Skyndihjálparmaður ársins - tilnefningar óskast

5. jan. 2011

Veist þú um einhvern sem með snarræði sínu og réttum viðbrögðum hefur bjargað mannslífi á árinu 2010?  Ef svo er - sendu okkur ábendingu.

Tilnefningar þurfa að berast Rauða krossi Íslands eigi síðar en þann 15. janúar 2011.

Á hverju ári velur Rauði krossinn „Skyndihjálparmann ársins“. Þá er einstaklingi sem hefur á árinu veitt skyndihjálp á eftirtektarverðan hátt afhent viðurkenning við hátíðlega athöfn. Tilgangurinn með tilnefningunni er að vekja athygli almennings á mikilvægi skyndihjálpar og hvetja sem flesta til að vera undir það búnir að veita hjálp á vettvangi slysa og veikinda. 

Eftirfarandi reglur gilda um tilnefningar

  • Skyndihjálparmaður ársins þarf að hafa bjargað mannslífi.
  • Skyndihjálparmaður ársins þarf að hafa sýnt eftirtektaverða kunnáttu og færni í almennri skyndihjálp. Hjálpin sem veitt var verður að hafa leitt til betri líðan eða stöðugleika á ástandi hins slasaða eða sjúka frá þeim tíma sem slysið varð þar til fagfólk kom á vettvang.
  • Skyndihjálparmaður ársins má ekki vera menntaður hjúkrunarfræðingur, læknir, sjúkraflutn­ingamaður, bráðatæknir eða sjúkraliði.
  • Skyndihjálparmaður ársins má ekki hafa unnið afrekið í starfi sínu innan öryggis- og bráðaþjónustu, það á til dæmis við um björgunarsveitarfólk, lögregluþjóna, öryggis- og sundlaugaverði.

Dómnefnd um val á „Skyndihjálparmanni ársins” er skipuð fulltrúum frá: Rauða krossi Íslands, Slysavarnafélaginu Landsbjörg, Neyðarlínunni, Landspítala háskólasjúkrahúsi, Almannavarna­deild ríkislögreglustjóra og Landssambandi slökkviliðs- og sjúkraflutningamanna. Hver aðili skipar einn fulltrúa nema Rauði krossinn sem skipar tvo.

„Skyndihjálparmaður ársins” fær meðal annars viðurkenningaskjal, skyndihjálparbók og ávísun á skyndihjálparnámskeið allt að 16 klst.

Athugið: Tilnefningar verða bornar undir vitni að atburðinum.