• Syrian-refugees-landing

Ríflega tvöfalt fleiri hælisumsóknir í febrúar

15. mars 2016

Á fyrstu tveimur mánuðum ársins bárust 87 hælisumsóknir, jafnmargar og fyrstu sex mánuði ársins í fyrra.

Í febrúar bárust 38 umsóknir um hæli á Íslandi frá einstaklingum frá ellefu löndum og einum ríkisfangslausum hælisleitenda. Til samanburðar bárust 15 hælisumsóknir í febrúar árið 2015 þannig að um er að ræða rúmlega tvöföldun á fjölda umsókna miðað við sama tímabil í fyrra. Sé miðað við þessar tölur má búast við að umtalsvert fleiri sæki um hæli á Íslandi í ár en í fyrra, en árið 2015 bárust fleiri hælisumsóknir en nokkru sinni áður eða 355 umsóknir. Í janúar 2016 sóttu 49 um hæli á Íslandi, ríflega þrefalt fleiri en í janúar 2015.

Í febrúar á þessu ári var þrettán umsækjendum veitt hæli, viðbótarvernd eða dvalarleyfi af mannúðarástæðum á Íslandi, níu hjá Útlendingastofnun og fjórum hjá Kærunefnd útlendingamála.

Flestir umsækjendanna í febrúar 2016 komu frá Albaníu, eða alls níu. Næstflestar umsóknir, sex talsins, bárust frá Makedóníumönnum auk þess sem fimm umsóknir bárust bæði frá Írökum og Nígeríumönnum. Fjórar umsóknir bárust frá Ganamönnum og þrjár frá Afgönum. Einn Kanadamaður, Pakistani, Rússi, Serbi og Sýrlendingur sóttu um hæli í febrúar og einn hælisleitandi er ríkisfangslaus. Alls sóttu 26 karlmenn og tólf konur um hæli. 29 þeirra sem sóttu um hæli í febrúar eru á fullorðinsaldri en níu eru börn.

Útlendingastofnun veitti fjórum einstaklingum hæli og fimm viðbótarvernd. Stofnunin tók ákvörðun í alls 36 málum hælisleitenda í janúar. Sex var synjað um vernd eftir efnismeðferð og 20 var synjað um efnismeðferð á grundvelli Dyflinnarreglugerðarinnar. Þá var einum synjað um efnismeðferð þar sem viðkomandi hælisleitandi hefur að mati Útlendingastofnunar þegar hlotið einhverskonar vernd í öðru ríki innan Evrópu. Heildarhlutfall hælis- eða viðbótarverndarveitinga hjá Útlendingastofnun var því 25% í febrúar. Málsmeðferðartími í þeim málum sem ákvarðað var í á tímabilinu var að meðaltali 112 dagar.

Á sama tímabili veitti kærunefnd útlendingamála fjórum hælisleitendum dvalarleyfi af mannúðarástæðum. Nefndin úrskurðaði í samtals 28 málum. Tíu var synjað um vernd eftir efnismeðferð, ellefu var synjað um efnismeðferð á grundvelli Dyflinnarreglugerðarinnar og þremur synjað um efnismeðferð þar sem þeir hælisleitendur hafa að mati kærunefndar útlendingamála þegar hlotið einhverskonar vernd í öðru ríki innan Evrópu. Heildarhlutfall hælis- eða dvalarleyfisveitinga hjá kærunefnd útlendingamála var því 14,3% í febrúar. Málsmeðferðartími í þeim málum sem úrskurðað var í á tímabilinu að meðaltali 141 dagur.

Alls var hæli, viðbótarvernd eða dvalarleyfi af mannúðarástæðum veitt í um 20% mála hjá Útlendingastofnun eða kærunefnd útlendingamála og var meðalmálsmeðferðartíminn í þeim málum að meðaltali 124 dagar.

Í febrúar voru átján ákvarðanir Útlendingastofnunar kærðar til Kærunefndar útlendingamála.