Gjöf á móti

12. nóv. 2008

Fjórtán manns mættu á Vetrarmót Skákfélags Vinjar og Hróksins á mánudaginn. Tefldar voru sex umferðir með sjö mínútna umhugsunartíma.

Fyrir mótið færði Björn Sölvi Sigurjónsson Skáksambandi Íslands gjöf, sem Björn Þorfinnsson, forseti, tók við. Var það litgreint skákborð sem Björn Sölvi hefur unnið að undanfarin ár, stúdíur hans um reiti borðsins og tóna en eins og alkunna er sjá sumir og heyra í litum eða tónum, og vinna samkvæmt því.

Björn Sölvi hefur fengið löglegt einkaleyfi á borði þessu og í bréfi sem fylgdi gjöfinni eru nákvæmar útskýringar á útfrá hvaða hugmyndum unnið var að greiningunni.

Björn Sölvi var einn af betri skákmönnum landsins á árum áður. Eftir að hafa lítið látið fyrir sér fara lengi gekk hann til liðs við Skákfélag Vinjar og tók þátt í Íslandsmótinu í október með glæstum árangri. Hefur litlu gleymt og var efstur á Vetrarmótinu ásamt meisturunum Birni Þorfinnssyni og Róberti Harðarsyni sem var skákstjóri.

Voru þessir þrír í nokkrum sérflokki með fimm vinninga, þó forsetinn mætti teljast góður að hala inn heilum vinningi gegn Hauki Halldórssyni. Emil Ólafsson og Guðmundur Valdimar Guðmundsson voru með þrjá og hálfan en Haukur Halldórsson, Jón Birgir Einarsson, Árni Pétursson, Ingvar Sigurðsson og Arnar Valgeirsson náðu þremur. Aðrir komu í humátt þar á eftir.

Eftir fjórðu umferð var kaffi og skúffukaka, auk annars gotterís í boði fyrir lokaátökin. Allir þátttakendur fengu bókavinninga.

Skákfélag Vinjar og Hrókurinn munu standa fyrir jólamóti að Litla Hrauni, jólamóti milli geðdeilda að Kleppsspítala og að sjálfsögðu í Vin. En þó ekki fyrr en í desember! Nánar um það síðar.

Emil Ólafsson og Guilliom, franskur sjálfboðaliði í Vin, takast í hendur eftir skákina.