Sameining deilda á Austurlandi

Rauði krossinn á Vopnafirði og á Héraði- og Borgarfirði eystra sameinast

1. nóvember 2018

Á mánudaginn sl. 29. október var haldinn stofnfundur sameinaðrar deildar Rauða krossins á Vopnafirði og Rauða krossins á Héraði og Borgarfirði eystra. Fundurinn var haldinn  á Bókakaffinu Hlöðum í Fellabæ.

Samþykkt var að nýja deildin heiti Rauði krossinn í Múlasýslu í samræmi við nafngiftir annarra Rauðakrossdeilda á landinu. Starfssvæði deildarinnar markast af Vopnafirði, Fljótsdalshéraði og Borgarfirði eystra.

Deildarstjórnin verður fimm manna og allt að fjórir í varastjórn. Þrír stjórnarmenn skulu koma frá Héraði, einn frá Vopnafirði og einn frá Borgarfirði eystra. Varamenn eru boðaðir á stjórnarfundi og hafa málfrelsi og tillögurétt. Varamenn skiptast þannig að tveir séu frá Héraði, einn frá Borgarfirði og annar frá Vopnafirði. 

Sameiningin gengur í gildi 1. janúar 2019.

Guðný Björnsdóttir frá landsskrifstofu Rauða krossins og Sveinn Kristinsson, formaður, mættu á fundinn ásamt stjórnarmönnum deildanna og sjálfboðaliðum.

 Á myndinni má sjá Svein formann, Sölva Kristinn Jónsson formann Vopnafjarðardeildar og Ragnhildi Rós Indriðadóttur, formann Héraðs- og Borgarfjarðardeildar að aflokinni undirskrift.  

Myndina tók Skarphéðinn Þórisson