Almennar fréttir
Sjálfboðaliðar Rauða krossins aðstoða við smitrakningu almannavarna
11. ágúst 2021
Í kjölfar fjölgunar smita í samfélaginu hefur álag á smitrakningarteymi almannavarna aukist til muna. Almannavarnir leituðu því til Rauða krossins og hafa sjálfboðaliðar úr viðbragðshópum félagsins að undanförnu lagt hönd á plóg við að veita upplýsingar og stuðning til einstaklinga sem verið hafa útsettir fyrir smiti.
Ein af fjölmörgum viðbragðsaðgerðum í tengslum við baráttuna við kórónuveirufaraldurinn hér á landi er smitrakningarteymi almannavarna sem hefur það hlutverk að rekja smit og tryggja skimanir og sóttkví allra þeirra sem kunna að hafa verið útsett fyrir smiti hverju sinni.
Jóhann Björn Skúlason, sem stýrir smitrakningarteyminu, segir að þrátt fyrir verkefnafjölda og álag á teyminu séu föst stöðugildi þess í raun ekki mörg heldur frekar um fámennan kjarna sem leitað hefur getað til lögreglu- og hjúkrunarfólks.
Í kjölfar fjölgunar smita í samfélaginu að undanförnu hefur álag á smitrakningarteymið aukist til muna og ljóst orðið að teymið gæti ekki mikið lengur treyst á að kalla inn fólk úr öðrum störfum, þ.e. löggæslu og heilbrigðisþjónustu, eftir þörfum. Með það að markmiði að halda uppi áframhaldandi öflugri og skipulagðri smitrakningu leituðu almannavarnir því til Rauða krossins og hafa sjálfboðaliðar úr viðbragðshópum félagsins að undanförnu lagt hönd á plóg við að veita upplýsingar og stuðning til einstaklinga sem verið hafa útsettir fyrir smiti.
Í viðtali við Morgunblaðið sagði Jóhann Björn meðal annars: „Við göngum ekki í endalausa lögreglumenn og hjúkrunarfræðinga og við eigum erfitt með að ráða því það yrði ekki til langs tíma í senn. Við erum að fá til liðs við okkur sérfræðinga í að tala við fólk,“ og vísar þar til mikillar reynslu viðbragðshópa Rauða krossins í að veita einstaklingum andlegan stuðning og ráðgjöf, til dæmis í kjölfar áfalla og hamfara.
Það eru sjálfboðaliðar í viðbragðshópum Rauða krossins á höfuðborgarsvæðinu og Norðurlandi sem sinnt hafa verkefninu til þessa og sýnir það enn og aftur mikilvægt hlutverk félagsins í almanna- og neyðarvörnum landsins.
Þá ítrekar Rauði krossinn þakkir sínar til Mannvina en mánaðarlegur stuðningur þeirra gerir félaginu kleift að bregðast við hratt og örugglega, hvenær sem þörf er á. Ef þú vilt gerast Mannvinur, og þannig styðja neyðarvarnir og önnur verkefni Rauða krossins, þá er einfalt að gera það á mannvinir.is.
Fréttir af starfinu
FréttayfirlitStofnfundur Rauða krossins á höfuðborgarsvæðinu
Innanlandsstarf 07. maí 2024Rauði krossinn á höfuðborgarsvæðinu og Rauði krossinn í Hafnarfirði, Garðabæ og Kópavogi boða til stofnfundar nýrrar sameinaðrar deildar.
Vel heppnaður aðalfundur Rauða krossins um helgina
Almennar fréttir 07. maí 2024Rauði krossinn á Íslandi hélt aðalfund síðasta laugardag. Farið var yfir starf félagsins síðustu tvö ár, litið til framtíðar, lög endurskoðuð og nýir stjórnarmeðlimir kosnir.
Rauði krossinn hvetur til móttöku kvótaflóttafólks og lýsir áhyggjum af vaxandi útlendingaandúð
Almennar fréttir 04. maí 2024Rauði krossinn samþykkti tvær ályktanir á aðalfundi sínum fyrr í dag þar sem félagið skorar á stjórnvöld að standa við áform um að bjóða hingað kvótaflóttafólki og lýsir áhyggjum af vaxandi andúð í garð innflytjenda og flóttafólks.