Heimsóknavinur með hund

Heimsóknavinur með hund sinnir sömu verkefnum og aðrir heimsóknavinir nema hundurinn mætir með í heimsóknunum. Hundar eru að heimsækja á nánast öllum dvalarheimilum á höfuðborgarsvæðinu og einnig mörgum dvalarheimilum á landsbyggðinni. Þetta verkefni hefur notið mikilla vinsælda og eins og rannsóknir hafa sýnt þá geta hundar náð vel til fólks og oft mun betur en fólk getur. Í upphafi hundaheimsókna þá var nánast eingöngu verið að heimsækja á dvalarheimili og stofnanir en það hefur aukist töluvert að það sé verið að heimsækja með hund á einkaheimili. Það er fólk á öllum aldri sem nýtur samvistanna við hundana og að sjálfsögðu eigendur þeirra líka.

16602749_10212153166295327_7498924396105172724_n

Heimsóknahundur þarf að vera orðinn 2ja ára  og mega helst ekki vera eldri en 10 ára.

Færniviðmið: 

  1. Heilsar ókunnugri manneskju sem stendur, situr eða liggur á stillan hátt
  2.  Bregst vel við snertingu, t.d. þegar einn eða fleiri klappa hundinum (frá sömu hlið/frá báðum hliðum) 
  3. Ræður við að vera haldið kyrrum, dreginn að manneskju eða fá faðmlag  
  4. Er félagslyndur og vinsamlegur – sérstaklega innan um ókunnuga 
  5. Svara ekki ögrun, hvorki gagnvart hundi né eiganda 
  6. Þolir að vera handfjatlaður, skoðun á eyrum og tönnum, að loppum sé lyft og að vera færður til
  7. Bregst við óvæntum hlutum/atvikum með yfirveguðum hætti 
  8. Bregst við óvæntum truflunum, sjónrænu áreiti og hljóðum með yfirveguðum hætti 
  9. Ganga í taumi, stillilega og fallega, bæði í rólegu og virku umhverfi
  10. Sýnir enga vöktunarhneigð (e. resource guarding) 
  11. Tekur kurteislega við nammi, eða getur hlýtt skipun um að taka ekki nammi 
  12. Yfirvegað atferli, hundur lætur vel að stjórn í léttum leik 
  13. Hæfni til að sitja kyrr þótt eigandi fari frá 
  14. Framkoma hundaeigandans og athuganir eru metin jafnóðum 
  15. Er félagslyndur og vinsamlegur í nánum samskiptum
  16. Er félagslyndur og vinalegur í hópi
  17. Er rólegur innan um börn 

Til að undirbúa þig og hundinn eins vel og mögulegt er þá þurfið þið fyrst að fara í grunnhundamat. Matið er gert af reyndum sjálfboðaliða í verkefninu sem metur hvort þú og hundurinn séu fær um að taka þátt í heimsóknarvinaverkefninu með hund. 

Til að verða heimsóknavinur með hund þá þarf eigandi og hundurinn að sækja hundanámskeið sem fer fram í tveimur hlutum með a.m.k. 2 vikna millibili.  Auk þess taka þeir námskeið fyrir almenna heimsóknavini og grunnnámskeið Rauða krossins.

Rauði krossinn í Kópavogi heldur utan um verkefnið á landsvísu.
Þeir sem hafa áhuga á að gerast heimsóknavinir með hund geta skráð sig hér (taka fram í athugasemdum að viðkomandi hafi áhuga á að gerast heimsóknavinur með hund) eða haft samband á netfangið kopavogur@redcross.is