin birtist í Morgunblaðinu 23.02.2010.

12. feb. 2010 : Sex íslenskir hjálparstarfsmenn Rauða kross Íslands á leið til Haítí

Sex íslenskir hjálparstarfsmenn eru á leið til Haíti nú um helgina að beiðni Alþjóða Rauða krossins.  Mánuður er nú liðinn frá því jarðskjálftinn mikli reið þar yfir, og hefur Alþjóða Rauði krossinn hækkað neyðarbeiðni sína úr 12 milljörðum íslenskra króna í 25 milljarða.

Fjórir hjúkrunarfræðingar, Áslaug Arnoldsdóttir, Maríanna Csillag, Erla Svava Sigurðardóttir og  Lilja Óskarsdóttir munu starfa við tjaldsjúkrahús þýska og finnska Rauða krossins í fátækrahverfinu Carrefour í Port-au-Prince.  Kristjón Þorkelsson verður ábyrgur fyrir skipulagningu vatnshreinsimála á meðan á neyðaraðgerðum stendur, og Sólveig Björk Sveinbjörnsdóttir gengur til liðs við alþjóðlegt sérfræðiteymi sem nú vinnur að skipulagningu uppbyggingarstarfs Rauða kross hreyfingarinnar á Haítí.

9. feb. 2010 : Þrír íslenskir sérfræðingar í uppbyggingarteymi Alþjóða Rauða krossins á Haítí

Sigríður Þormar, Hrafnhildur Sverrisdóttir og David Lynch halda áleiðis til Haítí í dag. Þau eru fulltrúar Rauða kross Íslands í alþjóðlegu teymi sem skipuleggur uppbyggingarstarf Rauða kross hreyfingarinnar á Haítí á næstu þremur árum. Teymið samanstendur af 24 sérfræðingum í heilbrigðismálum, birgðastjórnun, neyðarvörnum, neyðarskýlum, lífsafkomu og uppbyggingu samfélaga eftir áföll.

Sigríður Þormar er hjúkrunarfræðingur og sálfræðingur með áratugareynslu af áfallahjálp og sálrænum stuðningi í kjölfar hamfara. Hún hefur starfað fyrir Rauða kross Íslands og Alþjóða Rauða krossinn víða um heim, og þjálfað sjálfboðaliða fjölda landsfélaga Rauða krossins og Rauða hálfmánans í sálrænum stuðningi.

9. feb. 2010 : Til hjálparstarfs á Haítí

Frönskukunnátta Lilju Steingrímsdóttur hjúkrunarfræðings varð til þess að hún var beðin um að halda utan til að taka þátt í hjálparstarfi Rauða krossins á Haítí. Hún heldur af stað á morgun. Greinin birtist í Fréttablaðinu 06.02.2010

4. feb. 2010 : Tveir íslenskir hjúkrunarfræðingar til Haítí á vegum Rauða krossins

Hjúkrunarfræðingarnir Lilja Steingrímsdóttir og Maríanna Csillag eru á leið til Haítí þar sem þær munu starfa á tjaldsjúkrahúsi þýska og finnska Rauða krossins. Tjaldsjúkrahúsið sinnir 700 sjúklingum á dag, og er staðsett við íþróttaleikvang í Carrefour, einu fátækasta hverfi höfuðborgarinnar Port-au-Prince, en þar hafa tugþúsundir manna leitað skjóls við mjög slæmar aðstæður.

Lilja heldur til Haítí næsta sunnudag, 7. febrúar. Hún starfar sem hjúkrunarfræðingur á gjörgæsludeild Landspítalans. Lilja hefur tvisvar áður starfað fyrir Rauða krossinn, á Taílandi og í Pakistan.

3. feb. 2010 : Sálrænn stuðningur á Haítí: Að græða hin ósýnilegu ör

„Hvar byrjar maður? Hvernig lýsir maður aðstæðum fólks í neyð, fólks sem er á vergangi, og hefur misst fjölskyldu sína, heimili, fyrirvinnu, lífsafkomu, og allar eigur sínar?

21. jan. 2010 : Gistir í tjaldbúðum

Friðbjörn Sigurðsson læknir á Landspítala fer til Haítí til að starfa með þýska og finnska Rauða krossinum.
Viðtal við Friðbjörn birtist í DV 20. janúar í „Maður dagsins"

19. jan. 2010 : Íslenskur læknir á leið til Haítí ásamt hjálpargögnum Rauða krossins

Friðbjörn Sigurðsson læknir fer á morgun til Haítí þar sem hann mun starfa með læknateymi þýska Rauða krossins í einn mánuð. Friðbjörn vann á sjúkrahúsi á Haítí í tvo mánuði fyrir tæpum 20 árum.

Friðbjörn fer með flugvél á vegum utanríkisráðuneytisins sem fer þangað til að sækja íslensku alþjóðabjörgunarsveitina. Hjálpargögn sem Alþjóða Rauði krossins hefur sérstaklega beðið Rauða kross Íslands að útvega fara einnig með flugvélinni. Um er að ræða 1.000 skyndihjálparpakka sem sjálfboðaliðar Rauða krossins pökkuðu í gær, loftkælibúnaður fyrir skurðstofur, dísilrafstöðvar og annar sjúkrabúnaður.

14. jan. 2010 : Íslenskur sendifulltrúi á leið til Haítí í dag

Hlín Baldvinsdóttir, með reyndustu sendifulltrúum Rauða kross Íslands, heldur til Haítí í dag.  Hún mun gegna stöðu fjármálastjóra í sérfræðingateymi Alþjóða Rauða krossins sem meta mun þörf á aðstoð næstu vikna og mánaða. Hlín hefur unnið að fjölmörgum verkefnum fyrir Rauða kross Íslands og Alþjóða Rauða krossinn frá árinu 1998, jafnt í þróunarstarfi sem neyðaraðgerðum í kjölfar hamfara.

Tíu neyðarteymi Alþjóða Rauða krossins eru nú á leið á vettvang. Þar er um að ræða sérfræðinga í dreifingu hjálpargagna, heilsugæslu, uppsetningu neyðarskýla, birgðaflutningum og hreinsun vatns, auk sérhæfðra lækna og hjúkrunarfræðinga sem munu setja upp tjaldsjúkrahús í höfuðborginni Port-au-Prince.

21. des. 2009 : Rauði krossinn styður jafningjafræðslu í Malaví

Hluti af alnæmisverkefni Rauða krossins í Malaví felst í jafningjafræðslu um alnæmi og smitleiðir þess.

16. des. 2009 : Rauði kross Íslands styrkir nemendur til framhaldsnáms í Malaví

Rauði kross Íslands styður rúmlega 200 grunnskólabörn til mennta í Chiradzulu héraði í suðurhluta Malaví. Félagið styður einnig tvö ungmenni til náms við Náttúru- og auðlindaframhaldsskólann í Lilongve.

9. des. 2009 : Sendifulltrúi Rauða kross Íslands til Eþíópíu

Ómar Valdimarsson sendifulltrúi Rauða kross Íslands hélt í gærkvöldi til Eþíópíu þar sem hann mun starfa að upplýsingamálum vegna mikilla þurrka sem geisað hafa í landinu og valdið miklum matvælaskorti.
 
Ómar mun starfa með alþjóðlegu matsteymi Rauða krossins fram til 22. desember. Teymið metur þörf fyrir aðstoð og aflar fjár til hjálparstarfs en talið er að allt að 300.000 manns hafi orðið fyrir barðinu á alvarlegum matvælaskorti í kjölfar þurrka í fjórum til fimm héruðum í Eþíópíu.

8. des. 2009 : Stuðningur Rauða kross Íslands við munaðarlaus og önnur bágstödd börn í Malaví

Alnæmi et eitt af alvarlegustu heilbrigðisvandamálum í suðurhluta Afríku, og frá árinu 2002 hefur Rauði kross Íslands veitt Rauða krossinum í Malaví fjárhagslega og tæknilega aðstoð til að takast á við erfiðleikana.

21. okt. 2009 : Sendifulltrúi Rauða kross Íslands vinnur við dreifingu hjálpargagna í hamförum

Baldur Steinn Helgason þróunar- og skipulagsfræðingur heldur á vegum Rauða kross Íslands til Dubai í Sameinuðu arabísku furstadæmunum fimmtudaginn 22. október en þar mun hann starfa í birgðastjórnunarstöð Alþjóða Rauða krossins í tvo mánuði.

Birgðastjórnunarstöðin í Dubai sér um að kaupa og flytja hjálpargögn á vettvang náttúruhamfara og farsótta í Afríku, Evrópu og Mið-Austurlöndum með hagkvæmum hætti og stuðlar þannig að skjótum viðbrögðum Rauða krossins við neyð. Um þessar mundir bregst Rauði krossinn meða annars við miklum hamförum í Asíu í kjölfar flóða og jarðskjálfta sem og hungursneyð í Eþíópíu og nálægum löndum og miklum flóðum í Vestur-Afríku.
 

9. okt. 2009 : Að haga sér í samræmi við aðstæður

Öryggis- og streitustjórnunarnámskeið var haldið fyrir Veraldarvakt Rauða krossins í Bláfjöllum. 17 þátttakendur sóttu námskeiðið, sem voru aðallega úr hópi sendifulltrúa Rauða krossins, en að auki voru meðlimir frá Landsbjörgu og blaðamenn. Markmið námskeiðsins var að undirbúa sendifulltrúa fyrir störf á vettvangi.

Kynntar voru öryggisreglur Rauða kross hreyfingarinnar og rætt um þær aðstæður sem upp kunna að koma við hjálparstörf erlendis og sem kunna að hafa áhrif á öryggi starfsmanna. Rætt var um orsakir og afleiðingar streitu og þátttakendum kynntar aðferðir til að draga úr streitueinkennum. Að auki sögðu tveir sendifulltrúar frá undirbúningi fyrir brottför og reynslu sinni af vettvangi.

29. sep. 2009 : Skjót viðbrögð Alþjóða Rauða krossins vegna mengaðs vatns í Kandahar

Viðvörunarbjöllur fóru í gang þegar í fjöldi manna lést í borginni Kandahar og um eitt hundrað sýktust af alvarlegum niðurgangi í síðasta mánuði. Á einum degi voru um 40 sjúklingar fluttir á Mirwais sjúkrahúsið til meðferðar. 18 manns hafa látist, mest börn, frá því sýkingarinnar varð fyrst vart. Líkleg ástæða sýkingarinnar er mengaður vatnsveituskurður sem þorpsbúar nota bæði til að ná sér í drykkjarvatn og til þvotta.

Á sjúkrahúsinu starfar Magnús H. Gíslason verkfræðingur og sendifulltrúi Rauða kross Íslands. Hlutverk hans felst í því að endurnýja raflagnir í byggingum sjúkrahússins á vegum Alþjóða Rauða krossins.

16. sep. 2009 : Þórunn Sveinbjarnardóttir leiðir alþjóðlegt teymi Rauða krossins í Kákasus

Þórunn Sveinbjarnardóttir þingmaður leiðir á næstu dögum alþjóðlegt teymi Rauða krossins sem kannar viðbúnað vegna hamfara í Kákasuslöndunum þremur, Georgíu, Armeníu og Aserbaídsjan. Þórunn verður fulltrúi Rauða kross Íslands í teyminu.

Jarðskjálftar eru algengir í þessum löndum, auk þess sem flóð, aurskriður og ýmsar veðurtengdar hamfarir eru þar tíðar. Tvær og hálf milljón manna búa á skjálftasvæðum í Kákasusfjöllum. Að minnsta kosti 25 þúsund manns létu lífið í jarðskjálfta í Armeníu árið 1988. Í þessum mánuði eyðilagði jarðskjálfti í Georgíu 1.400 hús með þeim afleiðingum að nú hafast fleiri en þúsund fjölskyldur við í tjöldum.

10. sep. 2009 : Tombóluframlag íslenskra barna til hjálpar börnum í Malaví

Tombólubörn Rauða krossins geta verið stolt af starfi sínu á árinu 2008. Börnin söfnuðu um  600.000 krónum til hjálpar börnum í forskólum í Chiradzulu og Mwanza héraði í suður-Malaví. Þar hefur Rauði kross Íslands stutt við alnæmisverkefni malavíska Rauða krossins undanfarin ár. Hólmfríður Garðarsdóttir sendifulltrúi starfar í Malaví.

Í Chiradzulu héraði eru þrír forskólar sem njóta stuðnings Rauða krossins. Það var einlæg ósk umönnunaraðila í skólunum að fá fleiri útileiktæki fyrir börnin. Var því ákveðið að hluti af framlagi tombólubarna yrði varið til kaupa á rólum, vegasalti, hringekju og rennibraut.

Í Mwanza héraði styður malavíski Rauði krossinn fjóra forskóla. Umönnunaraðilar þar og sjálfboðaliðar Rauða krossins óskuðu einnig eftir að nýta framlag tombólubarna á Íslandi til að kaupa timbur í vegasölt og rennibrautir, reipi í rólur, stóla, hillur og efni til að búa til tuskudúkkur fyrir börnin. Öll eru leiktækin framleidd í héruðunum.

31. ágú. 2009 : Sendifulltrúi Rauða kross Íslands metur neyðarástand í Sýrlandi

Kristjón Þorkelsson sérfræðingur í vatns- og hreinlætismálum fór til Sýrlands á laugardaginn til að meta alvarlegt ástand vegna þurrka í Sýrlandi og finna leiðir til úrbóta. Eftir það mun Alþjóða Rauði krossinn ákveða hvort gefið verði út alþjóðlegt neyðarkall. Talin er hætta á alvarlegum skorti á drykkjarvatni á næstu vikum og rafmagnsleysi verði ekki breyting á ástandinu.

Langvarandi þurrkar í austurhluta Sýrlands hafa hrakið fólk úr sveitum í útjaðra borga og bæja þar sem ekki eru skilyrði til búsetu. Við slíkar aðstæður er mikil hætta á allkonar smitsjúkdómum þar sem heilbrigðisþjónustu er ábótavant og skortur er á drykkjarvatni. Þúsundir manna hafa nú hrakist frá heimilum sínum en 1,3 milljónir manna eru mjög illa staddir vegna skorts á vatni.

12. ágú. 2009 : Ormur í drykkjarvatni

Dagur í eþíópsku fangelsi er ein birtingarmynd Genfarsamninganna, sem hafa verndað fórnarlömb átaka í 60 ár

11. ágú. 2009 : Uppbygging sjúkrahúss í Afganistan

Frá því í lok júní á þessu ári hefur Magnús H. Gíslason verkfræðingur og sendifulltrúi Rauða kross Íslands starfað á vegum Alþjóða Rauða krossins við að endurnýja raflagnir í Mirwais sjúkrahúsinu í Kandahar í suðausturhluta Afganistans.

Sjúkrahúsið er aðalverkefni Alþjóða Rauða krossins í Kandahar
„Megnið af starfsemi Alþjóða Rauða krossins í Kandahar  tengist Mirwais sjúkrahúsinu með einhverjum hætti. Þetta er mjög stór spítali, sem byggt var af Kínverjum upp úr 1970 á sjö hektara lóð. Alls eru þar 400 sjúkrarúm, en fjölgar síðar í 550 rúm. Spítalinn þjónar um það bil 3,5 milljónum manna, aðallega héruðunum Kandahar og Helmand,“ segir Magnús, en hlutverk hans við enduruppbyggingu sjúkrahússins felst meðal annars í því að fara yfir teikningar, bjóða verk út til verktaka og hafa eftirlit með þeim. Gert er ráð fyrir því að verkefni Magnúsar taki um það bil 6 mánuði.
 

21. júl. 2009 : Íslenskur sendifulltrúi þjálfar starfsfólk á sjúkrahúsi í Írak

Alþjóða Rauði krossinn hefur starfað í Írak undanfarinn aldarfjórðung þrátt fyrir þau átök sem ríkt hafa í landinu og tekur virkan þátt í uppbyggingu heilbrigðisþjónustu í landinu.

15. júl. 2009 : Íslenskur sendifulltrúi stjórnar matvæladreifingum í Simbabve

Huld Ingimarsdóttir sendifulltrúi Rauða kross Íslands var ráðin yfirmaður matvæladreifinga i Simbabve í september á síðasta ári, en áætluðum dreifingum lýkur í september á þessu ári. Verkefnið er stærsta verkefni Alþjóða Rauða krossins og kostar í heild um það bil 32 milljónir Bandaríkjadala.

14. júl. 2009 : Rauði krossinn byggir upp bráðaþjónustu í Nígeríu

Sendifulltrúi Rauða kross Íslands á leið til Abuja.
Höskuldur Friðriksson sjúkraflutningamaður býr yfir dýrmætri þekkingu á sviði bráðaþjónustu

4. júl. 2009 : Sendifulltrúi Rauða kross Íslands til Afganistans

  • Boðaður með tveggja vikna fyrirvara til uppbyggingarstarfa á sjúkrahúsi
  • Magnús Gíslason heldur í þriðja sinn til Afganistans með hugvitið að vopni

Magnús Hartmann Gíslason, sendifulltrúi Rauða kross Íslands, er nýfarinn til borgarinnar Kandahar í suðurausturhluta Afganistans. Þar mun magnús, sem er rafmagnsverkfræðingur, starfa ásamt tuttugu manna teymi á vegum Alþjóða Rauða krossins, við að endurnýja raflagnir í stóru sjúkrahúsi. Magnús mætir þó ekki með neinn tækjabúnað heldur aðeins hugvitið.

23. jún. 2009 : Pálína Ásgeirsdóttir hlaut fálkaorðuna fyrir hjálparstörf

Pálína Ásgeirsdóttir hjúkrunarfræðingur og einn allra reyndasti sendifulltrúi Rauða kross Íslands var sæmd fálkaorðunni á þjóðhátíðardaginn 17. júní fyrir alþjóðlegt hjálparstarf.  Hartnær 25 ár eru síðan Pálína hóf störf með Rauða krossinum og er hún vel að þessum heiðri komin.

“Ég lít á þennan heiður ekki síður sem viðurkenningu fyrir hjúkrunarstéttina og hjálparstarf almennt,” sagði Pálína Ásgeirsdóttir að þessu tilefni.

Fyrsta starf Pálínu á vettvangi hjálparstarfa var við neyðaraðstoð í Eþíópíu árið 1985, en þangað hélt hún á vegum Hjálparstarfs kirkjunnar vegna mikillar hungursneyðar sem þar geisaði.  Árið 1986 varð hún sendifulltrúi Rauða kross Íslands við skurðspítala Alþjóða Rauða krossins á Tælandi.

Pálína hefur síðan þá starfað fyrir Alþjóða Rauða krossinn og hefur gríðarlega reynslu af störfum á átakasvæðum bæði sem hjúkrunarfræðingur og sem stjórnandi aðgerða.  Hún hefur meðal annars unnið í Sómalíu, í Afganistan, Pakistan og Kenýa vegna borgarstríðs í Súdan.  Pálína starfaði á vegum utanríkisráðuneytisins við friðargæslustörf á hersjúkrahúsi NATO í Bosníu árið 1999.  Þá vann hún sem fulltrúi Alþjóða Rauða krossins að uppbyggingu nýs Rauða kross landsfélags í Austur Tímor.

28. maí 2009 : Rauði krossinn styður jafningjafræðslu í Malaví

Frá árinu 2002 hefur Rauði kross Íslands veitt Rauða krossinum í Malaví fjárhagslega og tæknilega aðstoð vegna alnæmisverkefnis í Nkalo í Chiradzulu héraði í suðurhluta landsins.

19. maí 2009 : Verkefni til að bæta matvælaöryggi í Malaví

Rauði kross Íslands hefur um nokkurra ára skeið stutt alnæmisverkefni malavíska Rauða krossins í Chiradzulu héraði í suðurhluta Malaví.

12. maí 2009 : Einstakur árangur í baráttunni við malaríu í Sambíu

Samkvæmt nýjum upplýsingum frá Alþjóðaheilbrigðisstofnuninni (WHO) hefur dauðsföllum af völdum malaríu fækkað um 66% í Sambíu.

6. maí 2009 : Íslenskur sendifulltrúi Rauða krossins á leið til Íraks

Valgerður Grímsdóttir, hjúkrunarfræðingur, heldur til Íraks þann 7. maí á vegum Rauða kross Íslands til að starfa fyrir Alþjóða Rauða krossinn. Valgerður verður staðsett í borginni Najaf, sem er um 160 km suður af Bagdad. 

Valgerður mun vinna við sjúkrahúsið í borginni, einkum við þjálfun innlendra heilbrigðisstarfsmanna og við eflingu bráðaþjónustu þar. Valgerður hefur tvisvar áður unnið sem sendifulltrúi fyrir Rauða kross Íslands - í bæði skiptin í Pakistan: árið 1996 í borginni Quetta og svo í Kasmírhéraði árið 2005 vegna jarðskjálfta sem grönduðu um 80.000 manns.

4. maí 2009 : Tveir íslenskir sendifulltrúar taka þátt í hjálparstarfi vegna flóða í Namibíu

Rúmlega hálf milljón manns í Namibíu og Angóla hefur orðið fyrir miklu tjóni vegna mestu flóða sem orðið hafa í Sambesí fljóti í fjörutíu ár. Þúsundir hafa neyðst til að yfirgefa heimili sín og hafast nú við í búðum þar sem mikil hætta er á sjúkdómum. Sex vikur eru liðnar frá því að flóðin hófust og um það bil 54.000 manns bíða þess enn að geta snúið aftur heim til sín.

Tveir sendifulltrúar frá Rauða krossi Íslands, þau Baldur Steinn Helgason og Huld Ingimarsdóttir, taka þátt í hjálparstarfinu. Þau hafa umsjón með flutningi á bílum og neyðargögnum frá Harare til neyðaraðstoðarteymis breska Rauða krossins í Caprivi-héraði í Namibíu. Hjálpargögnin eru ætluð um 12,000 fórnarlömbum flóðanna í fimm búðum.

22. apr. 2009 : Mestu flóð í sunnanverðri Afríku í 50 ár

Frá því í febrúar 2009 hefur úrkoma verið langt yfir meðallagi í sunnanverðri Afríku. Namibía og Angóla hafa þurft að þola mestu flóð í 50 ár. Í Angóla og Namibíu hefur yfir hálf milljón manna orðið fyrir skakkaföllum vegna flóðanna, um hundrað og tuttugu manns látið lífið og þúsundir fjölskyldna hafa þurft að yfirgefa heimili sín.

Til að styðja flóðaaðgerð Rauða krossins mun íslenskur sendifulltrúi, Baldur Steinn Helgason starfa í tvo mánuði á svæðisskrifstofu Alþjóða Rauða krossins í sunnanverðri Afríku og stjórna þar innkaupum og flutningum neyðarbirgða vegna flóðaaðgerða á svæðinu. Að auki er hluti starfsins fólginn í því að bæta vinnuferli í birgðastjórnun og innkaupum hjá Rauða krossinum í sunnanverðri Afríku.

19. feb. 2009 : Við hættum ekki að hjálpa

Störf íslenskra sendifulltrúa Rauða krossins um þessar mundir endurspegla á vissan hátt stöðu mannúðarmála í heiminum.

13. feb. 2009 : Kólerufaraldurinn blossar upp meðan neyðarsjóðir þverra -Hildur Magnúsdóttir er hreykin af því að vera hjúkrunarfræðingur í Simbabve

Kóleran í Simbabve er hvergi nærri á undanhaldi. Alþjóða heilbrigðisstofnunin (WHO) áætlar nú að yfir 100.000 manns muni veikjast áður en að tilfellum fari að fækka og að kóleran muni geysa að minnsta kosti í þrjá mánuði í viðbót.

27. jan. 2009 : Ómetanlegt starf fer fram á kólerumiðstöðvum Rauða krossins í Simbabve

Hjúkrunarfræðingarnir Hildur Magnúsdóttir og Maríanna Csillaq vinna sem sendifulltrúar Rauða krossins í Zimbabwe þar sem þær taka þátt í neyðaraðgerðum Rauða krossins vegna kólerufaraldurs í landinu.

13. jan. 2009 : Tveir sendifulltrúar Rauða krossins í neyðarteymum vegna kóleru í Simbabve

Hjúkrunarfræðingarnir Hildur Magnúsdóttir og Maríanna Csillaq halda til Zimbabwe í dag og á morgun til að taka þátt í neyðaraðgerðum Rauða krossins vegna kólerufaraldurs í landinu. Þær munu starfa með neyðarteymum norska og finnska Rauða krossins.

Hildur og Maríanna verða 4-5 vikur í Zimbabwe. Kólerufaraldur hefur geisað í landinu síðan í byrjun desember og hafa um 600 látist, en talið er að um 13.000 landsmenn hafi smitast af sjúkdómnum. Hlutverk þeirra er að ferðast um þéttbýli og sveitir í mið- og austurhluta landsins, greina kólerutilfelli og vinna að forvörnum með þjálfun heilbrigðisstarfsfólks og sjálfboðaliða Rauða krossins í Zimbabwe.

28. nóv. 2008 : Öryggisfulltrúi á vettvangi

Karl Sæberg Júlíusson er starfsmaður Rauða kross Íslands en vinnur á vegum Alþjóðasambands Rauða krossins í Genf í Sviss. Í þessari grein lýsir hann störfum sínum sem öryggisfulltrúi Alþjóðasambandsins.

12. mar. 2008 : „Erfitt en áhugavert"

Samnorrænt sendifulltrúanámskeið er haldið í Munaðarnesi þessa vikuna. 25 þátttakendur frá Norðurlöndunum og Póllandi taka þátt í námskeiðinu, þar af níu á vegum Rauða kross Íslands.

Á námskeiðinu læra tilvonandi sendifulltrúar um grundvallarmarkmið og tilgang Rauða kross hreyfingarinnar, sögu hennar og um Rauða kross merkið. Þeir kynnast starfi landsfélaga, Alþjóðasambandsins og Alþjóðaráðs Rauða krossins. Markmiðið með námskeiðinu er að gera tilvonandi sendifulltrúa sem best í stakk búna til að sinna hjálparstarfi á vettvangi vegna neyðarástands í kjölfar náttúruhamfara eða vegna stríðsátaka en líka til að starfa að langtíma þróunarsamvinnu með systurlandsfélögum. Þeir fá fræðslu um heilsufarsvandamál sem upp geta komið, um öryggismál og um daglegt líf sendifulltrúa á vettvangi.

28. jan. 2008 : Neyðarsjúkrahús Rauða krossins – starf fyrir þig?

Hildur Magnúsdóttir er hjúkrunarfræðingur á Landspítala háskólasjúkrahúsi og hefur unnið sem sendifulltrúi fyrir Rauða krossins í átta löndum, síðast í Pakistan eftir jarðskjálftann í október 2005. Greinin birtist í Curator blaði hjúkrunarfræðinga.

2. jan. 2008 : Spennuástand í kjölfar forsetakosninga í Kenýa

Mikil spenna ríkir í Kenýa í kjölfar forsetakosninganna í landinu. Að sögn Ómars Valdimarssonar, sendifulltrúa Rauða kross Íslands sem dvelur í Naíróbí ásamt fjölskyldu sinni, er þó allt með kyrrum kjörum í höfuðborginni eins og er. 

Óttast er að óeirðir kunni að brjótast aftur út fimmtudaginn 3. janúar en þá mun Raila Odinga sem laut í lægri haldi fyrir Mwai Kibaki forseta efna til útifundar í Naíróbí ásamt stuðningsmönnum sínum.

Að sögn Ómars eru allar verslanir lokaðar og fáir á ferli í borginni. Starfsmenn Alþjóða Rauða krossins í Kenýa hafa hægt um sig en eru í viðbragðsstöðu ef ástandið í landinu versnar.

19. nóv. 2007 : Fjárskortur hamlar blóðsöfnun Rauða krossins í Mongólíu

Sjálfboðaliðar Rauða krossins í Mongólíu vinna ötullega að blóðsöfnun og gengur hún langbest meðal nemenda í skóla einum í Ulaanbaatar. Greinin er eftir Francis Markus hjá Alþjóða Rauða krossinum í Mongólíu.

16. okt. 2007 : Harður vetur í vændum í Mongólíu eftir þurrkasumar

Rannsóknir benda til þess að harður vetur og vor kunni að fylgja í kjölfar þurrkasumars í Mongólíu. Rauði krossinn bregst við þessum erfiðleikum með ýmsum hætti.

1. okt. 2007 : Íslenskur sendifulltrúi tekur þátt í kennslu fyrir hermenn í Búrúndí

Hrafnhildur Sverrisdóttir starfar sem sendifulltrúi í sendinefnd Alþjóðaráðs Rauða krossins í Búrúndi þar sem hún starfar að vernd þeirra sem ekki taka þátt í stríðsátökum.

13. sep. 2007 : Blóðgjöf og heyöflun helstu áhersluverkefni í Mongólíu

Mongólía er víðfemt og strjálbýlt land sem liggur milli Rússlands í norðri og Kína í suðri. Landið er sjöunda stærsta land heims eða um 1.56 milljón ferkílómetrar. Íbúar þess eru um 2,5 milljónir.

3. júl. 2007 : Sólveig Þorvaldsdóttir til neyðarstarfa í Pakistan

Sólveig Þorvaldsdóttir jarðskjálftaverkfræðingur hélt til Pakistan í dag til neyðarstarfa á vegum Rauða kross Íslands vegna flóða í suðurhluta landsins.

7. jún. 2007 : Við öðlumst þekkingu og færni sem nýtist líka þegar við förum út í samfélagið aftur

Rauði krossinn fræðir fanga í Mongólíu um alnæmi og önnur heilbrigðismál ásamt því að aðstoða þá við að aðlagast lífinu utan fangelsisveggjanna eftir afplánun refsingar.

14. maí 2007 : Að haga sér í samræmi við aðstæður

Öryggis- og streitustjórnunarnámskeið var haldið fyrir Veraldarvakt Rauða krossins í Bláfjöllum helgina 4. - 6. maí. 19 þátttakendur sóttu námskeiðið en markmið þess var að undirbúa sendifulltrúa fyrir störf á vettvangi.

14. maí 2007 : Sjálfboðaliðar aðstoða þá sem eiga um sárt að binda vegna sprenginga í Mapútó

Í Malhazine-hverfinu í Mapútó ríkir örvænting og sorg. Þann 22. mars barst fjöldi sprengna á úthverfi Maputo frá vopnabúri mósambíska hersins með þeim afleiðingum að yfir 100 féllu og 500 slösuðust.

30. apr. 2007 : Hólmfríður Garðarsdóttir sendifulltrúi tekur þátt í uppbyggingarstarfinu eftir hamfarirnar í Mósambík

Hólmfríður Garðarsdóttir hjúkrunarfræðingur og ljósmóðir heldur til starfa sem sendifulltrúi Rauða krossins í Mósambík 2. maí. Hólmfríður mun næstu sex mánuði hafa yfirumsjón með og starfa að samhæfingu verkefna á sviði lýðheilsu og heilsugæslu á vegum Alþjóðasambands Rauða krossins og Rauða hálfmánans (IFRC) vegna neyðarástands sem skapaðist í kjölfar flóða og fellibylja í landinu í febrúar síðastliðinn. Starfið er þáttur í uppbyggingarstarfi í framhaldi af neyðaraðstoð sem veitt var strax eftir hamfarirnar.

Hólmfríður mun starfa með landsfélagi Rauða krossins í Mósambík í náinni samvinnu við þarlend heilbrigðisyfirvöld að skipulagningu verkefna á sviði heilsugæslu, skyndihjálpar og neyðarviðbragða. Nína Helgadóttir verkefnisstjóri Rauða kross Íslands í sunnanverðri Afríku, sem er með aðsetur í Mósambík, hefur einnig tekið þátt í samhæfingu hjálparstarfsins. Rauði kross Íslands hefur lagt þrjár milljónir króna til viðbótar við þriggja milljóna króna framlag ríkisstjórnar Íslands til að styðja við starf mósambíska Rauða krossins vegna hamfaranna.

20. mar. 2007 : Mongólía í kulda og sól

Þór er sendifulltrúi Rauða krossins í Mongólíu og gegnir starfi yfirmanns Alþjóðasambands Rauða krossins og Rauða hálfmánans (IFRC).

20. feb. 2007 : Á leið til hjálparstarfa í Búrúndí

Hrafnhildur Sverrisdóttir er á leið til Búrúndí til starfa á vegum Rauða krossins. Starf hennar felur í sér heimsóknir í fangelsi, leitarþjónustu og kynningu á alþjóða mannúðarlögum í samvinnu við Rauða krossinn í Búrúndí.

4. des. 2006 : Sólveig Þorvaldsdóttir til neyðarstarfa í Filippseyjum á vegum Rauða kross Íslands

Sólveig Þorvaldsdóttir heldur til Filippseyja í dag til neyðarstarfa á vegum Rauða krossins vegna fellibylsins Durians sem gekk yfir landið aðfaranótt föstudagsins 30. nóvember. Óttast er að allt að eitt þúsund manns hafi farist þegar aurskriður féllu á fjölda bæja í kjölfar úrfellis sem fylgdi fellibylnum. Talið er að um 40.000 manns hafi misst heimili sín þegar veðurofsinn gekk yfir miðbik eyjaklasans.

Sólveig er ein af níu manna neyðarteymi Alþjóðasambands Rauða krossins sem heldur utan í dag til að aðstoða filippseyska Rauða krossinn við neyðaraðstoð. Sjálfboðaliðar Rauða krossins hafa verið að störfum á hamfarasvæðunum frá því að hörmungarnar gengu yfir, og hafa þrjú neyðarteymi filippseyska Rauða krossins þegar hafið dreifingu hjálpargagna til íbúa á svæðinu.