Neyðarsöfnun fyrir Jemen

Rauði krossinn tekur þátt í samræmdu átaki Rauða kross hreyfingarinnar

2. nóvember 2018

Neyðarsöfnun vegna vopnaðra átaka og yfirvofandi hungursneyðar í Jemen

Þú getur stutt starf Rauða krossins í Jemen með 2900 kr. framlagi með því að senda SMS-ið HJALP í númerið 1900.

Rauði krossinn á Íslandi hefur ákveðið að hefja neyðarsöfnun vegna vopnaðra átaka og yfirvofandi hungursneyðar í Jemen. Með þessu tekur Rauði krossinn þátt í samræmdu átaki Rauða kross hreyfingarinnar  og bregst við ákalli alþjóðasamfélagsins vegna þeirrar alvarlegu neyðar sem er í Jemen. Vegna vopnaðra átaka í landinu er viðvarandi fæðuskortur og vöntun á heilbrigðisaðstoð. Með því að senda SMS-ið HJALP í númerið 1900 er starf Rauða kross hreyfingarinnar í Jemen styrkt um 2900 kr. Sú upphæð dugar til þess að þrjú börn í Jemen fái mat í einn mánuð.

Vandamál í Jemen eru gríðarleg og margslungin. Dauðsföll í landinu eru mikil vegna vopnaðra átaka, skorts á mat, heilbrigðiskerfið hefur eyðilagst í átökunum og innviðir og grunnstoðir landsins hafa lamast. Hafnbann einangrar landið og gerir flutning á matvælum og neyðarvistum nánast ómögulegan. Hjálparstarfsmenn á vettvangi hafa orðið fyrir árásum sem gerir það að verkum að allt hjálparstarf reynist erfitt og afar hættulegt.

„Íslensk stjórnvöld hafa verið í forystuhlutverki að benda á þá neyð sem vopnuð átök í Jemen  valda almenningi þar í landi, sér í lagi börnum, eldra fólki og þeim sem þurfa á heilbrigðisaðstoð að halda“ segir Sveinn Kristinsson formaður Rauða krossins á Íslandi. Sveinn tekur undir orð Yves Daccord, framkvæmdastjóra Alþjóðaráðs Rauða krossins (ICRC), sem fundaði m.a. íslenskum ráðamönnum í síðasta mánuði og ræddi mikilvægt hlutverk Íslands og smærri ríkja sem geta haft mikil áhrif í baráttu sem þessari. „Við vitum að ríki á borð við Ísland geta haft áhrif á alþjóðavettvangi og því hvetjum við íslensk stjórnvöld áfram til dáða í því mikilvæga starfi sem þau hafa þegar sinnt í þágu þolenda í Jemen og að fundin verði lausn á átökunum sem gagnist fólkinu í landinu. Nú þegar hefur Ísland vakið mikla athygli fyrir málflutning sinn hjá mannréttindaráði Sameinuðu þjóðanna og það gerði utanríkisráðherra einnig í máli sínu á allsherjarþingi SÞ fyrr á árinu þar sem hann ræddi meðal annars um ástandið í Jemen. Viðbrögð íslenskra stjórnvalda eru því mjög jákvæð og ákveðin“ segir Sveinn, en bætir við að  ljóst sé að „þörf er á samstilltu átaki alþjóðasamfélagsins til leysa þau fjölþættu vandamál sem Jemen stendur frammi fyrir.“

Aðstæður í Jemen eru gríðarlega slæmar. Skortur á mat, hreinu vatni og eldsneyti hefur mikil áhrif á daglegt lífs fyrir borgara landsins og þarf því mikill meirihluti þjóðarinnar á neyðaraðstoð að halda.

  • 80% þjóðarinnar, eða um 22 milljónir af 27 milljónum Jemena, þurfa á aðstoð að halda
  • 15,7 milljónir hafa ekki greiðan aðgang að vatni
  • 14,8 milljónir Jemena hafa ekki aðgang að sjúkrahúsum eða heilsugæslu
  • 2,9 milljónir Jemena hafa yfirgefið heimili sín og eru á flótta vegna átakanna í landinu
  • Milljónir íbúa Jemen fá eina máltíð á dag og vita ekki hvaðan eða hvenær næsta máltíð kemur

Áætlað er að 60% þjóðarinnar skorti mat eða um 17,8 milljónir einstaklinga. Ástandið í landinu hefur einnig leitt til þess að heilbrigðiskerfi hefur hrunið. Gríðarlegur skortur er á bólusetningum barna og fjöldi vannærðra barna er mikill. Hefur þetta í för með sér að útbreiðsla sjúkdóma meðal barna hefur stóraukist. Fréttir benda til þess að útbreiðsla ýmissa sjúkdóma, svosem mislinga og kóleru, hafi aukist mikið undanfarið.

Barn_Jemen

Almennir borgarar Jemen hafa blandast í átökin í landinu og er óásættanlegt hvaða áhrif þau hafa haft á daglegt líf stærsta hluta borgara landsins. Sem dæmi má nefna að rúmlega 2500 skólar hafa verið eyðilagðir í átökunum. Fjölskyldur í landinu leita skjóls hvar sem það er að finna þar sem heimili þeirra hafa verið lögð í rúst. Sprengjuárásir á hlutlaus skotmörk, íbúabyggðir og spítala eru sérstaklega til þess fallnar til að setja líf almennra borgara í hættu og koma daglegu lífi þeirra úr skorðum.

Elín J. Oddsdóttir, skurðhjúkrunarfræðingur og sendifulltrúi Rauða krossins, fór á vegum Alþjóðaráðs Rauða krossins (ICRC) til Jemen sl. vetur og vor og segir neyðina mikla. Þegar hún var á svæðinu var mikill skortur á ýmsum nauðsynjum og rafmagn t.d. mjög ótryggt. Aðstæður hafa síst batnað. Teymi á vegum Alþjóða Rauða krossins útvegaði lyf, rúm, dýnur, lök og ýmis tæki. Rauði krossinn sinnti ekki aðeins sjúklingum heldur einnig fólki sem missti heimili sín eða var orðið viðskila við fjölskyldur sínar.

Umfang þessara vandamála eru því gríðarleg og daglegt líf Jemena versnar með hverjum deginum. Ástandið mun ekki batna nema að alþjóðasamfélagið og almenningur bregðist við. Hægt er að styrkja hjálparstarf Rauða kross hreyfingarinnar í Jemen um 2900 kr. með því að senda SMS-ið HJALP í númerið 1900. Einnig má leggja inn á reikning 0342 - 26 -12, kt. 530269-2649