Getur starfsfólk þitt bjargað mannslífum? – Námskeið fyrir fyrirtæki

23. jan. 2012

Þjálfun í skyndihjálp getur gert þér og þínu samstarfsfólki kleift að bjarga mannslífi þegar sekúndur og mínútur skilja að á milli lífs og dauða. Fjöldi fyrirtækja svo sem bankastofnanir, verkfræðistofur og hótel, auk sveitarfélaga, skóla og safna, sendir starfsfólk sitt reglulega á skyndihjálparnámskeið hjá Rauða krossinum.

Starfsfólk fyrirtækja sem hefur farið á skyndihjálparnámskeið er betur í stakk búið til að bregðast rétt við ef samstarfsfólk eða viðskiptavinir lenda í slysi, hjartastoppi eða flogakasti á vinnustað. Reynslan sýnir að fólk sem kann grundvallaratriði í skyndihjálp getur bjargað mannslífi í stað þess að horfa ráðalaust á.

Vinsælasta námskeið Rauða krossins fyrir fyrirtæki er fjögurra klukkustunda skyndihjálparnámskeið. Á því skyndihjálparnámskeiði læra þátttakendur grundvallaratriði í skyndihjálp og endurlífgun. Markmiðið er að þátttakendur verði hæfir til að veita fyrstu hjálp á slysstað.

Námskeiðin má sníða að mismunandi þörfum hópa og fyrirtækja. Algengast er að námskeiðin séu haldin á vinnustað á tíma sem hentar best á hverjum stað. Starfsfólk Rauða krossins mætir þá á viðkomandi vinnustað með allan nauðsynlegan búnað og fræðslugögn. Þátttakendur fá viðurkenningu frá Rauða krossi Íslands og Velferðarráðuneytinu. Mælt er með endurmenntun annað hvert ár.

Allir ættu að fara á skyndihjálparnámskeið og viðhalda þekkingunni reglulega, því rétt viðbrögð á ögurstundu geta bjargað mannslífi. Fáðu upplýsingar um skyndihjálparnámskeið núna ! Sendu okkur fyrirspurn á gulla@redcross.is eða hringdu í síma 570 4000.