Almennar fréttir
95 ár í þágu samfélagsins
10. desember 2019
Rauði krossinn á Íslandi er 95 ára í dag.
Í hartnær heila öld höfum við staðið þétt við bakið á þjóðinni og brugðist við þörfum hverju sinni. Við erum fjölmennt félag sjálfboðaliða sem starfar eftir alþjóðlegum hugsjónum með mannúð að leiðarljósi. Við erum Rauði krossinn á Íslandi.
Á fyrstu áratugum tuttugustu aldar var mikil þörf á aukinni heilbrigðisþjónustu og þekkingu fólks á mikilvægi heilbrigðis og hreinlætis. Hið nýstofnaða Rauða kross félag fyllti að hluta til í skarðið með þjálfun hjúkrunarfólks, kaupum og rekstri sjúkrabíla, fræðslu um hreinlæti, kennslu í skyndihjálp, blóðsöfnun og rekstri sjúkraskýla í verstöðvum landsins. Síðar bættist við rekstur sjúkrahótels, hjálpartækjabanka fyrir fólk með fötlun og rekstur sumardvalarheimila fyrir börn.
Heilbrigðisyfirvöld og háskólar hafa síðar tekið við mörgum þessara nauðsynlegu viðfangsefna, en félagið heldur þó enn úti stórum flota sjúkrabíla um allt land og fræðir þjóðina um skyndihjálp.
Börn og ungmenni hafa stutt okkur dyggilega frá upphafi, m.a. með mikilvægri fjáröflun með sölu merkja á öskudag og hafa haldið hlutaveltur fyrir utan verslanir lengur en nokkurt okkar man.
Hlutverk félagsins í almannavörnum breyttist á einni nóttu við upphaf Vestmannaeyjagossins í janúar 1973 þegar fjölmargar fjöldahjálparstöðvar voru opnaðar undir merkjum félagsins. Sjálfboðaliðar tóku að sér gríðarmikið hjálparstarf næstu árin í Eyjum og um allt land. Síðustu áratugi hafa sjálfboðaliðar brugðist mörg þúsund sinnum við hvers kyns neyð með fjölbreyttum stuðningi við þolendur náttúruhamfara, hópslysa og annarra atburða. Við búum að vel þjálfuðum sjálfboðaliðum um allt land sem eru búnir undir viðbrögð við náttúruhamförum hvenær sem er og hvar sem þær verða.
Rauði krossinn hefur safnað fötum hér á landi í meira en 80 ár. Fyrir miðja síðustu öld hófum við söfnun fyrir fjölskyldur sem bjuggu við fátækt og úthlutum enn fatnaði til þeirra sem á þurfa að halda. Í dag gerum við öllum íbúum landsins kleift að „gefa í Rauða krossinn“ þann fatnað sem ekki er lengur þörf fyrir. Afrakstur söfnunarinnar er ómetanleg fjáröflun fyrir hjálparstarf félagsins hér á landi og erlendis.
Rauði krossinn á Íslandi hefur tekið þátt í alþjóðlegu hjálparstarfi Rauða kross hreyfingarinnar síðan 1945 þegar við sendum okkar fyrsta sendifulltrúa til að sinna hjálparstarfi í Evrópu á tímum ólýsanlegra hörmunga sem höfðu þá varað í tæp sex ár. Mörg hundruð hjálparstarfsmenn hafa síðan haldið út í heim til að sinna t.d. heilbrigðisþjónustu, vatns- og hreinlætisverkefnum, dreifingu hjálpargagna og sálrænum stuðningi. Áhrifa okkar gætir víða um heim þar sem við höfum komið fólki til aðstoðar á tímum styrjalda, náttúruhamfara og annarra þrenginga, oft á svæðum sem fá önnur samtök hafa aðgengi að eða geta jafnvel ekki starfað á.
Á hverjum degi styðja sjálfboðaliðar Rauða krossins við mikinn fjölda fólks hér á landi. Heimsóknavinir heimsækja fólk sem býr við einsemd, heilbrigðismenntaðir sjálfboðaliðar veita skaðaminnkun og heilbrigðisaðstoð fyrir fólk með vímuefnavanda, aðrir starfa í athvarfi fyrir heimilislausar konur, veita ráðgjöf og stuðning í Hjálparsíma Rauða krossins 1717, veita fjölbreytta þjónustu við flóttafólk, innflytjendur og umsækjendur um alþjóðlega vernd og eru alltaf til staðar, allri þjóðinni til heilla.
Við í Rauða krossinum horfum bjartsýn til framtíðar. Rauði krossinn gengur um þessar mundir í gegnum breytingar í samræmi við nýjar hnattrænar áskoranir. Landsmenn munu verða varir við aukna áherslu okkar í umhverfis- og loftslagsmálum, aukinn fjölbreytileika í starfi okkar vegna breyttrar samsetningar þjóðarinnar, aukna áherslu á jafnrétti og virkara samtal við ýmsa hópa samfélagsins.
Ég vil nota tækifærið og bjóða ykkur öllum að ganga formlega til liðs við okkur með sjálfboðnu starfi eða mánaðarlegum fjárstuðningi Mannvina Rauða krossins.
Til hamingju með afmælið, kæru Rauða kross félagar.
Til hamingju, landsmenn, með Rauða krossinn.
Sveinn Kristinsson, formaður Rauða krossins á Íslandi.
Fréttir af starfinu
FréttayfirlitÖflug skaðaminnkun en þörfin eykst stöðugt
Innanlandsstarf 22. apríl 2024Rauði krossinn opnar neyslurými á ný innan skamms. Þessi árangur næst í kjölfar öflugrar og árangursríkrar vinnu í þágu skaðaminnkunar hjá félaginu, en Hafrún Elísa Sigurðardóttir, teymisstýra í skaðaminnkun, segir að þörfin sé sífellt að aukast.
Rio Tinto styrkir Rauða krossinn um 208 milljónir vegna jarðhræringa við Grindavík
Innanlandsstarf 18. apríl 2024Rio Tinto hefur veitt Rauða krossinum á Íslandi styrk að upphæð 208 milljónir króna, eða jafnvirði 1,5 milljónum dollara, til stuðnings samfélagsins sem hefur orðið fyrir áhrifum jarðskjálfta og eldgosa í og við Grindavík. Um er að ræða hæsta styrk sem fyrirtæki hefur veitt Rauða krossinum á Íslandi til verkefna innanlands.
Nýtt neyslurými opnað í Borgartúni: Stórt skref í skaðaminnkun
Almennar fréttir 12. apríl 2024Eftir langa bið er loksins að koma upp nýtt neyslurými sem staðsett verður í Borgartúni.