Endurlífgun - sýning og kennsla í Kjarnanum Mosfellsbæ

11. feb. 2013

Í tilefni af 112-deginum verða sjálfboðaliðar í Skyndihjálparhóp Rauða krossins með sýningu og kennslu í endurlífgun í Kjarnanum Mosfellsbæ mánudaginn 11. febrúar kl. 17:30-18:30. Allir geta lent í því að koma á vettvang þegar einhver slasast eða veikist alvarlega og því mikilvægt að vita hvernig á að bregðast við slíkum aðstæðum og geta veitt fyrstu aðstoð. Mosfellingar eru hvattir til að líta við og fá upplýsingar og leiðsögn í endurlífgun frá skyndihjálparleiðbeinendum Rauða krossins. Allir fá tækifæri til æfa blástur og hnoð.

112-dagurinn verður haldinn um allt land laugardaginn 11. febrúar. Markmið dagsins er að kynna neyðarnúmerið og þá margvíslegu aðstoð sem almenningur hefur aðgang að í gegnum það. Að þessu sinni verður áherslan á getu almennings til þess að bregðast við á vettvangi alvarlegra slysa og veikinda, að fólk hringi í 112 og veiti fyrstu aðstoð áður en sérhæfð aðstoð berst. 112-dagurinn er haldinn víða um Evrópu á sama tíma en 112 er samræmt neyðarnúmer í löndum Evrópusambandsins.