• Fataflokkun2_edited-1

Fataverkefni

Rauði krossinn úthlutar fatnaði til 1.500 einstaklinga á Íslandi á hverju ári. Skjólstæðingar Rauða krossins erlendis njóta einnig góðs af fataverkefninu. Sjálfboðaliðar á Íslandi útbúa  árlega mörg þúsund fatapakka með hlýjum fötum fyrir 0-16 ára börn og ungmenni sem sendir eru með öðrum fatnaði til Hvíta-Rússlands.

Fatasöfnun Rauða krossins er eitt mikilvægasta fjáröflunarverkefni Rauða krossins á Íslandi. Afrakstur ársins 2013 voru 100 milljónir króna. Hluti þessarar upphæðar fer til reksturs Hjálparsíma Rauða krossins 1717, hluti til verkefna deilda félagsins um land allt og hluti nýtist til hjálparstarfs erlendis.

Verslanir Rauða krossins gegna mikilvægu hlutverki í fjáröflun félagsins. Fyrsta búðin var opnuð árið 2000 á Hverfisgötu í Reykjavík en tveim árum síðar flutti hún starfsemina að Laugavegi 12 þar sem hún er enn. Verslanir á höfuðborgarsvæðinu eru fimm. Tvær á Laugaveginum, ein á Skólavörðustíg, ein í Mjóddinni og ein í Hafnarfirði. Einnig eru búðir á Akureyri, Húsavík, Borgarnesi, Eskifirði, Egilsstöðum, Stöðvarfirði og Hornafirði.

Á þriðja hundrað sjálfboðaliða starfa í búðunum og skila um 1.900 vinnustundum á ári. Reikna má með að framlag þeirra sé ekki undir 30 milljónum króna.

Fatasöfnun stendur og fellur með dyggum stuðningi Eimskipa – Flytjanda, Sorpu og þeirra hundruð sjálfboðaliða sem prjóna, sauma, flokka, pakka og standa vaktina í Rauðakrossbúðunum allan ársins hring.