Vestfirðingar halda svæðisfund

14. sep. 2007

Deildir Rauða krossins á Vestfjörðum héldu sinn árlega svæðisfund dagana 7. og 8. september í Heydal í Mjóafirði. Fulltrúar frá öllum deildum sátu fundinn sem hófst með kvöldverði og hópefli. Boðið var upp á barnagæslu og gátu því foreldrar komið með börnin. Stúlkurnar sem gættu barnanna höfðu að sjálfsögðu sótt námskeiðið börn og umhverfi á vegum Rauða krossins. 

Samþykkt var svæðisáætlun fyrir þau verkefni sem deildirnar vinna að í sameiningu. Undantekningalaust eru allar deildirnar þátttakendur í  sameiginlegum verkefnum svæðisins.

Mikil tilhlökkun var meðal fundarmanna að takast á við ný verkefni sem framundan eru á vetrardagskránni og sögðu það létt verk að virkja íbúa svæðisins með í að Byggja betra samfélag á Vestfjörðum. Formaður svæðisráðs var kosin Sigríður Magnúsdóttir formaður Önundarfjarðardeildar en allar deildir eiga fulltrúa í svæðisráði.

Boðið var upp á barnagæslu.