• Halldor-Gislason-i-Malavi

Sendifulltrúi í Malaví

24. febrúar 2017

 Halldór Gíslason, sendifulltrúi Rauða krossins á Íslandi, er staddur í Malaví þar sem hann aðstoðar systurfélag Rauða krossins þar í landi við að brúa hið „stafræna“ bil og gera starfsfólki og sjálfboðaliðum þess kleift að nýta sér betur kosti upplýsingatækninnar í starfi sínu. Gott upplýsingaflæði er sérstaklega mikilvægt á tímum neyðarástands þegar koma þarf upplýsingum fljótt og örugglega á milli. Í verkefninu er lögð áhersla á sjálfbærni, en Microsoft heimilar Rauða kross landsfélögum í lágtekjuríkjum Afríku að nýta Office 365 hugbúnaðinn án endurgjalds. Einnig eru valdar leiðir við uppsetningu á hugbúnaði sem ekki eru taldar munu kalla á mikinn kostnað fyrir landsfélagið í framtíðinni hvað varðar viðhald og endurnýjun. Verkefnið mun ekki einungis koma starfsfólki og sjálfboðaliðum til góða í starfi þar sem boðleiðir skerpast heldur munu íbúar Malaví njóta góðs af verkefninu til framtíðar með aukinni skilvirkni hjálparstarfs Rauða krossins í Malaví.

Halldór er kerfisfræðingur hjá Íslandsbanka og er þetta fyrsta ferð hans á vettvang sem sendifulltrúi Rauða krossins á Íslandi.

Verkefnið í Malaví er styrkt m.a. af utanríkisráðuneytinu og unnið í samstarfi við Alþjóðasamband Rauða krossins og Rauða hálfmánann. Áður hafa sambærileg verkefni meðal annars verið unnin í Sierra Leone og Hvíta Rússlandi með góðum árangri.