• Johnna_Alberto

Jóhann Thoroddsen til Afganistan

Kennir sálfélagslegan stuðning

26. ágúst 2016

Jóhann Thoroddsen sendifulltrúi Rauða krossins á Íslandi hélt til Afganistan í gær þar sem hann verður við störf á Endurhæfingarstöð Alþjóðaráðs Rauða krossins (ICRC) í Kabúl. Rauði krossinn á Íslandi hefur, ásamt utanríkisráðuneytinu, stutt við starfsemi Endurhæfingarstöðvarinnar frá árinu 2012 en hún er meðal annars ætluð fórnarlömbum jarðsprengna og stríðsátaka sem hafa misst útlimi. Skjólstæðingar Rauða krossins hafa þar fengið gervilimi, sálrænan stuðning og starfsþjálfun til að gera þeim kleift að taka þátt í daglegu lífi á nýjan leik.

 

Endurhæfingarstöð ICRC í Kabúl hefur vakið heimsathygli. Starf stöðvarinnar er leitt af Alberto Cairo en hann hefur varið síðustu 26 árum í Afganistan við mannúðarstörf og endurhæfingu fórnarlamba stríðsátaka. Skjólstæðingar stöðvarinnar hafa náð ótrúlegum árangri, meðal annars með virkri þátttöku í íþróttum, leikjum og starfi. Skjólstæðingar eru hvattir til að snúa aftur í atvinnulífið og fá til þess stuðning og leiðsögn auk þess sem þeir eiga kost á hagstæðum lánum til að greiða götu viðskiptahugmynda. Meðal þeirra sem hafa stutt við starfið eru fótboltakappar á borð við Paul Pogba, Philipp Lahm, Lionel Messi og Cristiano Ronaldo ásamt Knattspyrnusambandi Evrópu, UEFA.

 

Jóhann, sem er sálfræðingur, er að fara til Kabúl sem sendifulltrúi í annað sinn en fyrir réttu ári hélt hann námskeið fyrir starfsfólk og og fyrrum skjólstæðinga. Endurhæfingarstöðvarinnar í sálrænum stuðningi. Í þessari sendiför kemur Jóhann til með að byggja ofan á þá grunnvinnu sem var lögð fyrir ári síðan. Bæði skjólstæðingar, sem og starfsfólk, fá nauðsynlega leiðsögn og þjálfun í sálfélagslegum stuðningi með sjálfbærara starf að markmiði til framtíðar.

 

Rauði krossinn á Íslandi kemur til með að styðja áfram við verkefni Endurhæfingarstöðvarinnar í Kabúl sem hefur unnið mikið þrekvirki á undanförnum árum og áratugum í einu stríðshrjáðasta landi heims. Skjólstæðingar stöðvarinnar eru meðal allra berskjölduðustu hópa á átakasvæðum en með umönnun, þjálfun og stuðningi eiga þeir von um að eiga betra líf fyrir augum.