• IMG_0250

Siglt á vit ævintýranna til eyjunnar fögru

7. september 2017

Sjálfboðaliðar Rauða krossins í Árnessýslu og Hveragerði, sýrlensku flóttamannafjölskyldurnar sem komu til landsins í lok janúar ásamt flóttamannafjölskyldu frá Afganistan fóru í skemmtilega ferð til Vestmannaeyja á laugardaginn var. Hópurinn taldi 42 og var hver öðrum hressari í þessari frábæru ferð enda góðir vinir saman að ferðast.

Lagt var af stað snemma morguns, hópurinn sóttur á nokkrum stöðum og ekið sem leið lá til Landeyjarhafnar. Gleðin að fara saman í Herjólf og sigla til eyjunnar fögru var algjör. Allir krakkarnir fengu að fara í skipstjórnarklefann, prófa stól skipstjórans og húfu hans. Það fannst þeim alveg meiriháttar. Þau fengu að sjálfsögðu öll mynd af sér með húfuna góðu.

IMG_0168--2-

Þegar til Vestmannaeyja var komið var upplagt að hefja ferðina á því að skoða Herjólfsdal og var þeim sagt frá gleðinni sem þarna er ár hvert þegar þjóðhátíð fer fram. Að lokinni skoðunarferðinni um dalinn var hópnum boðið í dýrindis súpu í húsnæði Rauða krossins í Vestmannaeyjum þar sem nægar veitingar voru fyrir alla. Þaðan fór enginn svangur, það er eitt sem er víst. Eftir matinn var farið í safnið Eldheima og fengu allir góða innsýn inn í þann veruleika sem blasti við eyjamönnum þegar Vestmannaeyjagosið átti sér stað 23. janúar 1973. Hópurinn hélt svo aftur í rútuna og fékk skoðunarferð um eyjuna og átti m.a. skemmtilegt stopp í Gaujulundi. Allir voru sammála um hversu fallegur hann er og voru margar myndir teknar þar.

Að lokum var farið að spranga, hópurinn fékk kennslu um hvernig ætti að bera sig að og fengu allir að prófa sem vildu. Það vildu flestir og þá sérstaklega eftir að sýrlenski fjölskyldufaðirinn á Selfossi reið á vaðið og sýndi ótrúleg tilþrif, líkt og hann hefði aldrei gert neitt annað. Þetta var heljarinnar skemmtunn sem á eftir að lifa lengi í minni okkar. Hópurinn hélt svo heim á leið með bros á vör og gleði í hjarta. Allir sáttir og sælir eftir daginn. Nú geta krakkarnir, bent yfir hafið og sagt „ég hef farið þangað“ - eyjunnar sem við sjáum móta fyrir í fjarska.

IMG_0174--2-

Ferðin hefði ekki orðið að veruleika ef ekki hefði verið fyrir stuðning þeirra fyrirtækja sem styrktu okkur til fararinnar. Við hjá Rauða krossinum í Hveragerði og Árnessýslu viljum því koma á framfæri okkar bestu þökkum til; Eimskips fyrir að gefa okkur ferðina með Herjólfi til Vestmannaeyja, Arion banka í Hvergarði fyrir fjárstyrkinn, Þá bíla fyrir góðan afslátt á rútunni, Eldheima fyrir góðan afslátt inn á safnið fyrir hópinn, Almari bakara og kökugerð HP ehf. fyrir bakkelsið. Grímur kokkur fær okkar bestu þakkir fyrir að elda súpu ofan í hópinn og Vinnslustöðin hf. í Vestmannaeyjum fyrir humarinn. Að lokum þökkum við Rauða krossinum í Vestmannaeyjum fyrir frábærar móttökur.

IMG_0250