Konur skemmta sér

3. mar. 2008

Á laugardaginn var haldinn kvennafundur fyrir konur af íslenskum og erlendum uppruna í samstarfi Rauða krossins á Akranesi og Félags kvenna af erlendum uppruna. Paola Cardenas verkefnastjóri hjá Rauða krossi Íslands flutti erindi um ferlið sem hefst þegar tekin er ákvörðun um að flytja til nýs lands og Anna Lára Steindal framkvæmdastjóri Akranesdeildarinnar fjallaði um verkefni deildarinnar með innflytjendum.

Að framsögum loknum tók við skvísulegri skemmtun. Boðið var upp á kaffi og meðlæti, verslunin Bjarg á Akranesi gaf fjölbreyttar prufur af snyrtivörum og Pauline Mcharthy
 formaður SONI (Society of New Icelanders á Vesturlandi) kom með fulla tösku af naglalakki sem konur dunduðu sér við að prófa. Konur notuðu að sjálfsögðu tækifærið til þess að spjalla og kynnast.

Markmið fundarins var að efla tengslanet kvenna og stuðla að sameiginlegu félagslífi íslenskra og erlendra kvenna á Akranesi.  Kvennafundur af þessu tagi verður án efa haldinn aftur.