Hundavinir er eitt vinaverkefna Rauða krossins en þar er hundurinn í aðalhlutverki en það fyrirkomulag er þekkt víða um heim. Hundavinanámskeiðið samanstendur af bóklegum og verklegum hluta og er sérsniðið fyrir verðandi heimsóknarvini með hund. Hundar á aldrinum 2ja til 10 ára geta tekið þátt í verkefninu. Námskeiðið fer fram 7. júní í húsnæði Rauða krossins, Viðjulundi 2, Akureyri.

Fyrsta skref námskeiðsins er grunnmat þar sem lagt er mat á hvern og einn hund. Til þess að geta haldið áfram á námskeiðinu þarf hundurinn að standast matið. Grunnhundamatið fer fram fyrir hádegi sama dag og námskeiðið, 7. júní. Einn hundur er metinn í einu og verður þátttakendum raðað niður á tímasetningar.

Námskeiðið sjálft byrjar svo klukkan 12 á bóklegum hluta námskeiðsins sem tekur um það bil þrjár klukkustundir. Að því loknu er gert hlé á námskeiðinu og þátttakendur sækja hunda sína og halda svo áfram í verklega hlutann. Ef hundurinn er mjög rólegur er ekkert því til fyrirstöðu að hann sitji bóklega hlutann.

Á námskeiðinu fræðast þátttakendur um verkefnið Heimsóknavinur með hund.
Markmið námskeiðsins er eftirfarandi:
- Að skilja hlutverk eiganda og hunds sem heimsóknavinir
- Að hafa grunnþekkingu á hundum
- Að kunna að lesa merkjamál hunds


Áður en farið er af stað í heimsóknarverkefni þurfa sjálfboðaliðar einnig að sækja námskeið fyrir nýja sjálfboðaliða í heimsóknarvinaverkefnum. Slíkt námskeið tekur um 1.5 klukkustundir.

Allar frekari upplýsingar um námskeiðið og heimsóknavinaverkefni má nálgast í gegnum netfangið soleybs@redcross.is eða í síma 570 4272