Hugur og hönd starfa saman!

9. nóv. 2010

Handverkshópurinn hjá Grundarfjarðardeild Rauða krossins hittist á föstudögum og vinnur ötullega við að sauma, prjóna og breyta eldri flíkum í nýjar. Í hópnum er fólk á öllum aldri sá elsti 86 ára. Nú er búið að taka afraksturinn saman og setja í ungbarnapakka sem sendir verða til Hvíta Rússlands.

Séu flíkurnar taldar lætur nærri að það sé ein flík frá hverjum íbúa bæjarfélagsins. Alls mun 61 barn fá sendingu frá Grundarfirði, með hugheilum óskum um heilsu og betra líf. Rauði krossinn þakkar sínu frábæra handverksfólki sem lagði á sig mikla vinnu við að útbúa fatnaðinn.

Veturnir eru firnakaldir í Hvíta-Rússlandi, frostið fer niður í -20°C og byrja hörkurnar í janúar. Pökkunum mun verða dreift til heimila fyrir munaðarlaus börn og einnig til stofnana fyrir veik og fötluð ungabörn. Einnig munu fátækar fjölskyldur með nýfædd börn, sérstaklega í afskekktum þorpum njóta góðs af vinnu þessa duglega og hugulsama fólks.