Grindavíkurdeild Rauða krossins fær viðurkenningu frá bæjarfélaginu

5. jan. 2012

Í tilefni af því að árið 2011 var ár SJÁLFBOÐALIÐANS ákvað bæjarstjórn Grindavíkur í lok árs 2011 að veita fjórum félagasamtökum viðurkenningu fyrir ómetanlegt og fórnfúst sjálfboðaliðastarf fyrir samfélagið í Grindavík á undanförnum árum. Auk Grindavíkurdeildar Rauða kross Íslands fengu Kvenfélag Grindavíkur, Slysavarnardeildin Þórkatla og Björgunarsveitin Þorbjörn slíka viðurkenningu. Afhending viðurkenninganna fór fram við kjör á íþróttamanni og íþróttakonu Grindavíkur í Hópsskóla á gamlársdag.

Framkvæmdastjórn Evrópusambandsins ákvað á fundi sínum í júní 2009 að árið 2011 yrði ár sjálfboðaliðans. Af þessu tilefni voru málefni sjálfboðaliða og sjálfboðaliðasamtaka í brennidepli hjá Evrópusambandinu á liðnu ári. Markmið ársins var að vinna að því að einfalda og bæta umhverfi fyrir sjálfboðaliða í Evrópu, styðja við og styrkja samtök sjálfboðaliða, auka gæði sjálfboðaliðastarfs, og auka vitund um sjálfboðið starf, gildi þess og mikilvægi.