Rauði krossinn með áfallahjálp í skólum í Hveragerði

2. jún. 2008

Rauði krossinn er með fræðslu um áfallahjálp, og áfallastreitu barna og unglinga í kjölfar jarðskjálfta í dag fyrir starfsfólk skólanna í Hveragerði. Fræðsluerindin, sem haldin eru að beiðni bæjaryfirvalda, verða haldin í leikskólunum tveimur, grunnskólanum og vinnuskólanum.

„Börn bregðast oft öðruvísi við áföllum en hinir fullorðnu. Við verðum að hafa það í huga að þau eru börn en ekki litlir fullorðnir, og skynja umhverfið eins og þroski þeirra leyfir,” segir Jóhann Thoroddsen, verkefnisstjóri sálræns stuðnings hjá Rauða krossi Íslands. „Börn eru sérstaklega viðkvæm í þeim aðstæðum þegar þau upplifa að umhverfi þeirra sé óöruggt og þau vita ekki á hverju þau geta átt von. Þá geta rétt viðbrögð þeirra sem standa barninu næst skipt sköpum.”

Jóhann segir það sé gott og þarft framtak hjá bæjaryfirvöldum í Hveragerði að fræða þá sem vinna með börnum um hvernig áfallið getur brotist út með mismunandi hætti.  Rauði krossinn bendir aðstandendum einnig á bæklinginn Aðstoð við börn eftir áfall.

Rauða krossinn verður með fulltrúa sína næstu vikur í þjónustumiðstöðvunum í húsnæði Rauða krossins við Austurmörk í Hveragerði og í Tryggvaskála á Selfossi milli kl. 13:00-20:00. Áfallahjálparteymi Rauða krossins veitir viðtöl milli kl. 17:00-20:00 á þessum stöðum út þessa viku.

Fjölmargir hafa nýtt sér þjónustu Rauða krossins í kjölfar jarðskjálftanna á fimmtudaginn var. Áfallahjálparteymið hefur einnig hitt um 30-40 manns á dag í Hveragerði, á Selfossi og í nágrannabyggðum síðan þá.

Myndir frá vettvangi: