Alþjóðastarf

Fólk á Gaza sárbiður um hjálp

19. maí 2025

Í ellefu vikur hafa engin hjálpargögn komist inn á Gaza. Íbúarnir búa við harðnandi árásir og skort á lífsnauðsynjum. „Mannúðaraðstoð má aldrei nota í pólitískum eða hernaðarlegum tilgangi,“ segir Gísli Rafn Ólafsson, framkvæmdastjóri Rauða krossins á Íslandi.

Þrátt fyrir versnandi ástand á Gaza vinna starfsmenn og sjálfboðaliðar palestínska Rauða hálfmánans enn að því eftir fremstsa megni að sinna særðum og sjúkum íbúum.

Undanfarna daga hafa hundruð almennra borgara verið drepin eða særð í harðnandi hernaðaraðgerðum á Gaza. Fjöldi er enn talinn grafinn undir rústum húsa. Undanfarna sólarhringa hafa hundruð manna haft samband við neyðarlínu Alþjóðaráðs Rauða krossins (ICRC) og sárbeðið um hjálp. Fjölskyldur eru innlyksa og í örvæntingarfullri leit að öryggi og vernd. „Á Gaza er yfirþyrmandi þörf fyrir neyðaraðstoð sem er langt umfram það sem við getum sinnt,“ segir í yfirlýsingu Alþjóðaráðsins.

Sjúkrahús urðu fyrir árásum

Í síðustu viku urðu sjúkrastofnanir, þar á meðal Evrópski spítalinn og Indónesíska sjúkrahúsið, fyrir alvarlegum og endurteknum árásum. Þau voru meðal síðustu starfandi sjúkrahúsa á Gaza en eru nú bæði óstarfhæf.

„Í hvert sinn sem sjúkrastofnun neyðist til að hætta að veita þjónustu, eða að draga úr þjónustu, hefur það raunverulegar afleiðingar fyrir almenna borgara – fólk sem á engan þátt í átökunum – fólk sem er nú þegar í áfalli eða þjáist,“ segir Yasmine Praz Dessimoz, aðgerðastjóri ICRC. „Með hverjum búnaði sem laskast, hverjum vegg sem eyðileggst, hverri sendingu af birgðum sem skemmist, fjara möguleikar þúsunda á Gaza til bættra lífsskilyrða út.“

Samkvæmt alþjóðlegum mannúðarlögum skal hlífa sjúkrastofnunum í átökum því þær gegna lífsnauðsynlegu hlutverki fyrir særða og sjúka. Það sama á við um heilbrigðis- og mannúðarstarfsfólk en tugir úr þeirra röðum hafa fallið á Gaza síðustu mánuði, þeirra á meðal bráðaliðar palestínska Rauða hálfmánans, systurfélags Rauða krossins á Íslandi.

Almennir borgarar njóta einnig verndar samkvæmt alþjóðalögum. „Almennir borgarar hafa ítrekað verið drepnir í árásum á Gaza og mannfallið mun aukast enn meira nú þegar mörg sjúkrahús og aðrar heilbrigðisstofnanir geta ekki bjargað lífi særðra og sjúkra,“ segir Gísli Rafn Ólafsson, framkvæmdastjóri Rauða krossins á Íslandi.

Án hjálpargagna í tæplega 80 daga

Hann minnir á að í ellefu vikur, tæplega 80 daga, hafi engri neyðaraðstoð verið hleypt inn á Gaza. „Allan þennan tíma hafa íbúarnir, þar á meðal um milljón börn, búið við skort á lífsnauðsynjum á borð við mat og lyf,“ segir Gísli. Hann tekur undir þá kröfu Alþjóðaráðs Rauða krossins að hjálpargögnum verði hleypt inn á Gaza strax og án allra hindrana. Birgðir af nauðsynjum hafa allan þennan tíma beðið í Jórdaníu og Egyptalandi. Hætta er á að matvæli og lyf fari að renna út.

Fréttir hafa borist af því að fimm vöruflutningabílar hafi í dag, mánudag, farið inn á Gaza með hjálpargögn en mannúðarsamtök og alþjóðastofnanir, sem hingað til hafa dreift gögnum, hafa ekki fengið aðkomu að því verkefni.

Forseti Alþjóðaráðsins hefur sagt að einkavæðing mannúðaraðstoðar sé ekki lausn. Áfram verður að tryggja að aðstoð berist beint og milliliðalaust til þeirra sem á henni þurfa að halda. „Mannúðaraðstoð má aldrei nota í pólitískum eða hernaðarlegum tilgangi,“ segir Gísli Rafn.

Bökuðu 470 smákökur til styrktar Rauða krossinum

Almennar fréttir 24. apríl 2026

Fjögur bekkjarsystkin úr 4. bekk í Barnaskóla Kársness lögðu eldhús heima hjá einu þeirra undir sig um helgina og bökuðu hvorki fleiri né færri en 470 kexkökur sem þau svo seldu til styrktar Rauða krossinum. „Fyrir börn sem þurfa hjálp,“ segja þau.

Að upplifa þakklætið gefur svo gott í hjartað

Innanlandsstarf 20. apríl 2026

Framlag Sigríðar Birnu Sigvaldadóttur til verkefna Rauða krossins með fólki í afplánun „hefur skilað sér í raunverulegri breytingu fyrir marga,“ segir í rökstuðningi stjórnar höfuðborgardeildar Rauða krossins sem hefur valið hana einn af sjálfboðaliðum ársins. „Það er gott að geta haft jákvæð áhrif á líf annarra,“ segir Sigríður.

Langar þig að láta gott af þér leiða á Austurlandi?

Innanlandsstarf 14. apríl 2026

Rauði krossinn í Múlasýslu býður upp á spennandi námskeið fyrir nýja og núverandi sjálfboðaliða. Námskeiðin eru opin öllum sem langar til að kynna sér störf Rauða krossins og sjálfboðaliða á svæðinu.