• Sdb-training-captioned-1

Rúmlega 100 milljón króna framlag til Lýðstjórnarlýðveldisins Kongó

Mikilvægt framlag frá Rauða krossinum og utanríkisráðuneytinu

20. september 2018

Rauði krossinn á Íslandi, með dyggum stuðningi utanríkisráðuneytisins, hefur ákveðið að senda tæpar 106 milljónir króna til mannúðarverkefna vegna ebólufaraldurs og vopnaðra átaka í Lýðstjórnarlýðveldinu Kongó í Afríku.

Íbúar í Kongó standa frammi fyrir margþættum mannúðarvanda sem til er kominn vegna langvarandi vopnaðra átaka og ebólufaraldurs sem herjar á íbúa í nokkrum héruðum í landinu. Framlag Rauða krossins á Íslandi og utanríkisráðuneytisins er ætlað að styðja við neyðaraðgerðir Rauða kross hreyfingarinnar gegn viðvarandi ebólufaraldri með það að markmiði að ráða niðurlögum faraldursins og koma í veg fyrir frekari útbreiðslu á honum. Í átökunum í Kongó hafa konur og börn sætt miklu kynferðislegu ofbeldi og mun hluti af framlagi Íslands gera Rauða krossinum kleift að vinna enn frekar að því að koma í veg fyrir kynferðislegt ofbeldi með því að ræða við stríðandi fylkingar og fræða um alþjóðleg mannúðarlög sem banna hvers kyns kynferðislegt ofbeldi sem vopn í stríði. Síðast en ekki síst mun framlag Rauða krossins veita brýna mannúðaraðstoð til fólks sem hrakist hefur á flótta til nágrannaríkisins Úganda.

2018-08-11-photo-00000016Sjálfboðaliðar fá þjálfun í hvernig eigi að framkvæma öruggan og friðsælan máta. Mynd: IFRC 

„Undanfarin ár hafa íbúar Kongó orðið fyrir barðinu á ófriði þar sem alvarleg brot á alþjóðlegum mannúðarlögum eru nær daglegt brauð“ segir Atli Viðar Thorstensen, sviðsstjóri hjálpar- og mannúðarsviðs Rauða krossins á Íslandi. Þessi brot fela meðal annars í sér dráp, kynferðislegt ofbeldi, börn eru numin á brott af stríðandi fylkingum til að taka þátt í hernaði, ránum og fleira sem hefur valdið því að mikill fjöldi hefur orðið að flýja heimili sín og er annað hvort á flótta innan Kongó eða hefur leitað skjóls í nágrannaríkjum, þar á meðal í Úganda.“

Kynferðislegt ofbeldi er brot á almennum mannréttindum sem skilyrðislaust eru varin af alþjóðlegum mannúðarlögum á tímum vopnaðra átaka. Þrátt fyrir það færast vopnuð átök sífellt nær borgaralegu lífi þar sem gerðar eru aðfarir að óbreyttum borgurum. Konur og stúlkur eru í auknum mæli sérstök skotmörk stríðandi fylkinga þar sem kynferðislegt ofbeldi er kerfisbundið notað sem vopn í átökum. Rauði krossinn á Íslandi mun því verja fjármagni til Alþjóðaráðs Rauða krossins (ICRC) til að vinna gegn kynferðislegu ofbeldi m.a. með aukinni vitund stjórnvalda og stríðandi fylkinga um ákvæði alþjóðlegra mannúðarlaga líkt og Genfarsamninganna og hlúa að þolendum kynferðislegs ofbeldis, m.a. með auknu aðgengi að heilbrigðisþjónustu, aukins sýnileika og afkastagetu heilbrigðisþjónustu á svæðinu.

Ofan á langvarandi ófrið í landinu herjar nú ebólufaraldur á íbúa þessa sárafátæka og risastóra lands sem er tuttugu sinnum stærra en Ísland. „Við á Íslandi getum þó ýmislegt lagt á vogarskálarnar til aðstoðar í þessu landi“, segir Atli,  „og það ber að hafa það í huga að hver króna sem við leggjum í hjálparstarfið hefur margfalt virði í landi eins og Kongó. Við erum utanríkisráðuneytinu og ekki síst Mannvinum Rauða krossins ómetanlega þakklát fyrir þeirra mikilvæga stuðning við þetta lífsbjargandi mannúðarverkefni sem um leið stuðlar að auknu öryggi allra. Það að stöðva útbreiðslu ebólu sjá allir að er forgangsatriði en það skiptir líka gríðarlega miklu máli að koma í veg fyrir brot á mannúðarlögum, og þar með kynferðislegu ofbeldi sem vopni í stríði, sem iðulega verða til þess að fólk leggur á flótta en við verðum að hafa það í huga að fólki vill ekki leggja á flótta.“

Gerast Mannvinur Rauða krossins

Alls búa um sex milljónir í héraðinu Norður-Kivu í austurhluta landsins þar sem ebólufaraldurinn blossar nú og hafa verið staðfest tilfelli í níu borgum. Algengt er að smit berist á milli fólks þegar þeir sem hafa látist af völdum ebólu eru jarðsettir af fjölskyldu sinni. Þung áhersla verður í starfi Rauða krossins að aðstoða fólk við að jarðsetja ættingja sína og vini á öruggan og friðsælan máta og koma í veg fyrir frekari útbreiðslu sjúkdómsins.

Mannúðarástand í Lýðstjórnarlýðveldinu hefur hrakið mikinn fjölda fólks á flótta eftir lífsbjargandi mannúðaraðstoð. Frá ársbyrjun 2017 hafa að meðaltali átta þúsund einstaklingar hrakist á flótta frá landinu á dag. Talið er að um  3,8 milljónir einstaklinga séu á vergangi innan landamæra Lýðstjórnarlýðveldisins Kongó sem eru fjölmennustu fólksflutningar innan Afríku í dag. Langflestir hafa leitað til nágrannaríkisins Úganda. Rauði krossinn á Íslandi hefur aðstoðað flóttafólk þar í landi um þónokkurt skeið, m.a. með því að tryggja aðgang að hreinu vatni í flóttamannabúðum og þjálfa sjálfboðaliða til að hlúa að sálrænum erfiðleikum flóttafólks á svæðinu.

Heildarframlag Rauða krossins á Íslandi nemur alls tæpum 106 milljónum króna en alls koma um 70 milljónir af framlaginu af fjármagni rammasamnings við utanríkisráðuneytið um alþjóðlega mannúðaraðstoð 2018-2022. Tæplega 35 milljónir króna koma af eigin fjármagni Rauða krossins á Íslandi. Fyrir hönd alþjóðahreyfingar Rauða krossins og Rauða hálfmánans, þakkar félagið ráðuneytinu fyrir veittan stuðning.