Ómar vinnur að nýjum heilsuverndarverkefnum með íbúum í Malaví

20. mar. 2013

Ómar Valdimarsson sendifulltrúi Rauða krossins á Íslandi hefur hafið störf í Malaví. Ómar tekur þátt í að hrinda af stað nýju þriggja ára verkefni í Malaví þar sem unnið er að uppbyggingu heilsuverndar samkvæmt óskum íbúa á staðnum eftir víðtækt samráðsferli.

Þetta er ný nálgun Rauða krossins þar sem reynt er að koma með heildstæða lausn á vanda um níu þúsund fjölskyldna (um 45 þúsund manns) sem búa í Mangochi héraði við Malaví vatn.  Unnið verður meðal annars að því að tryggja vatnsöflun á svæðinu, fæðuöryggi fólksins og koma í veg fyrir algenga smitsjúkdóma sem stafa af ónógri hreinlætisaðstöðu.  

Sérstök áhersla verður einnig lögð á félagslegan stuðning við stúlkur og ungar konur, stuðning við ungar mæður með baráttu gegn miklum ungbarnadauða, vörnum gegn malaríu, stuðningi við munaðarlaus börn og uppbyggingu Rauðakrossdeildarinnar í héraðinu. Þá verður unnið að ýmsum forvörnum svo sem HIV-fræðslu og fræðslu um kynlíf, getnaðarvarnir og barneignir. Þróunarsamvinnustofnun Íslands og utanríkisráðuneytið styrkja verkefnið einnig fjárhagslega.

Rauði krossinn á Íslandi hefur unnið að alnæmisverkefnum og uppbyggingu barnaheimila með Rauða krossinum í Malaví frá árinu 2002. Ómar hefur unnið fyrir Rauða krossinn í hálfan annan áratug, lengst af í Suðaustur-Asíu en einnig í Afríku. Hann var forstöðumaður upplýsingadeilda Alþjóðasambands Rauða krossins og Rauða hálfmánans í Suðaustur-Asíu og austanverðri Afríku; vann að innri uppbyggingu og eflingu Rauðakrossdeilda í Indónesíu og sinnti ýmsum upplýsinga- og fjölmiðlunarverkefnum í Indlandi, Íran, Kyrrahafi, Papúa-Nýju Gíneu, sunnanverðri Afríku og víðar.