• IMG_4528

Rauði krossinn í Dýrafirði

15. júl. 2014

Rauði krossinn í Dýrafirði er ein af sex deildum á Vestfjörðum sem vinna saman í deildaráði að fjölbreyttum verkefnum sem snúa að því að rjúfa félagslega einangrun fólks, neyðarvörnum og skyndihjálp. Deildin hefur aðsetur í húsnæði björgunarsveitarinnar og heldur fundi að jafnaði einu sinni í mánuði.

Meðal verkefna deildarinnar eru neyðarvarnir og er fjöldahjálparstöðin í húsnæði Grunnskólans á Þingeyri. Sjálfboðaliðar í neyðarvörnum fá þjálfun reglulega í samvinnu við aðrar deildir á svæðinu. Skyndihjálparnámskeið eru haldin reglulega á Þingeyri og einnig í samvinnu við aðrar deildir á svæðinu. Allir nemendur í 10. bekk fá skyndihjálparnámskeið á hverju ári og eru námskeiðin haldin í Holti í Önundarfirði þar sem nemendur frá Súðavík, Flateyri og Súgandafirði eru einnig þátttakendur.

Fatamóttaka er í björgunarsveitarhúsinu og eru fötin flutt í Fataflokkun. Prjónakvöld eru reglulega og hefur prjónlesið verið sent í ungbarnapakka til Hvíta Rússlands og í sölubúðir Rauða krossins.

Deildin fer á hverju ári í sumarferð með eldri borgurum og býður í sumarkaffi að Núpi í Dýrafirði.