Sendifulltrúi Rauða krossins á Íslandi á leið til Filippseyja

16. nóv. 2013

Þrettán alþjóðlegar neyðarsveitir Rauða krossins hafa verið kallaðar til hjálparstarfa í kjölfar fellibylsins á Filippseyjum. Íslenskur sendifulltrúi verður í hópi fyrstu alþjóðlegu hjálparstarfsmanna á vettvangi, Orri Gunnarsson verkfræðingur. Þetta er fyrsta neyðarverkefni hans fyrir Rauða krossinn á Íslandi.

Orri verður í hópi neyðarsveitar sem mun setja upp færanlega heilbrigðisþjónustu á eyjunni Samar.  
 
Sjálfboðaliðar Rauða krossins á Filippseyjum hafa unnið sleitulaust að björgun og aðhlynningu slasaðra frá því fellibylurinn reið yfir landið síðasta föstudag. Rauði krossinn hefur einnig unnið að dreifingu hjálpargagna og við að koma fólki í skjól frá fyrsta degi.  

Rauði krossinn hvetur fólk til að hringja í söfnunarsíma Rauða krossins 904 1500, 904 2500 og 904 5500 og leggja hjálparstarfinu lið. Þá bætist upphæð sem nemur síðustu 4 tölunum við næsta símreikning. Einnig er hægt að borga með kreditkorti á netinu á raudikrossinn.is eða leggja inn á reikning 0342-26-12, kt. 530269-2649.