Frábærar viðtökur á skyndihjálparappi Rauðakrossins

10. jan. 2014

Skyndihjálparapp Rauða krossins hefur fengið frábærar viðtökur síðan það fór í loftið fyrir nákvæmlega einum mánuði. Alls hafa nú um 7500 manns sótt forritið, en það er tæplega 2% þjóðarinnar. Til viðmiðunar má geta þess að um 1% Bandaríkjamanna hefur sótt appið á síðu ameríska Rauða krossins á heilu ári.

Hægt er að nálgast appið á vefsíðu Rauða krossins skyndihjalp.is og er það ókeypis. Í appinu má nálgast allar helstu upplýsingar um skyndihjálp settar fram á afar aðgengilegan hátt. Þar er hægt að fræðast um skyndihjálp, prófa þekkingu sína í fræðunum á gagnvirkan hátt, skoða myndbönd, og ef um neyðarástand er að ræða er hægt að ná beinu símasambandi við Neyðarlínuna.

Ólíkt flestum öðrum smáforritum er appinu ætlað að gera notendur þess hæfari til að bjarga mannslífum á örlagastundu. Þetta er gert bæði með fræðslu og svo einföldum leiðbeiningum um hvernig fólk eigi að bregðast við og beita skyndihjálp ef fólk veikist skyndilega eða slys ber að höndum.

Rauði krossinn bindur miklar vonir við að sem flestir landsmenn keppist við að setja appið inn á síma sína eða spjaldtölvur á afmælisári félagsins, en í desember eru 90 ár eru frá því það var stofnað. Rauði krossinn hefur hrundið af stað skyndihjálparátaki á afmælisárinu, en skyndihjálpin er einmitt elsta og þekktasta verkefni Rauða krossins.

Markmið átaksins er að byggja upp kunnáttu og færni almennings í skyndihjálp, þekkingu sem situr eftir með þjóðinni, og auka þannig líkur á að fólk hafi grunnþekkingu á því hvernig hægt sé að bjarga mannslífi á neyðarstundu. Rauði krossinn mun standa að kynningarherferð út árið sem afmælisgjöf félagsins til þjóðarinnar þar sem áhersla verður lögð á að kenna fólki að beita endurlífgun, losa aðskotahlut úr hálsi, bregðast við bruna og blæðingu.

Kynning á appinu er fyrsti liðurinn í átakinu. Appið er einstaklega handhægt, og er upplagt að nýta annars dauðan tíma meðan beðið er í röð á útsölunum, setið í strætó eða í kaffitímanum og frímínútum til að kíkja á það, læra, og rifja upp skyndihjálpina.

Síminn styður útgáfu skyndihjálparappsins, og rétt að ítreka að niðurhalning er ókeypis .