Alþjóðastarf
Rauði hálfmáninn fyrstur á vettvang í Derna
14. september 2023
Rauði hálfmáninn í Líbíu brást strax við vegna flóðsins í Derna sem kostaði þúsundir lífið og björgunaraðgerðir standa enn yfir, en aðstæður eru afar krefjandi og það er skortur á ýmsum nauðsynjavörum.

Eftir að stormurinn Daníel skall á Líbíu voru starfsmenn og sjálfboðaliðar Rauða hálfmánans í Líbíu fyrstir á vettvang og hófu rýmingar, ásamt því að veita skyndihjálp og sinna björgunarstörfum, þrátt fyrir að skorta ýmsar nauðsynjar.
Rauði krossinn á Íslandi sendir innilegar samúðarkveðjur til fjölskyldna þeirra þriggja sjálfboðaliða Rauða hálfmánans í Líbíu sem létust við björgunarstörf, sem og allra annara sem misstu ástvin í þessum stórfelldu hamförum. Við óskum þeim sem slösuðust skjóts bata og hugur okkar er hjá fjölskyldum þeirra sem eru týndir.
Rauði hálfmáninn í Líbíu ræsti út neyðarteymi sín áður en stormurinn skall á og virkjaði bráðamóttöku í höfuðstöðvum sínum, ásamt því að senda út viðvörun til þeirra deilda sem voru líklegar til að þurfa að bregðast við og senda út nauðsynlegan búnað og varning.
Björgunaraðgerðir standa enn yfir. Helstu forgangsverkefni eru að veita þolendum hamfaranna skyndihjálp og sinna grunnþörfum þeirra, ásamt því að leita að þeim sem hafa týnst og sameina fjölskyldur á ný.
Erfiðlega hefur gengið að koma búnaði á vettvang, sérstaklega fjarskiptabúnaði, björgunarbúnaði og öryggisbúnaði fyrir sjálfboðaliða.
Íbúar Líbíu hafa lifað við áralöng átök og upplifa nú í ofanálag stórfelldar hamfarir sem ríkisstjórn Líbíu og Rauði hálfmáninn í Líbíu geta ekki sinnt án aðstoðar. Þörfin fyrir mannúðaraðstoð er gríðarleg og sem stendur er mest þörf á neyðarskýlum, sálrænum stuðningi, heilbrigðisþjónustu, vatns- og hreinlætisaðstöðu, mat og öðrum nauðsynjum á borð við matreiðsluáhöld, föt og vasaljós.
Landsfélög Rauða krossins og Rauða hálfmánans starfa saman sem ein fjölskylda og hafa þegar boðið Rauða hálfmánanum í Líbíu aðstoð sína.
Fréttir af starfinu
Fréttayfirlit
36 milljónir króna til mannúðarstarfs í Úkraínu
Alþjóðastarf 03. október 2025Frá því átökin í Úkraínu hófust hefur Alþjóðasamband Rauða krossins, í samstarfi við úkraínska Rauða krossinn, veitt meira en 17 milljónum einstaklinga mannúðaraðstoð. Á sama tíma hefur Rauði krossinn á Íslandi, með dyggum stuðningi utanríkisráðuneytisins, veitt rúmlega 265,8 milljónum króna til mannúðarstarfs í landinu.

Rauði krossinn neyðist til að yfirgefa Gazaborg
Alþjóðastarf 01. október 2025Fánar við skrifstofur Alþjóðaráðs Rauða krossins í Gazaborg hafa verið dregnir niður og allt starfsfólkið flutt sig til suðurhluta Gaza. Harðandi hernaðaraðgerðir leiddu til þess að þessi erfiða ákvörðun var tekin.

Grindvíkingar í fókus: Nýtt stuðningsverkefni
Innanlandsstarf 01. október 2025Rauði krossinn á Íslandi hefur ýtt úr vör nýju verkefni og býður Grindvíkingum á fjölda námskeiða, vinnustofa og viðburða, endurgjaldslaust. Verkefnið er unnið í samstarfi við KVAN, í samráði við Grindavíkurbæ og með stuðningi Rio Tinto.