• Bangladesh_coxflottamannabudir

Mikill fjöldi sendifulltrúa við störf

6. nóvember 2018

Fjöldi sendifulltrúar Rauða krossins héldu af stað í verkefni í október og hefur sendifulltrúastarf félagsins sjaldan verið jafn fjölbreytt og öflugt.

Hólmfríður Garðarsdóttir, ljósmóðir og hjúkrunarfræðingur, hélt af stað til Úkraínu í lok október, þar sem hún mun næstu mánuði hafa umsjón með heilbrigðisverkefnum á vegum Alþjóðaráðs Rauðar krossins (ICRC). Hólmfríður er margreyndur sendifulltrúi og hefur unnið fyrir Rauða krossinn í lengri og skemmri starfsferðum í rúm 20 ár. 

Hólmfríður mun hafa aðsetur í Donetsk í austurhluta Úkraínu, þar sem Rauði krossinn styður við heilsugæslu og sjúkrahús á svæðinu á fjölbreyttan máta en um 145 heilsugæslustöðvar og spítalar á svæðinu hafa notið góðs af aðstoð Alþjóðaráðsins. 

Þá sendi Rauði krossinn á Íslandi einnig tvo sendifulltrúa til Bangladess um miðjan október. Hjúkrunarfræðingarnir Ingibjörg Ösp Ingólfsdóttir og Kolbrún Þorsteinsdóttir fóru í sína fyrstu starfsferð fyrir Rauða krossinn og hófu störf á neyðartjaldsjúkrahúsinu í Cox´s Bazar. Með þeim í för er Jóhanna Elísabet Jónsdóttir en hún var einnig við störf í Bangladess á haustmánuðum 2017. Alls hafa 26 sendifulltrúar á vegum Rauða krossins starfað við neyðartjaldsjúkrahús í kjölfar fólkflutnings yfir 700.000 Róhingja frá Mjanmar til Bangladess. Fyrstu sendifulltrúarnir fóru út um miðjan september 2017 og unnu að því að koma sjúkrahúsinu upp.  

Ákveðið hefur verið að sjúkrahúsið starfi a.m.k. út árið 2018 vegna þess hve þörfin er mikil en almennt eru neyðartjaldsjúkrahús aðeins sett upp til afar skamms tíma. Sjúkrahúsið hefur veitt rúmlega 39.000 einstaklingum aðstoð síðan í október 2017.

Sendifulltrúastörf Rauða krossins í Afríku

Halldor-Gislason_1_framlit

Halldór Gíslason hélt til Mósambík og Tansaníu um miðjan október í sína fjórðu ferð fyrir Rauða krossinn í tengslum við upplýsingatækniverkefni sem Rauði krossinn á Íslandi vinnur í Afríku í samvinnu við Alþjóðasamband Rauða krossins og Rauða hálfmánann (IFRC). Verkefnið leitast við að aðstoða Rauða kross landsfélög í Afríku að tölvu- og internetvæðast eða við að brúa hið stafræna bil eins og það er stundum kallað.

Þá héldu þrír aðrir sendifulltrúar til starfa fyrir Rauða krossinn í október. Róbert Þorsteinsson og Kristján R. Kristjánsson, fóru til Sómalíu og Úganda til að sinna fjármálaúttekt á verkefnum sem Rauði krossinn á Íslandi styður við í löndunum. Rauði krossinn á Íslandi hefur stutt við ýmis verkefni í Sómalíu síðan 2011, þar á meðal stutt við uppbyggingu hælis fyrir munaðarlausa, færanlegrar heilsugæslu og veitt neyðaraðstoð vegna þurrka. Í Úganda munu Róbert og Kristján framkvæma úttekt á neyðaraðstoð til flóttafólks frá Suður-Súdan og flóttafólks frá Lýðstjórnarlýðveldinu Kongó. Í Úganda hefur Rauði krossinn á Íslandi stutt sérstaklega við sálrænan stuðning samhliða annarri neyðaraðstoð. Róbert hefur marga ára reynslu af sendifulltrúastörfum og sinnti m.a störfum í Sómalíu á síðasta ári og í Bangladess fyrr á þessu ári.

Störf Halldórs og Kristjáns eru hluti af samstarfi Rauða krossins á Íslandi og Íslandsbanka, þar sem vinnuframlag þeirra er hluti af Hjálparhandaverkefni Íslandsbanka. Samstarfið byggir á því að sérfræðingar Íslandsbanka á ýmsum sviðum styðja við verkefni Rauða krossins með sérþekkingu sinni  og aðstoð á vettvangi.