Sálrænn stuðningur á skjálftasvæðunum

30. maí 2008

Viðbrögð við alvarlegum atburðum eru einstaklingsbundin. Þess vegna er mikilvægt að sýna öðrum umburðarlyndi, skilning  og svigrúm til að takast á við áfallið á sinn hátt. Gott er að vera vakandi fyrir þeim sem einangra sig eða líður illa.

Eftir alvarlegan atburð eins og jarðskjálfta eru börn mest hrædd við að atburðurinn gerist aftur. Að einhver meiðist eða deyi. Að vera aðskilin frá fjölskyldu eða stuðningsaðilum.

Mikilvægt er að börn og unglingar finni að fullorðna fólkið hafi stjórn í aðstæðum, sýni ró og haldi sömu reglu innan fjölskyldunnar og vanalega (t.d. svefntími, matartími, lesa bók fyrir svefninn, útivistarreglur). Jafnframt að börn og unglingar finni hlýju og stuðning innan fjölskyldu eða hjá stuðningsaðila. 

Þeir sem eiga um sárt að binda þurfa að huga að mikilvægum þörfum eins og að nærast, drekka vökva, huga að svefni og hvíld. Allir ættu að forðast að neyta áfengis eða vímuefna við þessar aðstæður þar sem það dregur verulega úr getu til að takast á við alvarlegan atburð sem þennan.

Besta áfallahjálpin til þeirra sem líður illa er að finna stuðning fjölskyldu og vina með því að styrkja og styðja þá sem líður illa. Það er gert með því að vera saman því nálægð er oft mikilvægari en mörg orð. Einnig er mikilvægt að börn hafi eitthvað fyrir stafni, í nærveru og með eftirliti fullorðinna.

Heppilegt er að nýta sér þá þjónustu samfélagsins sem einstaklingar og fjölskyldur hafa nýtt sér áður og hefur gefist vel.

Á skjálftasvæðum er frekari sálrænan stuðning að fá:

Selfoss: Þjónustumiðstöðinni Tryggvaskála þar sem Rauði krossinn er með aðsetur, prestum og einnig veita starfsmenn heilsugæslunnar aðstoð.

Hveragerði: Þjónustumiðstöðinni í húsi Rauða krossins, hjá heilsugæslustöðinni og sóknarpresti.

Einnig veitir félagsþjónusta sveitarfélaga stuðning eins og verið hefur.

Upplýsingasími Rauða krossins 1717 veitir upplýsingar um þjónustu Rauða krossins utan opnunartíma þjónustumiðstöðvanna og stuðning ef á þarf að halda.

Gagnlegar upplýsingar um sálrænan stuðning er að finna á vef Rauða krossins og almannavarna.