Eitt prósent landsmanna styðji við neyðarsöfnun fyrir Afganistan

23. ágúst 2021

Þann 17 ágúst síðast liðinn hóf Rauði krossinn á Íslandi neyðarsöfnun fyrir íbúa Afganistans. Hátt í 800 manns hafa nú þegar stutt íbúa í Afganistan með rausnarlegum framlögum en við vonumst til þess að fleiri vilji bætast í þennan hóp og leggja söfnuninni lið og styðja þannig við mannúðaraðgerðir í Afganistan. Markmið Rauða krossins er að eitt prósent landsmanna (18 ára og eldri) styðji við íbúa Afganistans í þessari neyðarsöfnun. Við skorum því á alla, bæði almenning og fyrirtæki að taka þátt í þessu mikilvæga verkefni með okkur.

Allt fé sem safnast rennur beint til mannúðaraðstoðar Alþjóðaráðs Rauða krossins (ICRC) í Afganistan. Þörfin fyrir lífsbjargandi verkefni er gríðarleg en á bilinu 12 til 20 milljónir manna þarfnast mannúðaraðstoðar eða allt að helmingur þjóðarinnar. Ekki er ólíklegt að þessi fjöldi komi til með að aukast á næstu vikum. Fjármagnið verður fyrst og fremst nýtt til að tryggja nauðsynlega heilbrigðisþjónustu fyrir fólk á átakasvæðum. Fjármagninu verðu líka varið í að bregðast við þurrkum sem hafa herjað á landið og hafa leitt til þess að um ellefu milljónir manna búa við fæðuskort.

Sjúkrahús eiga í erfiðleikum með að anna álaginu og veita þúsundum særðra bráðaþjónustu. Fjölmargar fjölskyldur hafa misst ástvini sína og óbreyttir borgarar, þar á meðal börn, særast lífshættulega af völdum jarðsprengna. Rauði krossinn er með 1.800 innlenda og alþjóðlega starfsmenn í Afganistan sem sinna verkefnum á 46 sjúkrahúsum og heilsugæslustöðvum víða um land. COVID-19 faraldurinn eykur álag á heilbrigðisstofnanir en einungis 0,5% Afgana hafa verið bólusettir að fullu.

Ríkisstjórn Íslands hefur ákveðið að styðja við mikilvæg mannúðarverkefni í Afganistan. Utanríkisráðuneytið tilkynnti nú fyrir helgi 60 milljón króna framlag til mannúðaraðstoðar í Afganistan. Framlaginu verður skipt jafnt á milli Alþjóðaráðs Rauða krossins (ICRC) og Flóttamannastofnunar Sameinuðu þjóðanna.

Rauði krossinn hefur einstakt aðgengi á landsvísu til að sinna mannúðaraðstoð til handa þolendum átaka í Afganistan og þess ástands sem þar hefur nú skapast. Hreyfing Rauða krossins gerir engan mun á milli manna eftir þjóðerni þeirra, uppruna, trúarbrögðum, kyni, stétt eða stjórnmálaskoðunum og skal hún gæta hlutleysis í ófriði og aldrei taka þátt í deilum vegna stjórnmála, uppruna, trúarbragða eða hugmyndafræði.

Alþjóða Rauði krossinn hefur veitt mannúðaraðstoð í landinu í 30 ár og mun ekki hverfa frá brýnum verkefnum í landinu núna þegar ástandið er eins alvarlegt og í dag.

Hægt er að veita nauðsynlega mannúðaraðstoð til stríðshrjáðra borgara með eftirtöldum leiðum:

  • SMS: Senda HJALP í símanúmerið 1900 (2.900 kr.)
  • Aur: @raudikrossinn eða 1235704000
  • Kass: raudikrossinn eða 7783609
  • Söfnunarreikningur Rauða krossins: 0342-26-12, kt. 530269-2649