Heimsóknavinir Rauða krossins leita að gestgjöfum

24. okt. 2007

Á laugardag lauk námskeiði fyrir heimsóknavini sem var í boði allra deilda á Vestfjörðum. Sautján heimsóknavinir hafa bæst í hóp sjálfboðaliða Rauða krossins og margir þeirra sem sóttu námskeiðið sögðust vera að sækjast eftir vináttu og félagsskap um leið og þeir vilja láta gott af sér leiða.

Einn heimsóknavinur taldi það ávinning fyrir barnið sitt að fá að kynnast eldra fólki sem gæti komið í stað afa eða ömmu og hlakkaði því til að fá tækifæri til að heimsækja eldri borgara. Eldri borgarar búa oft yfir reynslu sem er verðmæt fyrir sjálfboðaliðana þannig að báðir hafa þess vegna eitthvað að gefa og þiggja.

Kynningarviku Rauða krossins lauk á sunnudagskvöld. Á Vestfjörðum hafa deildirnar kynnt starfið og safnað sjálfboðaliðum og hafa fjölmargir gefið sig fram og óskað eftir því að gerast sjálfboðaliðar. Að sögn Bryndísar Friðgeirsdóttur svæðisfulltrúa Rauða krossins og Hrefnu Magnúsdóttur formanns Ísafjarðardeildarinnar heldur skráning áfram og allir þeir sem vilja gerast sjálfboðaliðar geta gengið til liðs við Rauða krossins hvenær sem er. 

„Við hvetjum fólk til að láta okkur vita ef þeir vilja eignast heimsóknavin eða benda okkur á fólk sem gæti komið til greina að bjóða vini í heimsókn" segir Bryndís. Söfnun sjálfboðaliða stendur enn yfir og getur fólk skráð sig - allan ársins kring - á raudikrossinn.is og í síma 570 4000.