Almennar fréttir
Ákall til stjórnvalda vegna mannúðarkrísu á Gaza-svæðinu
15. október 2023
Eftirfarandi ákall var sent til íslenskra stjórnvalda síðastliðið föstudagskvöld.

Alþjóðaráð Rauða krossins hefur sent frá sér neyðarkall, sem Rauði krossinn á Íslandi tekur undir, vegna fyrirmæla ísraelskra yfirvalda til rúmlega milljón íbúa Gaza um að yfirgefa heimili sín innan sólarhrings.
Sólarhringur er ekki nægur tími til að rýma alla íbúa svæðisins, þar á meðal fólk með fötlun, aldraða, sjúklinga og veika og særða einstaklinga á sjúkrahúsum. Auk þess hafa íbúar engan öruggan stað til að fara á vegna þess að allt svæðið er umsetið og ómögulegt er að vita hvar næsta árás mun eiga sér stað.
Margir, þar á meðal fólk með fötlun, aldraðir og sjúklingar, munu ekki geta yfirgefið heimili sín. Samkvæmt alþjóðlegum mannúðarlögum ber að vernda alla almenna borgara, líka þá sem þurfa að verða eftir.
Fyrirmælin samræmast ekki alþjóðlegum mannúðarlögum. Umsátrið veldur því að íbúar hafa ekki aðgang að mat, vatni né rafmagni og þegar hernaðaröfl gefa fólki skipun um að yfirgefa heimili sín verður að gera allar mögulegar ráðstafanir til að tryggja að fólk hafi aðgang að grundvallarnauðsynjum eins og mat og vatni og að fjölskyldur séu ekki aðskildar.
Alþjóðaráð Rauða krossins er að efla þjónustu sína til að veita lífsbjargandi aðstoð, en teymi Rauða krossins þurfa hlé á átökum til að vinna á öruggan og skilvirkan hátt. Vegna umsátursins geta mannúðarsamtök eins og Rauði krossinn ekki aðstoðað við að flytja burt þá íbúa sem hefur verið skipað að fara. Þarfirnar eru yfirþyrmandi og mannúðarsamtök verða að geta aukið við hjálparstarf sitt.
Skrifstofa Alþjóðaráðs Rauða krossins fékk sömu fyrirmæli um að yfirgefa svæðið, sem og aðrar alþjóðastofnanir. Við höfum gríðarlegar áhyggjur af kollegum okkar í Gaza og fjölskyldum þeirra.
Við biðjum íslensk stjórnvöld um að tala máli þessa fólks á alþjóðavettvangi, svo hægt verði að koma í veg fyrir stórkostlegar mannlegar hörmungar og þjáningu almennra borgara.
Heimsbyggðin verður að grípa inn í til að hjálpa þessu fólki. Stríð er ekki svarið. Morð á saklausum borgurum og eyðilegging innviða fyrir almenning er ekki svarið. Allir aðilar verða að virða alþjóðleg lög um hernað og vernda almenna borgara.
Fréttir af starfinu
Fréttayfirlit
Fjármögnun neyslurýma áskorun um alla Evrópu
Innanlandsstarf 25. júní 2025Þrátt fyrir að neyslurými fyrir vímuefni hafi fyllilega sannað gildi sitt gagnvart bæði einstaklingum og samfélögum glíma þau við sama vandamálið, hvort sem þau eru í Barcelona eða Borgartúni. Starfsfólk skaðaminnkunarverkefna Rauða krossins sótti upplýsandi ráðstefnu í Strassborg.

Nýtt forvarnarátak: Öryggi barna í sundi
Innanlandsstarf 23. júní 2025„Drukknun er algengari en flestir halda og stundum er því talað um hinn þögla faraldur,“ segir Hildur Vattnes Kristjánsdóttir, teymisstjóri skyndihjálpar hjá Rauða krossinum. Félagið hefur hleypt af stokkunum fræðslu- og forvarnarátaki um öryggi barna í sundi í samvinnu við Reykjavíkurborg og Samtök forstöðumanna sundstaða á Íslandi.

Sigríður tekur við formennsku af Silju Báru
Almennar fréttir 19. júní 2025„Ég tek við starfi formanns með mikilli auðmýkt, tilhlökkun og virðingu fyrir öllum þeim sem starfa fyrir Rauða krossinn, bæði sjálfboðaliðum og starfsfólki,“ segir Sigríður Stefánsdóttir, nýr formaður Rauða krossins á Íslandi.