29. desember 2004 : Umfangsmesta hjálparaðgerð Rauða krossins um áratugaskeið hafin

Hjálparstarf á vegum Rauða krossins er í fullum gangi um alla álfuna, einkum þar sem ástandið er verst, á Sri Lanka, Indlandi, Tælandi og Indónesíu.
Alþjóða Rauði krossinn sendi í morgun út hjálparbeiðni sem er sú stærsta um áratugaskeið en talin er þörf á um 3 milljörðum króna til hjálparstarfs samtakanna á hamfarasvæðunum við Indlandshaf. Rúmlega tíu þúsund manns á Íslandi hafa hringt í söfnunarsímann 907 2020 og þannig stutt hjálparstarf á svæðinu. Ríkisstjórn Íslands, Pokasjóður, deildir Rauða krossins og fyrirtæki hafa stutt hjálparstarfið með framlögum og hafa rúmlega 20 milljónir króna safnast síðustu daga.

Á vegum Rauða krossins er verið að leita að ástvinum Íslendinga á flóðasvæðunum í gegnum leitarþjónustu Alþjóða Rauða krossins. Fólk sem er áhyggjufullt vegna ástvina sinna á flóðasvæðum getur nú leitað þeirra á netinu, á leitarsíðu Alþjóða Rauða krossins, www.familylinks.icrc.org. Þar getur fólk á flóðasvæðunum skráð sig og ættingjar og vinir geta sömuleiðis skráð að þeir séu að leita að viðkomandi. Einnig er hægt að hringja í Hjálparsíma Rauða krossins 1717 eða hafa samband við Rauða kross deildir í hverju byggðarlagi.

23. desember 2004 : Gleðilega hátíð!

Kópavogsdeild Rauða krossins færir sjálfboðaliðum og samstarfsaðilum bestu óskir um gleðileg jól og farsæld á nýju ári með kærri þökk fyrir ánægjulegt samstarf og samskipti á árinu sem er að líða.

Skrifstofa Kópavogsdeildar verður lokuð frá og með Þorláksmessu en opnar aftur mánudaginn 3. janúar. Dvöl, athvarf fyrir geðfatlaða, verður lokað á aðfangadag, jóladag, gamlársdag og nýársdag. Í hádeginu á Þorláksmessu verður borðuð skata kl. 11.30 og eru allir gestir athvarfsins sérstaklega velkomnir.  

22. desember 2004 : Vel heppnuð aðventuhátíð heimsóknavina í Sunnuhlíð

Heimsóknarvinir ásamt íbúa Sunnuhlíðar á góðri stundu.

Sjálfboðaliðar Kópavogsdeildar skipulögðu nýverið aðventuhátíð í hjúkrunarheimilinu Sunnuhlíð. Öllum vistmönnum Sunnuhlíðar var boðið og höfðu heimsóknavinir skipulagt veglega dagskrá. Tvö ungmenni spiluðu jólalög á klarínettu, lesin var jólasaga og 40 manna barnakór undir stjórn Þórunnar Björnsdóttir söng nokkur vel valin jólalög. Einn heimsóknavinur, Sigríður Guðmundsdóttir, hafði tekið að sér að baka kökur fyrir gesti og veitingarnar og skemmtiatriðin heppnuðust einkar vel.

 


21. desember 2004 : Hvað er sálrænn stuðningur?

Sálrænn stuðningur er líkamleg og andleg aðhlynning við einstakling sem orðið hefur fyrir áfalli...

17. desember 2004 : Samstarf um aðstoð við fjölskyldur í Kópavogi

Fulltrúar Kópavogsdeildar Rauða krossins og mæðrastyrksnefndar Kópavogs við afhendingu styrksins.  
Kópavogsdeild Rauða kross Íslands og Mæðrastyrksnefnd Kópavogs munu starfa saman að neyðaraðstoð við bágstadda einstaklinga og fjölskyldur fyrir jólin. Mæðrastyrksnefnd Kópavogs annast úthlutun á matarstyrkjum til fjölskyldna í neyð með stuðningi frá Kópavogsdeild Rauða krossins sem nýverið afhenti Mæðrastyrksnefnd styrk að upphæð 500 þúsund krónur. Kópavogsdeild Rauða krossins getur einnig haft milligöngu um að koma umsóknum um aðstoð til Mæðrastyrksnefndar.

16. desember 2004 : Við höfum margt að segja

„Við erum framtíðin, en umfram allt fortíðin”
 Þetta voru skilaboðin frá ungliðaleiðtogum Rauða krossins og Rauða hálfmánans frá 27 löndum um allan heim sem hittust í Tarragona á Spáni 22. og 23. september 2004.

Þetta unga fólk, sem kom m.a. frá nokkrum ungliðanefndum Alþjóðasamtaka Rauða krossins, komu saman til að ræða um hvernig auka ætti þátttöku þeirra í ákvarðanatöku á öllum sviðum starfseminnar. Þá hittu þeir einnig forseta alþjóðasamtakanna, Juan Manuel Suárez Del Toro, og kynntu fyrir honum ályktanir sínar og tillögur.

15. desember 2004 : Október

14. desember 2004 : Fjöldahjálparstjórnarnámskeið á Akureyri

Fjöldahjálparstjórnarnámskeið verður haldið á Akureyri eftir áramót, annað hvort seinni partinn í janúar eða í byrjun febrúar, endanleg dagsetning verður send út á næstunni.

14. desember 2004 : Fjöldahjálparstjórnarnámskeið á Akureyri

Fjöldahjálparstjórnarnámskeið verður haldið á Akureyri eftir áramót, annað hvort seinni partinn í janúar eða í byrjun febrúar, endanleg dagsetning verður send út á næstunni.

14. desember 2004 : Fatasendingar koma að góðum notum í Kabúl

Rauði kross Íslands sendi föt til Afganistan. Hluti fatasendingarinnar var sérstaklega flokkaður og pakkaður fyrir börn á sjúkrahúsi sem Steina Ólafsdóttir sendifulltrúi Rauða krossins vann á.

Rauði kross Íslands stóð fyrir fatasöfnun á Lækjartorgi í maí sl. þar sem óskað var eftir hlýjum fatnaði á konur og börn í Afganistan. Almenningur brást vel við og söfnuðust um 10 tonn af fatnaði.

Þremur vikum síðar lenti á flugvellinum í Kabúl flugvél frá utanríkisráðuneytinu full af hjálpargögnum frá Rauða krossi Íslands og Hjálparstarfi kirkjunnar. Örn Ragnarsson formaður fataflokkunarstöðvar Rauða kross Íslands var með í för og afhenti fulltrúum Alþjóðasambands Rauða krossins og Indira Ghandi barnaspítalans hjálpargögnin.

14. desember 2004 : Fatagjafir koma að góðum notum í Kabúl

Rauði kross Íslands sendi föt til Afganistan. Hluti fatasendingarinnar var sérstaklega flokkaður og pakkaður fyrir börn á sjúkrahúsi sem Steina Ólafsdóttir sendifulltrúi Rauða krossins vann á.
Rauði kross Íslands stóð fyrir fatasöfnun á Lækjartorgi í maí sl. þar sem óskað var eftir hlýjum fatnaði á konur og börn í Afganistan. Almenningur brást vel við og söfnuðust um 10 tonn af fatnaði.

Þremur vikum síðar lenti á flugvellinum í Kabúl flugvél frá utanríkisráðuneytinu full af hjálpargögnum frá Rauða krossi Íslands og Hjálparstarfi kirkjunnar. Örn Ragnarsson formaður fataflokkunarstöðvar Rauða kross Íslands var með í för og afhenti fulltrúum Alþjóðasambands Rauða krossins og Indira Ghandi barnaspítalans hjálpargögnin.

11. desember 2004 : Konukot, athvarf fyrir heimilislausar konur var opnað á 80 ára afmæli Rauða kross Íslands

Katla Þorsteinsdóttir framkvæmdastjóri Reykjavíkurdeildar Rauða krossins, Brynhildur Barðadóttir verkefnastjóri og Ómar Kristmundsson formaður deildarinnar fyrir utan Konukot.
Athvarf fyrir heimilislausar konur var formlega opnað í Reykjavík í dag, á 80 ára afmæli Rauða kross Íslands. Ómar H. Kristmundsson formaður Reykjavíkurdeildar opnaði húsið að viðstöddu fjölmenni, meðal annars Úlfari Haukssyni formanni félagsins og Björk Vilhjálmsdóttur formanni félagsmálaráðs Reykjavíkur, en Reykjavíkurborg leggur til húsnæðið.

Björk sagðist vilja þakka Rauða krossinum fyrir að hafa vakið athygli á vanda heimilislausra kvenna. „Rauði krossinn er oft í fararbroddi og sýnir yfirvöldum fram á þörfina og þá geta þau tekið við,” sagði Björk. „Ég efast ekki um að þannig verður það með þessa starfsemi.”

11. desember 2004 : Páll Pétursson hlýtur æðstu viðurkenningu Rauða kross Íslands

Forseti Íslands Hr. Ólafur Ragnar Grímsson veitir Páli Péturssyni viðurkenningu á 80 ára afmæli Rauða kross Íslands.
Forseti Íslands Hr. Ólafur Ragnar Grímsson sæmdi Pál Pétursson æðstu viðurkenningu Rauða kross Íslands – heiðursmerki úr gulli - í dag, á 80 ára afmæli félagsins. Sem félagsmálaráðherra ákvað Páll að bjóða árlega, utan eins árs, hópum flóttamanna frá gömlu Júgóslavíu til Íslands, alls 218 manns.

Í rökstuðningi fyrir veitingunni segir að auk þess að hafa staðið fyrir hingaðkomu flóttamanna hafi Páll á ráðherraferli sínum beitt sér fyrir stofnun Fjölsmiðjunar, sem er verkþjálfunarsetur fyrir ungt fólk, og látið málefni geðfatlaðra til sín taka. Verkefni til stuðnings geðfötluðum hafa verið forgangsverkefni Rauða krossins á síðustu árum.

10. desember 2004 : 80 ár liðin frá stofnun Rauða kross Íslands

Rauða kross fólk um allt land fagnar því að í dag eru 80 ár liðin frá stofnun félagsins á Íslandi. Þegar Rauði kross Íslands var stofnaður í Eimskipafélagshúsinu 10. desember 1924 höfðu Rauða kross félög starfað á Norðurlöndum og víðar í yfir hálfa öld. Íslendingar þekktu þó til hreyfingarinnar og hugsjóna hennar og að fengnu fullveldi þótti mörgum tímabært að „komast í tölu siðaðra þjóða“ með því að stofna „íslenskan Rauða kross“. Forgöngu um stofnun félagsins höfðu Sveinn Björnsson, fyrsti formaður félagsins og forseti lýðveldisins, og læknarnir Steingrímur Matthíasson og Gunnlaugur Claessen.

Félagið hóf starf sitt í þjóðfélagi sem til þessa hafði verið þiggjandi en ekki veitandi í hjálparstarfi. Velferðarkerfi var vart til að dreifa og heilbrigðis- og hreinlætismál voru í ólestri. Verkefni félagsins hafa síðan mótast af þörfum samfélagsins hverju sinni.

8. desember 2004 : Fjölsmiðjan fékk milljón frá Kópavogsdeild Rauða krossins

Þorbjörn Jensson, forstöðumaður Fjölsmiðjunnar, tók við styrknum af Garðari H. Guðjónssyni, formanni Kópavogsdeildar.
Kópavogsdeild Rauða kross Íslands gaf Fjölsmiðjunni nýverið eina milljón króna til að bæta aðstöðu nema og starfsfólks bílaþvotta- og hússtjórnardeilda. Kópavogsdeild hefur þá styrkt uppbyggingu og rekstur Fjölsmiðjunnar með samtals ríflega átta milljónum króna á undanförnum þremur árum. Ennfremur hafa sjálfboðaliðar deildarinnar stutt við starfið.

Fjölsmiðjan í Kópavogi er mennta- og þjálfunarsetur fyrir fólk á aldrinum 16-24 ára sem ekki hefur náð að fóta sig í námi og á vinnumarkaði. Markmiðið er að styðja nemana til þess að komast á ný til náms eða í vinnu og hefur náðst mjög góður árangur í því. Rauði kross Íslands átti frumkvæði að því að Fjölsmiðjan var stofnuð vorið 2001 og deildir Rauða krossins á höfuðborgarsvæðinu hafa síðan stutt dyggilega við uppbyggingu og rekstur hennar.

 

5. desember 2004 : Sjálfboðaliðar eru mikilvægt þjóðfélagsafl

Að vera sjálfboðaliði er um flest eins og að gegna starfi á vinnumarkaði. Maður hefur ákveðnar skyldur sem maður innir af hendi, oftast með reglubundnum hætti, fær til þess þjálfun og öðlast til þess reynslu. Maður hefur væntingar um starfið og leitast við að uppfylla þær væntingar sem gerðar eru til manns. Meginmunurinn er sá að sjálfboðaliðinn þiggur ekki laun önnur en ánægjuna af starfinu og þá trú að hann sé að gera gagn. Sjálfboðaliði er heldur ekki starfsheiti enda gegna sjálfboðaliðar afar fjölbreyttum störfum. Þúsund Íslendinga vinna sjálfboðið starf að staðaldri og gegna mikilvægu hlutverki á ýmsum sviðum samfélagsins. Í dag er einmitt alþjóðlegur dagur sjálfboðaliðans.

3. desember 2004 : Neyðarvarnir 2004

3. desember 2004 : Aukin geta samfélagsins til að takast á við afleiðingar hamfara er lykillinn að þróun samfélagsins

Þegar brugðist er við hamförum, svo sem flóðum, eldgosum eða þurrkum, þurfa hjálparstofnanir að taka með í reikninginn getu manna á staðnum til að hjálpa sér sjálfir. Þetta er grunntónninn í skýrslu um hamfarir í heiminum á síðasta ári.

2. desember 2004 : Starf með ungum innflytjendum hafið á ný

Nemendur og sjálfboðaliðar á góðri stundu.

Starf með ungum innflytjendum hófst á ný í gær en verkefnið hafði legið í dvala frá því í vor vegna kennaraverkfalls. Fagnaðarfundir urðu meðal sjálfboðaliða Kópavogsdeildar og nemenda í nýbúadeild Hjallaskóla og var tímanum að mestu varið í að endurnýja kynnin og fara í skemmtilega leiki.

Starf með ungum innflytjendum hófst í mars 2004 og er í samvinnu við nýbúadeild Hjallaskóla. Börnin koma einu sinni í viku eftir skóla í sjálfboðamiðstöð deildarinnar og geta meðal annars fengið aðstoð við heimanámið, málörvun og fræðslu um tómstundastarf í Kópavogi í gegnum kynningarstarf og vettvangsferðir. Markmið verkefnisins er að auðvelda börnum af erlendum uppruna aðlögun að íslensku samfélagi og virka þátttöku í því. Verkefnið er hugsað sem eins konar samfélagsfræðsla sem börnin og sjálfboðaliðar geti haft gagn og gaman af.

1. desember 2004 : Skyndihjálp við bruna