Almennar fréttir
Söfnuðu pening í fötuna í stað sælgætis
19. desember 2025
Börn sem þurfa aðstoð eru ofarlega í hugum Jóhanns Atla, Jans Kára og Björns Dags, níu ára pilta úr Garðabæ sem söfnuðu fé fyrir Rauða krossinn.
Þrír vinir og bekkjarbræður úr Sjálandsskóla í Garðabæ mættu galvaskir á skrifstofu Rauða krossins nýverið með appelsínugula fötu hálffulla af peningaseðlum og klinki. Þarna var um að ræða fé sem þeir Jóhann Atli Einarsson, Jan Kári Kröyer Jóhannsson og Björn Dagur Óskarsson, allir níu ára, höfðu safnað fyrir Rauða krossinn. Nokkrum vikum áður hafði þessi sama fata verið notuð til að safna í sælgæti á hrekkjavökunni. En nú fannst vinunum kominn tími til að leyfa öðrum að njóta þess sem í fötuna var safnað.
Fénu höfðu þeir safnað með því að ganga í hús í hverfinu sínu. Strákarnir söfnuðu með þeim hætti 10.272 krónum meðal góðra granna sinna og sú upphæð var skilmerkilega afhent Rauða krossinum til ráðstöfunar.
Vinunum er sérstaklega umhugað um að söfnunarféð nýtist börnum sem líði illa, „börnum sem þurfa aðstoð,“ sögðu þeir alvörugefnir. „Eða bara til þeirra sem þurfa mesta hjálp.“
Rauði krossinn þakkar þeim Jóhanni Atla, Jani Kára og Birni Degi hjartanlega fyrir stuðninginn og mun sjá til þess að söfnunarféð nýtist til góðra verkefna félagsins.
Fréttir af starfinu
Fréttayfirlit
Bökuðu 470 smákökur til styrktar Rauða krossinum
Almennar fréttir 24. apríl 2026Fjögur bekkjarsystkin úr 4. bekk í Barnaskóla Kársness lögðu eldhús heima hjá einu þeirra undir sig um helgina og bökuðu hvorki fleiri né færri en 470 kexkökur sem þau svo seldu til styrktar Rauða krossinum. „Fyrir börn sem þurfa hjálp,“ segja þau.
Að upplifa þakklætið gefur svo gott í hjartað
Innanlandsstarf 20. apríl 2026Framlag Sigríðar Birnu Sigvaldadóttur til verkefna Rauða krossins með fólki í afplánun „hefur skilað sér í raunverulegri breytingu fyrir marga,“ segir í rökstuðningi stjórnar höfuðborgardeildar Rauða krossins sem hefur valið hana einn af sjálfboðaliðum ársins. „Það er gott að geta haft jákvæð áhrif á líf annarra,“ segir Sigríður.
Langar þig að láta gott af þér leiða á Austurlandi?
Innanlandsstarf 14. apríl 2026Rauði krossinn í Múlasýslu býður upp á spennandi námskeið fyrir nýja og núverandi sjálfboðaliða. Námskeiðin eru opin öllum sem langar til að kynna sér störf Rauða krossins og sjálfboðaliða á svæðinu.