Almennar fréttir
Fataverkefni Rauða krossins vinnur þrekvirki á tímum heimsfaraldurs
26. ágúst 2021
Fatasöfnun Rauða krossins hefur glímt við margvíslegar áskoranir allt frá upphafi heimsfaraldursins Covid 19 en starfseminni hefur verið haldið gangandi allt frá upphafi heimsfaraldursins. Nú er þó svo komið að Rauði krossinn vill biðla til allra landsmanna að leggja sitt af mörkum og taka þátt í þessu mikilvæga samfélagsverkefni með okkur.
Rauði krossinn á Íslandi tekur á móti fatnaði um allt land í þar til gerðum söfnunargámum og selur föt til erlendra endurvinnsluaðila og í verslunum sínum víðsvegar um landið. Þar á meðal eru fjórar verslanir á höfuðborgarsvæðinu, í Kringlunni, á Hlemmi, Mjódd og Laugavegi 12. Einnig eru verslanir víða á landsbyggðinni, t.d. á Akureyri, Egilstöðum og Borgarnesi. Þá úthlutar Rauði krossinn fatnaði til einstaklinga sem á þurfa að halda.
Fatasöfnun Rauða krossins hefur glímt við margvíslegar áskoranir allt frá upphafi heimsfaraldursins Covid 19. Mikið hefur safnast í fatagáma okkar þar sem margir nýta tíma heima til þess að taka til í skápunum. Við erum sannarlega þakklát fyrir allan þann stuðning því fataverkefni Rauða krossins er ein mikilvægasta fjáröflun félagsins. Í verkefninu er stólað á vinnuframlag sjálfboðaliða og samfélagsþjóna en allt frá upphafi heimsfaraldursins hefur stórlega fækkað í þeim hópi sem hefur haft mikil áhrif á verkefnið, sérstaklega á höfuðborgarsvæðinu. Á sama tíma hefur ekkert lát orðið á því magni sem okkur berst auk þess sem endurvinnsluaðilar gera sífellt auknar kröfur um flokkun. Öll grunnflokkun textíls er mjög mannaflafrek sem er mikil áskorun á tímum heimsfaraldurs, bæði í fataverkefni Rauða krossins og hjá endurvinnsluaðilum erlendis.
Þrátt fyrir manneklu er unnið mikið þrekvirki í fataverkefninu á hverjum degi. Starfseminni hefur verið haldið gangandi allt frá upphafi heimsfaraldursins. Allt sem safnast er endurnýtt hjá Rauða krossinum, á sama tíma og önnur lönd hafa þurft að brenna eða urða textíl.
Heimsfaraldurinn hefur þannig haft margvísleg áhrif á endurvinnslu á fötum í heiminum. Til að mynda hefur eftirspurn eftir notuðum fötum minnkað þar sem færri leggja leið sína í búðir og færri starfsmenn hafa sinnt flokkun. Allt sem skilað hefur verið í söfnunargáma Rauða krossinn á tíma heimsfaraldursins hefur þó verið endurnýtt. Rauði krossinn hefur því getað komið í veg fyrir urðun eða brennslu á allt að 3.000 tonnum af textíl árlega á Íslandi. Fataverkefni Rauða krossins er því mjög mikilvægur hlekkur í umhverfisvernd á Íslandi.
Nú er þó svo komið að Rauði krossinn vill biðla til allra landsmanna að leggja sitt af mörkum og taka þátt í þessu mikilvæga samfélagsverkefni með okkur. Í fyrsta lagi er mikilvægt að muna skila fötum í lokuðum pokum í fatagáma okkar. Ef söfnunargámur er fullur, þá þarf að fara með fötin í næsta söfnunargám og alls ekki skilja fötin eftir fyrir framan þar sem þau eyðileggjast. Í manneklu eins og nú er reynir líka á starfsfólk Rauða krossins að tæma alla gáma. Við biðlum því til allra að vinna með okkur í þessu verkefni með því að ganga vel um gámana. Í öðru lagi er vert að minna á að fatagámar okkar eru eingöngu fyrir föt, textíl og skó en ekki t.d. heimilisrusl eða matarleifar. Hér er þó rétt að minna á að við tökum á móti fötum, textíl og skóm óháð ástandi, þ.e. við tökum einnig á móti því sem er götótt og slitið sem fer þá til endurvinnslu í stað áframhaldandi notkunar. Í þriðja lagi hvetjum við alla að styðja við endurvinnslu í verki og kíkja við í verslunum Rauða krossins þar sem margvíslegar gersemar er að finna. Allur hagnaður rennur beint til mannúðarstarfs félagsins bæði hér á landi og á alþjóðavettvangi.
Síðast en ekki síst er hægt að gerast sjálfboðaliði í fataverkefni Rauða krossins, hvort heldur sem er í verslunum eða í flokkunarstöð okkar í Reykjavík.
Fréttir af starfinu
FréttayfirlitÖflug skaðaminnkun en þörfin eykst stöðugt
Innanlandsstarf 22. apríl 2024Rauði krossinn opnar neyslurými á ný innan skamms. Þessi árangur næst í kjölfar öflugrar og árangursríkrar vinnu í þágu skaðaminnkunar hjá félaginu, en Hafrún Elísa Sigurðardóttir, teymisstýra í skaðaminnkun, segir að þörfin sé sífellt að aukast.
Rio Tinto styrkir Rauða krossinn um 208 milljónir vegna jarðhræringa við Grindavík
Innanlandsstarf 18. apríl 2024Rio Tinto hefur veitt Rauða krossinum á Íslandi styrk að upphæð 208 milljónir króna, eða jafnvirði 1,5 milljónum dollara, til stuðnings samfélagsins sem hefur orðið fyrir áhrifum jarðskjálfta og eldgosa í og við Grindavík. Um er að ræða hæsta styrk sem fyrirtæki hefur veitt Rauða krossinum á Íslandi til verkefna innanlands.
Nýtt neyslurými opnað í Borgartúni: Stórt skref í skaðaminnkun
Almennar fréttir 12. apríl 2024Eftir langa bið er loksins að koma upp nýtt neyslurými sem staðsett verður í Borgartúni.