Þjóðahátíð

14. nóv. 2008

Laugardaginn 8. nóvember efndi Akranesdeildin, í samvinnu við SONI, til Þjóðahátíðar í annað sinn. Hátíðin er liður í Vökudögum, menningarhátíð á Akranesi, sem haldin er á Akranesi fyrstu helgina í nóvember ár hvert.

Það má með sanni segja að þjóðahátíðin hafi slegið í gegn á Akranesi og Skagamenn fjölmenntu í íþróttahúsið á Jaðarsbökkum þar sem hátíðin var haldin til þess að kynna sér menningu og hefðir nágranna sinna og vina af erlendum uppruna.

Íbúar á Akranesi eru frá ríflega tuttugu löndum og á annað hundrað manns af erlendum uppruna tók þátt í hátíðinni sem var hin veglegasta. Boðið var upp á fjölbreytt skemmtiatriði allan daginn, m.a. búlgarska þjóðdansa, blústónlist, íslensk, rússnesk, írsk og pólsk þjóðlög, philipínska dansa, palestínska dansa og gamanmál.

Á meðan hátíðin stóð yfir hékk jafnframt uppi í íþróttahúsinu sýningin Allt heimsins fólk – kynning á íbúum af erlendum uppruna.
Einsog fyrr segir tókst hátíðin mjög vel og stefnt er að því að endurtaka leikinn að ári.