Tveir sendifulltrúar Rauða krossins til starfa í Írak

30. ágú. 2011

Tveir sendifulltrúar Rauða kross Íslands, Áslaug Arnoldsdóttir og Magna Björk Ólafsdóttir hjúkrunarfræðingar, munu halda til Íraks þann 1. september til starfa með Alþjóða Rauða krossinum.

Áslaug mun dvelja í 9 mánuði í Írak og verður starf hennar fólgið í heimsóknum í fangelsi, sjúkrahús og á geðsjúkrahús í Bagdad þar sem unnið er að því að bæta aðbúnað vistmanna.  Áslaug mun einnig sjá um heilbrigðismál starfsmanna Alþjóða Rauða krossins í borginni.

Áslaug er einn reyndasti sendifulltrúi Rauða kross Íslands og hefur áralanga reynslu af störfum á átakasvæðum. Hún fór fyrst sem sendifulltrúi Rauða krossins árið 1996 þar sem hún starfaði á sjúkrahúsi Alþjóða Rauða krossins í Suður-Súdan og hefur síðan unnið meðal annars í Georgíu, Írak, Líbanon, Eþíópíu, Úganda, Pakistan og á Haítí. Nú síðast var Áslaug fengin til starfa í Líbíu þar sem hún vann sem hjúkrunarfræðingur hjá Alþjóða Rauða krossinum nú í sumar vegna átakanna sem enn standa yfir í landinu.

Magna Björk mun starfa í 3 mánuði með Alþjóða Rauða krossinum í borginni Najaf í Írak. Hún mun sjá um þjálfun lækna, hjúkrunarfræðinga og sjúkraflutningamanna á gjörgæsludeildum í Najaf.  Þetta er í annað sinn sem Magna starfar sem sendifulltrúi Rauða kross Íslands, en hún vann í tjaldsjúkrahúsi Rauða krossins eftir jarðskjálftana miklu á Haítí árið 2010.

Viðtal birtist við Áslaugu og Mögnu á mbl.is.