Námskeið í sérhæfðri endurlífgun II í Palestínu

13. des. 2011

Sjúkir og slasaðir í Palestínu eiga oft líf sitt undir sjúkraflutningafólki enda tekur oft langan tíma að ná á næstu sjúkrastöð þar sem vegatálmar hernámsliðsins eru víða. Það getur því skipt sköpum að sjúkraflutningafólk sé vel menntað.

Sjúkraflutningaskólinn í samvinnu við Rauða kross Íslands skipulagði og kenndi á námskeiðum í sérhæfðri endurlífgun II í Palestínu í nóvember sl. Þessi námskeið eru hluti af stóru samvinnuverkefni Rauða kross Ísland og palestínska Rauða hálfmánans (PRCS) sem felst í því að tryggja þekkingu og hæfni í endurlífgun hjá heilbrigðisstarfsfólki í Palestínu. Sjúkraflutningaskólanum var falið að skipuleggja og framkvæma þessi námskeið og er það gert með samþykki Endurlífgunarráðs Íslands sem hefur umsjón með námskeiðum í sérhæfðri endurlífgun á vegum evrópska Endurlífgunarráðsins.

Haldin voru tvö námskeið á tímabilinu 21. – 24. nóvember og var samtals 21 nemandi á námskeiðinu. Upphaflega voru fleiri skráðir á námskeiðin og þar á meðal aðilar frá Gaza ströndinni en því miður fengust ekki tilskilin leyfi í tæka tíð þannig að þeir gátu ekki farið út af Gaza svæðinu og nemendum fækkaði sem því nam. Leiðbeinendur á námskeiðunum voru: Hildigunnur Svavarsdóttir, skólastjóri Sjúkraflutningaskólans, Freddy Lippert, læknir frá Danmörku auk bráðatæknanna Lárusar Petersen, Stefnis Snorrasonar og Sveinbjörns Dúasonar.

Námskeiðið fór fram í Ramallah, í Palestínu sem er í 14 km fjarlægð frá Jerúsalem og var öll aðstaða til fyrirmyndar, hvort sem um var að ræða kennsluaðstöðuna eða annað. Námskeiðið var kennt samkvæmt stöðlum Endurlífgunarráðsins og gekk það í alla staði mjög vel. Nemendur voru mjög ánægðir, þrátt fyrir tungumálaerfiðleika á stundum, og verulega þakklátir fyrir þetta tækifæri að fá að taka þátt í slíku námskeiði. Kennarahópurinn þurfti að sjálfsögðu að taka tillit til trúarlegra þarfa nemendanna og aðlagaði stundaskrá námskeiðsins samkvæmt því.

Næstu skref í þessu samvinnuverkefni felast í því að skipuleggja kennaranámskeið í Palestínu fyrir væntanleg kennaraefni sem hafa lokið námskeiði í Sérhæfðri endurlífgun II en það er eitt af stóru markmiðum verkefnisins að PRCS geti sjálft staðið fyrir þessum námskeiðum í endurlífgun og séð um að mennta sitt fólk.