Alþjóðastarf
Jarðskjálfti í Afganistan
22. júní 2022
Snemma í morgun reið yfir mannskæður jarðskjálfti í suðausturhluta Afganistan, 6.1 að stærð. Afganski Rauði hálfmáninn með stuðningi Alþjóðasambands Rauða krossins og Rauða hálfmánans (IFRC) er nú þegar á staðnum og starfsfólk og sjálfboðaliðar frá nálægum deildum sinnir neyðarstarfi.
Fjarskipti eru í lamasessi sem sýnir enn á ný hve mikilvægt það er að hafa fólk til staðar sem getur brugðist strax við, eins og Rauða kross hreyfingin leggur mikla áherslu á. Afganski Rauði hálfmáninn starfrækir deildir í öllum 34 héruðum Afganistan og er með fleiri en 30.000 sjálfboðaliða úr röðum heimafólks sem sinnir ýmsu sjálfboðnu starfi.
Nauðsynleg hjálpargögn og sjúkrabílar eru nú þegar lagðir af stað á svæðið sem og færanlegar heilsugæslur sem nú þegar voru starfandi í nálægum héruðum.
Jarðskjálftinn bætist ofan á aðrar hörmungar í Afganistan. Meira en 50% Afgana eru í mikilli þörf fyrir mannúðaraðstoð vegna ýmissa hamfara s.s. átaka, þurrka og annarra öfga í veðri tengdum hlýnun jarðar, gríðarlegra efnahagserfiðleika, laskaðs heilbrigðiskerfis og lítilla innviða. Stuðningur frá heiminum öllum er afskaplega mikilvægur og þú getur lagt þitt af mörkum með því að gerast Mannvinur Rauða krossins.
Rauði krossinn á Íslandi hélt neyðarsöfnun fyrir Afganistan í fyrra þar sem 40 milljónir voru sendar til Alþjóðaráðs Rauða krossins (ICRC) sem hefur sinnt lífsbjargandi mannúðaraðstoð í landinu um langt skeið og gerir enn. Stjórnvöld hafa styrkt myndarlega við verkefni í Afganistan og unnið er að undirbúningi komu kvótaflóttafólks frá Afganistan til landsins á næstunni. Þú getur lagt þitt af mörkum með því að gerast Mannvinur Rauða krossins.
Fréttir af starfinu
Fréttayfirlit
Þörf á tafarlausum pólitískum aðgerðum
Alþjóðastarf 18. september 2025„Öll ríki verða að leggja sín þyngstu lóð á vogarskálarnar svo koma megi á vopnahléi strax,“ segir Gísli Rafn Ólafsson, framkvæmdastjóri Rauða krossins á Íslandi um ástandið á Gaza. „Við höfum ekki lengri tíma. Þetta er lokaviðvörun til stjórnvalda. Núna verður að bregðast við.“
Bestu vinir seldu límonaði og heimabakað fyrir Rauða krossinn
Almennar fréttir 17. september 2025„Við viljum hjálpa öðrum,“ sögðu vinirnir Andrea, Íris og Rúrik úr Hafnarfirði sem söfnuðu tæplega 15 þúsund krónum fyrir Rauða krossinn.
Bak við tjöldin í neyðarsjúkrahúsinu á Gaza
Alþjóðastarf 15. september 2025Forgangsraða þarf mat á neyðarsjúkrahúsi Rauða krossins í Rafah. Fyrst fá sjúklingarnir og aðstandendur þeirra að borða. Svo starfsfólkið. Mitt í neyðinni upplifir fólk fágæt en dýrmæt gleðileg augnablik. Eins og að sjá stúlku sem missti fótinn ganga á ný.