Öskuhreinsun undir Eyjafjöllum – hlé meðan öskufall stendur yfir

3. maí 2010

Þriðji hópur sjálfboðaliða Rauða krossins kom til Reykjavíkur laust eftir fimm á föstudaginn eftir að hafa verið þar við öskuhreinsun yfir daginn. Hópinn skipaði 15 manns sem skipt var á þrjá bæi. 

Hreinsunarstarfið gekk vel til að byrja með en því miður fór ösku að rigna yfir þegar líða tók á daginn. Þrátt fyrir það var ánægja með dagsverkið og margir til í að endurtaka leikinn.
 
Þeim sjálfboðaliðum sem lagt hafa hönd á plóginn við hreinsunarstarfið undir Eyjafjöllum er þakkað kærlega fyrir flott og mikilvægt starf. Þó svo að aska fari yfir svæðið aftur þá skiptir starfið mjög miklu máli fyrir bændur á svæðinu. Eins og staðan er í dag þá hefur verið gert hlé á hreinsun en mun það hefjast að nýju þegar aðstæður leyfa.   

Þeir sjálfboðaliðar sem hafa áhuga á starfinu eru hvattir til að fylgjast með á heimasíðu Rauða krossins.