• 396110_4977753200175_1495394022_n

Flóttafólk

 

 

 

Hér er að finna verkefni í þágu flóttafólks sem sjálfboðaliðar og starfsfólk Rauða krossins vinnur að. 

Ef þig langar til að vera með getur þú lagt inn umsókn hér. 

Ef þú veist hvaða verkefni þú hefur áhuga á, endilega taktu það fram í athugasemdum.

 

SÆKJA UM SEM SJÁLFBOÐALIÐI

Tölum saman


Í verkefninu Tölum saman hittast flóttafólk og Íslendingar til þess að æfa íslensku saman.

Flestir einstaklingar sem hér hljóta alþjóðlega vernd vilja bæta íslenskukunnáttu sína vegna þess að hún gerir þeim kleift að byggja upp sterk og varanleg tengsl við Íslendinga. Kunnáttan veitir þeim betra aðgengi að íslensku kerfi, að íslenskum vinnumarkaði og greiðir leið fólks til að sækja sér frekari menntun. Þú getur aðstoðað þessa einstaklinga með því að verða tungumálavinur.

Tungumálavinir eru sjálfboðaliðar í verkefninu Tölum saman. Sjálfboðaliðar hitta einstaklinga eða pör sem nýlega hafa hlotið alþjóðlega vernd með það að markmiði að æfa íslensku. Hægt er að notast við óformlegt spjall eða aðrar æfingar sem henta hverju sinni. Það má til dæmis leggja áherslu á orðaforða sem tilheyrir ákveðinni iðn eða menntun eða orðaforða sem auðveldar samskipti foreldra við skólakerfið. Sjálfboðaliðar geta einnig stutt við þau sem eru í formlegu íslenskunámi með því að aðstoða við heimanám. Þetta eru bara hugmyndir að þeim fjöldamörgu leiðum sem hægt er að fara þegar æfa á íslensku.

Hlutverk sjálfboðaliðans er ekki að vera kennari. Sjálfboðaliðarnir eru venjulegir Íslendingar, eins og þú, sem hafa áhuga á að deila orðaforða íslenskrar tungu með öðrum. Hægt er að hittast á bókasafni eða á heimili viðkomandi og gert er ráð fyrir að verkefnið vari í 6 mánuði. Hist er hverja viku, klukkutíma í senn.

Hvaða kröfur gerum við til tungumálavina?

- Að þú sért 20 ára eða eldri
- Að þú hafir brennandi áhuga fyrir því að deila tungumáli þínu með öðrum
- Að þú skiljir og deilir mannúðlegum gildum okkar
- Að þú hafir eina klukkustund lausa á viku yfir 6 mánaða tímabil

Hvað getum við boðið þér?

- Sértæka þjálfun til að koma þér af stað
- Opin aðgang að öllum námskeiðum Rauða krossins, einnig skyndihjálparnámskeiðum
- Skemmtilega og þroskandi reynslu sem sjálfboðaliði
- Tækifærið til að hitta fólk sem er svipað þenkjandi
- Starfsreynslu til að setja á ferilskrá þína

Vilt þú gerast tungumálavinur? Sendu inn umsókn hér eða sendu okkur póst á immigrantsupport@redcross.is


Hér
geturðu lesið um reynslu nokkurra þátttakendur í verkefni Tölum saman og Leiðsöguvinir.


Leiðsöguvinir

 

Í verkefninu Leiðsöguvinir hittast flóttafólk og Íslendingar til að kynnast hvort öðru betur.

Flóttafólk á Íslandi vill flest kynnast Íslendingum til að stækka félagslegt net sitt, til að spyrja spurninga um lífið á Íslandi eða vegna þess að það er gaman að eignast vini og kunningja á nýja staðnum. Þú getur aðstoðað þessa einstaklinga eða fjölskyldu með því að verða leiðsöguvinur.

Leiðsöguvinir eru sjálfboðaliðar sem taka að sér að hitta og kynnast einstaklingum eða fjölskyldum sem nýlega hafa hlotið alþjóðlega vernd á Íslandi. Leiðsöguvinir verða vinir þeirra nýkomnu, svara spurningum um lífið á Íslandi, tala um íslenska menningu og hefðir og hvað annað sem þátttakendum býr í brjósti. Þeir byggja brýr á milli fólks með ólíkan bakgrunn og hjálpa þeim að finna sinn stað á Íslandi. Leiðsöguvinir vísa veginn.

Markmið verkefnisins er gagnkvæm félagsleg aðlögun. Þátttakendur eignast nýja vini, styrkja tengslanet sitt, öðlast nýja innsýn inn í íslenskt kerfi og læra um menningu og hefðir hvers annars.

Leiðsöguvinapörin hittast í 4 til 6 klukkustundir á mánuði og gert er ráð fyrir að verkefnið vari í 6 mánuði. Mælt er með að hittast vikulega. Þau ákveða í sameiningu hvenær og hvar þau munu hittast. Þátttakendur hafa hist á stöðum eins og bókasafni, kaffihúsi eða á heimilum hvers annars.

Hvaða kröfur gerum við til leiðsöguvina?

- Að þú sért 22 ára eða eldri
- Að þú sért opin/n og hafir áhuga á fólki og fjölmenningu
- Að þú talir íslensku og ensku
- Að þú skiljir og deilir með okkur mannúðlegum gildum okkar
- Að þú hafir 4 til 6 klukkustundir lausar á mánuði yfir 6 mánaða tímabil

Hvað getum við boðið þér?

- Sértæka þjálfun til að koma þér af stað
- Opin aðgang að öllum námskeiðum Rauða krossins, einnig skyndihjálparnámskeiðum
- Skemmtilega og þroskandi reynslu sem sjálfboðaliði
- Tækifærið til að hitta fólk sem er svipað þenkjandi
- Starfsreynslu til að setja á ferilskrá þína

Vilt þú gerast leiðsöguvinur? Sendu inn umsókn hér eða sendu okkur póst á immigrantsupport@redcross.is


Hér geturðu lesið um reynslu nokkurra þátttakendur í verkefni Leiðsöguvinir og Tölum saman.

RK-2-1

Photo credit: Gabrielle Motola

 

 

 

Opið hús fyrir innflytjendur og flóttafólk / Open house for immigrants and refugees

 

Sjá nánari upplýsingar hér.

Tómstundasjóður flóttafólks

 

Tómstundasjóði flóttafólks er ætlað að styðja börn flóttafólks búsettu hér á landi til að stunda tómstundir sem ekki fæst styrkur fyrir annars staðar. Sjá nánar um umsóknarferlið og reglur sjóðsins hér.

Hægt er að fá úthlutað úr sjóðnum fyrir:

 

  • börn sem koma án fylgdarmanna til landsins
  • börn flóttafólks sem boðin er búseta hér á landi (kvótaflóttafólk)
  • börn flóttafólks sem fá stöðu flóttamanns í kjölfar hælismeðferðar
  • börn flóttafólks sem fá vernd af mannúðarástæðum
  • börn fólks í leit að alþjóðlegri vernd hér á landi

 

Úthluta má úr sjóðnum allt þar til börn hafa fengið búsetuleyfi hér á landi eða í allt að 4 ár frá því þau hljóta stöðu flóttamanns eða fá vernd af mannúðarástæðum. Hægt er að sækja um tvisvar á ári fyrir hvert barn. Úthlutað er allt að 30.000 kr. á ári fyrir hvert barn.

Ef styrkur er veittur fyrir hámarksupphæð í einni úthlutun fæst ekki önnur úthlutun það ár.

Styrkhæfar tómstundir

Styrki úr sjóðnum má veita til hvers kyns tómstunda barna enda er það val barnanna og fjölskyldna þeirra hvaða tómstund er stunduð. Styrkir geta því verið fyrir námskeiðum, tónlistarnámi, íþróttaiðkun, dansnámi eða annars konar tómstund og ferðum þeim tengdum. 

Umsóknarferli / How to apply

Fylla skal út  meðfylgjandi eyðublað  og senda það til deildar Rauða krossins  í búsetusveitafélagi. 

Here is an application form that has to be filled out and sent to the Red Cross branch in your municipality.

Styrkir eru ýmist greiddir beint inn á reikning forráðamanns þess barns sem sótt er um fyrir að því tilskyldu að reikningar séu lagðir fram eða að reikningar eru greiddir beint. Ef spurningar vakna varðandi sjóðinn eða umsóknarferlið endilega hafið samband á netfangið immigrantsupport@redcross.is eða í síma 570 4000.

Leitarþjónusta Rauða krossins

Rauði krossinn á Íslandi er hluti af leitarþjónustu alheimshreyfingar Rauða krossins og Rauða hálfmánans. Ef leita þarf á átakasvæðum er unnið í samvinnu við Alþjóðaráð Rauða krossins (ICRC).

Ekki er óalgengt að fólk verði viðskila á flótta frá heimaríki til öruggari staða. Ýmsar ástæður geta legið að baki því að verða viðskila, ástæður eins og stríð eða náttúruhamfarir í heimalandi.

Fjölskyldur sem hafa orðið viðskila vegna átaka búa oft árum, jafnvel áratugum, saman við óttann sem fylgir óvissunni um að vita ekki um afdrif ástvina. Í þeirri ringulreið sem ríkir á vígvöllum og hamfarasvæðum verður fólk oftar en ekki viðskila við sína nánustu, og eyða jafnvel það sem eftir er ævinnar við leit að þeim. Af öllum þeim þjáningum sem átök og náttúruhamfarir valda er óvissan um afdrif ættingja ef til vill með þeim verstu.

Þegar átök brjótast út brotna innviðir samfélagsins niður, símasamband og samgöngur rofna og oft eru hömlur á ferðafrelsi einstaklinga. Í þeirri ringulreið sem skapast á átakasvæðum verða börnin oft verst úti, og árlega verða tugþúsundir barna viðskila við foreldra sína við slíkar aðstæður. Mörg eru ómálga eða svo lítil að þau geta ekki sagt frá nöfnum foreldra sinna eða hvaðan þau eru upprunninn.

Einstaklingar geta leitað til leitarþjónustu Rauða krossins ef þeir hafa misst samband við fjölskyldur sínar eða til að komast að því hvað varð um nána ættingja sem saknað er.

Komi fram beiðni um leitarþjónustu fær viðkomandi fund með starfsmanni þar sem farið er ítarlega í ástæður viðskilnaðarins og skoðaðir allir möguleikar á að koma á sambandi á nýjan leik. Leitarbeiðni er send til leitarþjónustu Rauða krossins eða Rauða hálfmánans í viðkomandi landi og í fleiri löndumef ferðast hefur verið milli margra landa eins og oft er með fólk á flótta. Annar hluti leitarþjónustu felst í að koma á sambandi í gegnum síma, þá getur umsækjandi sem er hér á landi hringt í ættingja sína eftir langt og erfitt ferðalag til þess að láta vita af því að viðkomandi sé heill á húfi. Þessi möguleiki er ekki síst mikilvægur fyrir börn sem ferðast án fylgdar fullorðinna.

Það getur tekið langan tíma að koma á samskiptum milli ættingja og það er mjög ánægjulegt þegar það tekst, þó ekkert sé öruggt í þeim efnum. Það er afar mikilvægt fyrir þá sem orðið hafa viðskila við ástvini sína að eiga þess kost að fá aðstoð við leit að sínum nánustu og eiga von um að mögulega komist samband á að nýju. Það veitir ró að vita til þess að allt hafi verið gert til að leita að ástvinum. Starfsmenn leitarþjónustu leggja áherslu á að skapa ekki falsvonir um árangur án þess að útiloka að samband muni komast á að nýju.

Nánari upplýsingar er hægt að nálgast á þriðjudögum milli 13-15 á landsskrifstofu Rauða krossins, Efstaleiti 9, Reykjavík.

Rauði krossinn aðstoðar við leit í gegnum leitarþjónustu sína sem má nánar lesa um hér.

Fjölskyldusameiningar

Rauði krossinn á Íslandi veitir aðstoð í formi upplýsinga um ferli fjölskyldusameininga, meðal annars um þau skjöl sem umsækjandi þarf að leggja inn til Útlendingastofnunar, en þar er sótt um fjölskyldusameiningu.

Til að geta sótt um fjölskyldusameiningu verður viðkomandi að hafa fengið jákvætt svar við umsókn sinni um alþjóðlega vernd. Þá er mögulegt að sækja um fyrir maka og börn yngri en 18 ára. Ef foreldrar viðkomandi eru eldri en 67 ára er mögulegt, undir vissum skilyrðum, að sækja um fjölskyldusameiningu við þá. Ef viðkomandi er undir 18 ára aldri er hægt undir ákveðnum skilyrðum að sækja um fjölskyldusameiningu við foreldra og systkini sem eru undir 18 ára aldri.

Nánari upplýsingar er hægt að nálgast á þriðjudögum milli 13-15 á landsskrifstofu Rauða krossins, Efstaleiti 9, Reykjavík og á netfangið immigrantsupport@redcross.is

 

150904_FOR_EuropeMigrantsItaly.jpg.CROP.promo-xlarge2