• _28A3469

Frú Ragnheiður

Skaðaminnkun

Frú Ragnheiður- skaðaminnkun var sett á laggirnar árið 2009 á höfuðborgarsvæðinu og byggir á hugmyndafræði skaðaminnkunar. Verkefnið hefur þann tilgang að ná til jaðarsettra hópa í samfélaginu eins og húsnæðislausra einstaklinga og einstaklinga sem nota vímuefni um æð og bjóða þeim skaðaminnkandi þjónustu í formi heilbrigðisþjónustu og nálaskiptiþjónustu. 

Frú Ragnheiðar bíllinn er sérinnréttaður til að veita slíka þjónustu á vettvangi og þjónustar einstaklinga á öllu höfuðborgarsvæðinu sex kvöld í viku (öll kvöld nema laugardaga) frá kl. 18:00 til 21:00. Til þess að hitta bílinn er best að hringja í síma 7887123.

Frú Ragnheiður er einnig starfrækt á Suðurnesjum. Þar er þjónustan í boði á mánudögum og fimmtudögum kl. 20-22. Síminn þar er 783 4747.

Árið 2020:
 

  • leituðu 596 eintaklingar til Frú Ragnheiðar
  • voru heimsóknir 4.407 talsins
  • fargaði verkefnið 3.880 lítrum af notuðum sprautubúnaði
  • urðu konur í fyrsta sinn þriðjungur af notendahópi Frú Ragnheiðar
  • voru ungmenni á aldrinum 18-25 ára 20% af notendahópi verkefnisins

Mynd-Stundin
Mynd: Stundin

Í Frú Ragnheiði er starfrækt heilbrigðisþjónusta þar sem einstaklingar geta komið og fengið t.d. aðhlynningu sára, sýklalyfjameðferð, umbúðaskipti, saumatöku og almenna heilsufarsskoðun og ráðgjöf. Á hverri vakt starfar hjúkrunarfræðingur og læknir sem sinnir bakvakt.

Í verkefninu er einnig starfrækt nálaskiptaþjónusta þar sem einstaklingar sem nota vímuefni um æð geta komið og sótt sér hreinar nálar, sprautur, nálabox, smokka og annað sem þarf til að draga úr líkum á smiti og sýkingum. Í nálaskiptaþjónustunni er einnig veitt skaðaminnkandi ráðgjöf um öruggari leiðir sprautunotkunar eins og varðandi smitleiðir á HIV og lifrarbólgu C og leiðir til að lágmárka hættuna á ofskömmtun. Jafnframt tekur verkefnið við notuðum sprautubúnaði til förgunar í samstarfi við Landspítalann og er það hluti af samfélagslegri skaðaminnkun til að draga úr að notaður sprautubúnaður verður eftir á götum borgarinnar eða í ruslinu.

Að auki fá skjólstæðingar hlý föt, næringu, svefnpoka, tjalddýnur, sálrænan stuðning og ráðgjöf.

Á dagtíma sinna starfskonur eftirfylgd með málum skjólstæðinga. Þær aðstoða skjólstæðinga við að koma málum sínum í réttan farveg og veita aðstoð við að komast í sértækari heilbrigðisþjónustu, í vímuefnameðferðir og í félagslega þjónustu. 

_28A3411

Ferðaáætlun 

Frú Ragnheiðar bíllinn á höfuðborgarsvæðinu er á ferðinni milli klukkan 18 og 21, alla daga nema laugardaga. Síminn í Frú Ragnheiðar bílnum er 7887 123. Hægt er að hafa samband símleiðis eða senda skilaboð á Facebook síðu Frú Ragnheiðar. Við getum hitt á einstaklinga hvar sem er á höfuðborgarsvæðinu.

Í Frú Ragnheiði er nafnleynd og við lofum 100% trúnaði. Við leggjum mikla áherslu á að koma fram við fólks af virðingu, skilningi og væntumþykju. Verið velkomin að hringja og líta inn til okkar.

 Umfjöllun Rúv Núll um Frú Ragnheiði (september 2019)

Markmið Frú Ragnheiðar

Markmið Frú Ragnheiðar er að aðstoða einstaklinga við að halda lífi, lágmarka óafturkræfan skaða, draga úr sýkingum og útbreiðslu á lifrarbólgu C og HIV. Með því að veita jaðarsettum einstaklingum gott aðgengi að heilbrigðisþjónustu og nálaskiptaþjónustu, ásamt almennri fræðslu um skaðaminnkun á vettvangi er hægt með einföldum og ódýrum hætti að draga verulega úr líkum á að einstaklingar þurfi í framtíðinni á kostnaðarsamri heilbrigðisþjónustu að halda. Það eykur að auki heilsu og lífsgæði einstaklinga miðað við aðstæður.

Í Frú Ragnheiði starfa um 100 sjálfboðaliðar og tvær starfskonur (verkefnastýra sem er jafnframt hjúkrunarfræðingur ásamt starfskonu sem er sérfræðingur í skaðaminnkun). Verkefnið byggir á sjálfboðnu starfi fjölbreytts hóps einstaklinga sem standa að meðaltali tvær vaktir í mánuði og skuldbinda sig í að lágmarki eitt ár. Stærsti einstaki faghópurinn eru hjúkrunarfræðingar, jafnframt eru læknar, félagsráðgjafar, lyfjafræðingar, sálfræðingar og aðrir reynslumiklir einstaklingar hluti af verkefninu. Allir sjálfboðaliðar sækja námskeið og fara í gegnum þjálfum til að geta veitt þjónustu í Frú Ragnheiðar bílnum. Árið 2019 skiluðu sjálfboðaliðar rúmlega 4.627 klst í sjálfboðavinnu.

Ef þú vilt gerast sjálfboðaliði í Frú Ragnheiði fylltu þá út formið hér og haft verður samband við þig. Athugið: Það er mikill áhugi á að taka þátt í verkefninu og því er biðlisti af áhugasömum sjálfboðaliðum.

IMG_3623_1