• Undirritun-samstarfssamnings_Isavia

Rauði krossinn og Isavia gera samstarfssamning

26. febrúar 2018

Rauði krossinn á Íslandi og Isavia hafa gert með sér samstarfssamning um kaup á a.m.k. 7 fjöldahjálparkerrum sem staðsettar verða í öllum landshlutum. 

Isavia rekur flugvelli víða um land og ber að tryggja viðbúnað vegna flugslysa á og við flugvelli. Rauði krossinn sinnir m.a. fjöldahjálp í almannavarnartilfellum og ef flugslys verða gegnir Rauði krossinn lykilhlutverki í uppsetningu fjöldahjálparstöðva og almennri umönnun þolenda. Það er því markmið samstarfssamningsins að auka enn betur viðbúnað ef upp koma alvarleg flugatvik.

Fjöldahjálparkerrur innihalda ýmsan búnað til að hlúa að þolendum á neyðartímum s.s. bedda, teppi, mat, rafstöðvar, leikföng, skyndihjálparbúnað, verkfæri o.m.fl.

Kerra

„Samstarf Rauða krossins og Isavia hefur verið gott. Isavia fagnar því að getta stutt Rauða krossinn með þessum hætti, en hann er mikilvægur aðili í flugslysaáætlunum um allt land. Hlutverk RKÍ er að sinna óslösuðum og fjölskyldum þeirra og koma þeim til aðstoða og fjöldahjálparkerrurnar gera þeim enn frekar mögulegt að vinna það mikilvæga starf,“ segir Björn Óli Hauksson, forstjóri Isavia.

„Það er gríðarlega mikilvægt að hafa búnað til staðar í öllum landshlutum ef upp koma náttúruhamfarir, flugatvik eða önnur fjöldaslys. Við vonum að við þurfum að nota þessar fjöldahjálparkerrur sem minnst, en það er gott að hafa þær tilbúnar ef á reynir og Rauði krossinn er afar þakklátur fyrir samstarfið við Isavia“ segir Jón Brynjar Birgisson, sviðsstjóri innanlandssviðs Rauða krossins.