Rauði krossinn fræðir börn og ungmenni í kjölfar jarðskjálftans á Suðurlandi

27. okt. 2008

Rauði kross Íslands vinnur nú að fræðslu fyrir börn og ungmenni í kjölfar jarðskjálftans á Suðurlandi ásamt bæjar- og skólayfirvöldum í Árborg, Ölfusi og Hveragerði. Fræðslan fyrir börnin hefst þriðjudaginn 28. október og er fjölmiðlum boðið að kynna sér verkefnið í Sunnulækjarskóla á Selfossi kl. 11:00.

Kiwanishreyfingin styrkir verkefnið, og munu fulltrúar hennar ásamt Don Cannady, forseta Alþjóða hreyfingar Kiwanis afhenda Árnesingadeild og Hveragerðisdeild Rauða krossins eina milljón króna við þetta tækifæri. Sérfræðingar Rauða krossins í áfallahjálp og sálrænum stuðningi veita viðtöl ásamt skólayfirvöldum Sunnulækjarskóla.

Fræðslan fer fram í öllum grunnskólum á svæðinu: Vallaskóla, Sunnulækjarskóla, Barnaskóla Eyrarbakka og Stokkseyrar og grunnskólunum í Þorlákshöfn og Hveragerði í samstarfi við kennara og stjórnendur skólanna. Einnig verður fræðsla fyrir framhaldsskólanema í Fjölbrautaskólanum á Suðurlandi og boðið verður upp á sérstaka fræðslu fyrir starfsfólk allra leikskóla á svæðinu og dagforeldra. 

Markmið verkefnisins er að fræða börn og forsjáraðila þeirra um jarðskjálfta og afleiðingar þeirra, með sérstaka áherslu á sálrænan stuðning. Fræðslufundir fyrir foreldra og forráðamenn grunnskólabarna verða einnig haldnir í samstarfi við foreldrafélög skólanna.

Leiðbeinendur eru starfsmenn og sérfræðingar Rauða krossins í sálrænum stuðningi sem eru sérhæfðir í að veita sálrænan stuðning og aðstoða fólk við að komast yfir áfallastreitu í kjölfar hamfara. Oft tekur langan tíma að vinna úr áföllum eftir náttúruhamfarir og eru börn sérstaklega viðkvæm fyrir því þegar öryggi í umhverfi þeirra er ógnað.