Verklags- og úthlutunarreglur

Styrktarsjóðurinn Þróttur Grindvíkinga 2024–2026

Tilgangur:
Setja skýran ramma um ráðstöfun þess fjármagns sem Rauða krossinum hefur verið falið að ráðstafa skv. styrktarsamningi við Rio Tinto 1. september 2024 til 31. ágúst 2026.

Nefndin annast úthlutun styrkja samkvæmt reglum en getur víkið frá þeim í sérstökum tilfellum með skráðum rökstuðningi. Nefndarmenn skulu virða hæfisreglur og víkja sæti við hættu á óhlutdrægni.

Viðmið fyrir styrkveitingar:

• Verkefni eflir seiglu Grindvíkinga.
• Umsækjendur séu lögpersónur með samfélagsleg verkefni utan lögbundins starfs.
• Verkefni bæti andlega líðan eða félagsleg tengsl.
• Verkefni samræmist grunngildum Rauða krossins: mannúð, óhlutdrægni, hlutleysi og sjálfstæði.

Umsóknartímabil er frá 25. október 2024 til 1. júní 2026 en framkvæmd verkefnis þarf að vera lokið fyrir 31. ágúst 2026. Tekið er á móti umsóknum í gegnum vefhlekk.

Sækja um hér

Úthlutunarnefnd fer yfir óafgreiddar umsóknir á fundum sínum annan hvern föstudag meðan á gildistíma reglnanna stendur. Ritari úthlutunarnefndar svarar umsækjendum skriflega í tölvupósti. 

Með umsókn skal fylgja lýsing á: 

• Verkefninu
• Tilgangi þess
• Hvernig verkefnið styðji við markmið sjóðsins
• Áætlun um fjölda viðburða, fjölda þátttakenda og hvernig árangur verði mældur
• Upphæð sem sótt er um

Umsækjandi skal leggja fram ánægjukönnun fyrir þátttakendur.
Ef að umsækjandi framkvæmir sínar eigin ánægjukannanir þá óskar Rauði krossinn eftir afriti af þeim svo fremi sem þær séu nafnlausar og persónuverndarstefna leyfi það.  

Umsækjandi skal skila greinargerð innan tveggja mánaða frá lokum verkefnis þar sem ofangreint kemur fram. Tölulegar upplýsingar skulu vera hluti af greinargerðinni í samræmi við ofangreindan d-lið. 

Rauði krossinn á Íslandi greiðir styrkinn beint á reikning styrkþega innan 30 daga frá samþykkt styrkveitingar í samræmi við greiðslubeiðni frá úthlutunarnefndinni. Fjármagnið er eingöngu greitt inn á reikning lögpersónu en ekki persónulegan reikning einstaklings. 

Persónugreinanlegar upplýsingar koma fram með eftirfarandi hætti: 

• Í umsókn skal koma fram heiti lögpersónu og nafn, kennitala, símanúmer og netfang ábyrgðaraðila verkefnis.  
• Ekki er farið fram á nöfn, kennitölur eða persónugreinanlegar upplýsingar um það fólk sem nýtir sér þau verkefni sem styrkir eru veittir til. Skráningar og mælingar miðast við fjölda, ánægjukannanir og önnur ópersónugreinanleg gögn. 
• Allar umsóknir, bæði þær sem eru samþykktar og þær sem er hafnað eru varðveittar þangað til lokaskýrsla verkefnisins Þróttur Grindvíkinga hefur verið rituð og staðfest af gefanda fjármagnsins. Miðað er við að persónugreinanlegum gögnum verði eytt fyrir 31. desember 2026. 

Umsækjandi ábyrgist að þær upplýsingar sem koma fram í umsókninni séu sannar og réttar. Heimilt er að krefjast endurgreiðslu ef fram koma upplýsingar um að málsatvik hafi ekki verið í samræmi við þær upplýsingar sem komu fram í umsókn. 

Stjórn Rauða krossins á Íslandi ber ábyrgð á skráningu og meðferð fjármuna í samræmi við lög félagsins og lög frá Alþingi um skráningarskyldu félaga til almannaheilla með starfsemi yfir landamæri (nr. 119/2019). 

Úthlutunarnefnd ber ábyrgð á því að farið sé með persónugreinanlegar upplýsingar í samræmi við lög frá Alþingi um persónuvernd og vinnslu persónuupplýsinga (nr. 90/2018). 

Verklagsreglurnar taka gildi fimmtudaginn 17. október 2024 og gilda til 31. ágúst 2026. Reglurnar verða endurskoðaðar á sex mánaða fresti.