Takk Mannvinir, sjálfboðaliðar og aðrir viðbragðsaðilar

21. desember 2020

Gerast mannvinur

Síðustu daga hefur Rauði krossinn í Múlasýslu opnað 3 fjöldahjálparstöðvar: á Seyðisfirði, Egilsstöðum og Eskifirði. Þær á Egilsstöðum og Seyðisfirði eru enn opnar fyrir fólk á svæðinu. Margir þurftu að yfirgefa húsin sín vegna aurskriða eins og við höfum öll fylgst með í fréttum. Tæplega 600 íbúar Seyðisfjarðar hafa komið í fjöldahjálparstöðvarnar eða skráð sig í gegnum Hjálparsímann 1717, en á neyðartímum er síminn nýttur sem upplýsingasími. Við minnum á að Hjálparsíminn og netspjallið er opið allan sólahringinn og má hver sem hafa samband.

Eitt það mikilvægasta við fjöldahjálparstöðvar er sálræni stuðningurinn sem fólk finnur fyrir með því að koma saman. Einnig eru sjálfboðaliðar Rauða krossins sérþjálfaðir í að veita áfallahjálp.

Í fjöldahjálparstöðvum er hvíldaraðstaða, matur og kaffi í boði og hvetur Rauða krossinn fólk á svæðinu til að nýta sér þessa aðstoð eins mikið og það þarf. Einnig getur fólk sem vantar fengið föt í fjöldahjálparstöðinni á Egilsstöðum.

Opnun fjöldahjálparstöðva er hluti af neyðarvörnum Rauða krossins. Að opna fjöldahjálparstöðvar krefst mikils skipulags og fá sjálfboðaliðar okkar reglulega þjálfun í að bregðast við þegar áföll dynja yfir. Auk þess eru fulltrúar Rauða krossins starfandi í Aðgerðastjórn á Egilsstöðum og í Samhæfingastöðinni í Skógarhlíð.

Þetta gætum við ekki gert án mikilvægustu bakhjarla okkar: Mannvina. Ef þú vilt leggja Rauða krossinum lið á þessum erfiðu tímum, getur þú skráð þig sem Mannvin.

Við sendum okkar hlýjustu kveðjur austur og þökkum sjálfboðaliðum fyrir austan og einnig þeim sjálfboðaliðum sem komu að norðan til að aðstoða fyrir þeirra vinnu. 

131908058_10225011840390073_1127181787852077484_o
Mynd: Vísir.is

399134.2e16d0ba.fill-700x494-c100Mynd: fréttablaðið.is

Fr_20201218_150262_1Mynd: RÚV